សោកស្ដាយ នាយកដ្ឋានភាពយន្ត ប្រកាសផ្អាកមហោស្រពភាពយន្តជាតិលើកទី៣ទៅហើយ!
- 2020-11-18 05:07:15
- ចំនួនមតិ 0 | ចំនួនចែករំលែក 0
សោកស្ដាយ នាយកដ្ឋានភាពយន្ត ប្រកាសផ្អាកមហោស្រពភាពយន្តជាតិលើកទី៣ទៅហើយ!
ចន្លោះមិនឃើញ
នៅប៉ុន្មានម៉ោងមុននេះ នាយកដ្ឋានសិល្បៈភាពយន្ត និងផ្សព្វផ្សាយវប្បធម៌ ទើបបានចេញសេចក្ដីជូនដំណឹងបន្ទាន់មួយ ដោយសម្រេចផ្អាក ការរៀបចំធ្វើមហោស្រពភាពយន្តជាតិលើកទី៣ នាឆ្នាំ ២០២០នេះហើយ។
សេចក្ដីជូនដំណឹងនេះ គឺប្រមាណតែ១ខែប៉ុណ្ណោះ បន្ទាប់ពីក្រសួងវប្បធម៌បានប្រកាសពីការបើកធ្វើមហោស្រពភាពយន្តថ្នាក់ជាតិលើកនេះ៣នេះ កាលពីដើមខែ តុលា។ នៅក្នុងកាលបរិច្ឆេទដំបូង មហោស្រពភាពយន្តជាតិលើកទី២ ត្រូវបានគ្រោងធ្វើឡើងនៅថ្ងៃទី ៤-៧ ធ្នូ ខាងមុខ។ យ៉ាងណា កន្លែងដែលផ្ដល់ការលើកកម្ពស់សិល្បៈភាពយន្តក្នុងស្រុកនេះ បានសម្រេចផ្អាកទៅហើយ ដោយមិនមានបញ្ជាក់កាលបរិច្ឆេទរៀបចំឡើងវិញនៅពេលណានោះទេ។
ចំពោះមូលហេតុ ដែលមាននៅក្នុងសេចក្ដីជូនដំណឹងនោះ គឺដោយយោងលើស្ថានភាពខូវីដ ១៩ បាន និងកំពុងរីករាលដាលជាសាកល។ ដូច្នេះហើយ នាយកដ្ឋានភាពយន្ត ស្នើសុំការអធ្យាស្រ័យចំពោះការសម្រេចផ្អាកកម្មវិធីផ្ដល់ចំណាត់ភាពយន្តធំបំផុត និងមានតែ១គត់ក្នុងមួយឆ្នាំនេះ។ នេះបើតាមទំព័រហ្វេសប៊ុករបស់នាយកដ្ឋានភាពយន្ត។
លោក ប៉ុក បូរក្ស ថ្នាក់ដឹកនាំនាយកដ្ឋានខាងលើ ក៏បានបញ្ជាក់នៅព្រឹកថ្ងៃទី ១៨ វិច្ឆិកានេះដែរថា មហោស្រពនេះ សម្រេចថាផ្អាកផ្លូវការហើយ។ តាមរយៈសារអេឡិចត្រូនិក លោក បូ រក្ស ថា ជារឿងរាល់ឆ្នាំ ក្រុមការងារក្រសួងទាំងមូល ត្រូវចំណាយពេលយ៉ាងតិច ៦ក្នុងការរៀបចំ។ ប៉ុន្តែឆ្នាំនោះ ដំណើរការរៀបចំទាំងអស់ ត្រូវបានរំខានដោយ ខូវីដ។ ដូច្នេះហើយ ការប្រារព្ធផ្លូវការមិនអាចធ្វើទៅបានឡើយ។
ប្រធាននាយកដ្ឋានដដែលសង្កត់ធ្ងន់ថា ព្រឹត្តិការណ៍នេះ សម្រេចផ្អាកតែម្ដង មិនមែនពន្យារពេលនោះទេ។ លោកថ្លែងដូច្នេះថា៖ "មិនអាចពន្យាទេ ព្រោះការប្រើប្រាស់ថវិការដ្ឋ ត្រូវទូទាត់មុនបំណាច់ឆ្នាំ"។
កាលពីចុងឆ្នាំ ២០១៩ មហោស្រពដូចគ្នានេះ បានប្រារព្ធលើកជាលើកទី២របស់ខ្លួន ដោយកាលណោះ បានរកឃើញ ភាពយន្ត អ្នកដឹកនាំរឿង និងបុគ្គលបម្រើការនៅក្នុងវិស័យនេះ មានភាពលេចធ្លោ និងទទួលបានពានរង្វាន់តាមសមត្ថភាពរៀងៗខ្លួន។ ចំណុចចាប់អារម្មណ៍ រឿង "នាឡិកាដាស់វិញ្ញាណ" និងរឿង "ស្នេហាក្មេងៗ" ប្រមូលយកពានពីមហោស្រពភាពយន្តថ្នាក់ជាតិលើកទី២នេះ យ៉ាងច្រើនរឿងខ្លួន៕