Apple ទម្លាយពីចន្លោះប្រហោងធំ៣លើ iOS ក្រោយបានសំងំជួសជុលរួច
- 2021-01-27 07:36:34
- ចំនួនមតិ 0 | ចំនួនចែករំលែក 0
Apple ទម្លាយពីចន្លោះប្រហោងធំ៣លើ iOS ក្រោយបានសំងំជួសជុលរួច
ចន្លោះមិនឃើញ
Apple បានបញ្ចេញកំណែអាប់ឌែត iOS 14.4 ជាបន្ទាន់ កាលពី ថ្ងៃអង្គារ កន្លងទៅនេះ ព្រោះតែក្រុមអ្នកស្រាវជ្រាវសុវត្ថិភាពអនាមិក បានរកឃើញកំហុសឆ្គងចំនួន៣ (bugs) ដែលជាភាពងាយរងគ្រោះ អាចឱ្យអ្នកវាយប្រហារ (Hacker) អាចជ្រៀតចូលទៅក្នុងប្រព័ន្ធប្រតិបត្តិការ iOS របស់ខ្លួនបាន។
ភាពងាយរងគ្រោះចំនួនពីរដំបូង ទាក់ទងទៅនឹង Webkit ដែលជាមុខងារស្វែងរកសម្រាប់ដំណើរការលើកម្មវិធី Safari និងកម្មវិធី Mail។ យោងទៅតាម Apple មុខងារ Webkit អាចត្រូវបានរំលោភបំពានតាមរយៈការដំណើរការកូដរបស់កុំព្យូទ័រ ដោយ hacker ឆ្លៀតឱកាសប្រើប្រាស់អ៊ីមែល ឬគេហទំព័រ ដើម្បីឱ្យ iPhone របស់អ្នកប្រើប្រាស់ទាញយកកម្មវិធីមេរោគបាន។
ភាពងាយរងគ្រោះទី៣ គឺពាក់ព័ន្ធនឹង kernel ដែលជាប្រព័ន្ធស្នូលសម្រាប់កំណត់បញ្ជាផ្សេងៗទៅកាន់ iOS ឱ្យដំណើរការបាន។ តាមរយៈកំហុសឆ្គង (bug) ដែលកើតមាន Hacker អាចចូលទៅកំណត់ kernel ដោយបើកសិទ្ធឱ្យកម្មវិធីមេរោគអាចជ្រៀតចូលក្នុងប្រព័ន្ធដំណើរការ iOSបានថែមទៀតផង។
យោងតាម Apple គុណវិបត្តិទាំងនេះអាចនឹងប៉ះពាល់ទៅលើអ្នកប្រើប្រាស់ iPhones 6s ឡើងទៅ ក៏ដូចជា iPad ជំនាន់ Air 2 និង mini 4 ឡើងទៅផងដែរ។ ដូចនេះដើម្បីជៀសវាងពីគុណវិបត្តិទាំងនេះ អ្នកគប្បីអាប់ឌែតឡើងទៅ iOS 14.4 និង iPadOS 14.4 ទាំងអស់គ្នា។
របៀបអាប់ឌែត ចូលទៅកាន់កម្មវិធី Setting > General > Software Update និងទាញយកការអាប់ឌែត និងតម្លើងជាការស្រេច៕