ថាទឹកស្ងប់ មិនប្រាកដថាអត់ត្រីនោះ គឺមិនខុសមែន ពេលនេះ ប្រុសឡា ឆ្លើយតបវិញហើយរឿងឡើងតុលាការ
- 2021-01-29 03:51:50
- ចំនួនមតិ 0 | ចំនួនចែករំលែក 0
ថាទឹកស្ងប់ មិនប្រាកដថាអត់ត្រីនោះ គឺមិនខុសមែន ពេលនេះ ប្រុសឡា ឆ្លើយតបវិញហើយរឿងឡើងតុលាការ
ចន្លោះមិនឃើញ
វិវាទរបស់តារាចម្រៀងរ៉េប ២ដួង នៅមិនទាន់ចប់ ក្រោយម្សិលមិញនេះ Vid Cooler ដែលជាដើមបណ្ដឹង បានចេញសារឌឺដងឈឺៗទៅកាន់ ប្រុសឡា ឥឡូវនៅថ្ងៃនេះ ភាគីរងបណ្ដឹងបានឆ្លើយតបទៅវិញហើយ។
នេត្រ ចាន់តារាវីត ហៅ Vid Cooler បានបញ្ចេញឯកសារពាក្យបណ្ដឹងកាលពីថ្ងៃទី ២៦ មករា ប្ដឹង ប្រុសឡា និងគូកន ពីបទប្រព្រឹត្តហិង្សាមានស្ថានទម្ងន់ទោស។ សារនេះបានធ្វើឲ្យមានការភ្ញាក់ផ្អើលនៅក្នុងមជ្ឈដ្ឋានមហាជន និងសង្គមសិល្បៈ ត្បិតថានេះជាករណីទី១ក្នុងសង្គមតារារ៉េប ដែលមានជម្លោះនឹងគ្នារហូតដល់ប្រព្រឹត្តហិង្សា និងប្ដឹងផ្ដល់គ្នាបែបនេះ។
បន្តិចក្រោយមក សាមីខ្លួន ប្រុសឡា ដែលរងបណ្ដឹង បានចេញសារលើទំព័រហ្វេសប៊ុកដោយស្នើឲ្យប្រិយមិត្តរង់ចាំដឹងរឿងទាំងសង្ខាងសិនចាំវាយតម្លៃ។ ចំពោះករណីនេះ មេធាវីរបស់លោកកំពុងធ្វើការហើយ។ ប៉ុន្តែក្រោយពីឃើញ ប្រុសឡា នៅតែស្ងប់ស្ងាត់ ស្រាប់តែ Vid Cooler ចេញសារថា គេកំពុងរង់ចាំភាគីរងការចោទនៅតុលាការ ដូច្នេះហើយ ស្នើសុំកុំយូរពេក។ "ខ្ញុំលឺអួតថា មានមេធាវីការពារក្ដី អញ្ចឹងខ្ញុំរង់ចាំនៅតុលាការ .. (តែកុំយូរពេក)”។
បែបនេះក្ដី គេឃើញថា ប្រុសឡា នៅតែស្ងប់ស្ងាត់ មិនមានសកម្មភាពអ្វីនៅលើបណ្ដាញសង្គមឡើយ។ ប៉ុន្តែដូចគេថា ទឹកស្ងប់រលក មិនប្រាកដថាគ្មានត្រីនៅពីក្រោមនោះ យប់មិញនេះ ក្នុងបទសម្ភាសន៍ខ្លីជាមួយ Sabay ម្ចាស់បទ "នារីសក់ខ្លី" ប្រាប់ថា អ្វីៗកំពុងតែដំណើរការហើយ។
"មេធាវីរបស់ខ្ញុំកំពុងតែ ធ្វើការទៅលើរឿងក្តីនេះបង ខ្ញុំត្រៀមចាំតែចូលខ្លួន បញ្ជាក់ថា ខ្ញុំមិនបានបង្កហិង្សាក្នុងរឿងនេះទេបង!”។
ប្រុសឡា បានរងបណ្ដឹងពីលោក នេត្រ ចាន់តារាវីត ហៅ Vid Cooler ដោយសំអាងលើហេតុការណ៍ហិង្សាមួយកើតឡើងកាលពីពាក់កណ្ដាលឆ្នាំ ២០២០។ វេលានោះ នៅក្នុងពាក្យបណ្ដឹង ភាគីដើមបណ្ដឹងបញ្ជាក់ថា ខ្លួនបានរងការប្រព្រឹត្តហិង្សាធ្វើឲ្យរបួសដៃត្រូវដេរដល់ទៅ ៣០ថ្នេរ ពីភាគីខាង ម្ចាស់ហាង "មីហឹរ ៧កំរិត បាត់ដំបង"។ ករណីនេះ ដើម្បីបណ្ដឹងបានប្ដឹង ប្រុសឡា និងគូកន ពីបទប្រព្រឹត្តហិង្សា មានស្ថានទម្ងន់ទោស។
តបនឹងបញ្ហានេះ ប្រុសឡា នៅតែបញ្ជាក់ថា លោកមិនបានបង្កហិង្សាលើនរណាម្នាក់នៅក្នុងហេតុការណ៍នោះឡើយ។ ដូច្នេះហើយ ច្បាស់ណាស់ លោកនឹងមិនគេចទៅណាទេ។ ប្រុសឡា ថ្លែងថា "ខ្ញុំមិនគេចវេសទៅណាទេ ប៉ុន្តែខ្ញុំមិនទាន់បានទទួលបានដីកាកោះហៅនោះទេ ហើយខ្ញុំក៏រង់ចាំព័ត៌មានបន្ថែមពីមេធាវីខ្ញុំដែរ"៕