សិស្សវិទ្យាល័យ២រូប អាចនឹងជាប់កំណត់ត្រាជា "តារាវិទូមានវ័យក្មេងបំផុត"

2021-02-05 07:28:49
ចំនួនមតិ 0 | ចំនួនចែករំលែក 0

ចន្លោះមិនឃើញ

សិស្សវិទ្យាល័យ២រូប អាចនឹងជាប់កំណត់ត្រាជា "តារាវិទូមានវ័យក្មេងបំផុត" បន្ទាប់ពីពួកគេស្រាវជ្រាវរកឃើញភពចំនួន ៤ កំពុងគោចរនៅជុំវិញផ្កាយមួយមានពន្លឺភ្លឺថ្លាស្រដៀងនឹងព្រះអាទិត្យរបស់យើង ជាស្នាដៃដ៏អស្ចារ្យមិនធ្លាប់មានក្នុងវ័យស្របាលនេះ។

យុវជនអាយុ ១៦ឆ្នាំម្នាក់ឈ្មោះ Kartik Pinglé និងមិត្តរួមក្រុមយុវតីអាយុ ១៨ឆ្នាំឈ្មោះ Jasmine Wright ជាសិស្សវិទ្យាល័យនៃរដ្ឋ Massachusetts សហរដ្ឋអាមេរិក កំពុងបោះជំហានដើម្បីក្លាយខ្លួនជាក្រុមតារាវិទូ បន្ទាប់ពីការសិក្សានិងអង្កេតរបស់ពួកគេដោយប្រើប្រាស់ពេល ៤ម៉ោងក្នុងមួយសប្តាហ៍បានរកឃើញភពរហូតដល់ទៅ ៤ កំពុងគោចរនៅជុំវិញប្រព័ន្ធផ្កាយមួយ ដែលមានចម្ងាយ ២០០ឆ្នាំពន្លឺពីផែនដី (ខ្នាត១ឆ្នាំពន្លឺ = ៩.៤៦ទ្រីលានគីឡូម៉ែត្រ) ។

សិស្សវិទ្យាល័យទាំងពីរនាក់នេះបានធ្វើការអង្កេតទៅលើផ្កាយមួយ ដែលត្រូវបានរកឃើញដោយកែវយឺតអវកាស TESS មានឈ្មោះសម្គាល់ថា TOI-1233 តាមរយៈមជ្ឈមណ្ឌលអង្កេតតារាសាស្ត្រ Harvard និង Smithsonian។

រីឯព័ត៌មានលម្អិតអំពីភពទាំង ៤ ខាងលើនេះពាក់ព័ន្ធថាតើអាចមានភពណាមួយ មានលទ្ធភាពទ្រទ្រង់ជីវិតដែរ ឬអត់ និងបុគ្គលិកលក្ខណៈផ្សេងៗរបស់ភពទាំងនោះនៅមិនទាន់ត្រូវបានបង្ហាញនោះឡើយ ព្រោះត្រូវការក្រុមតារាវិទូ និងអ្នកវិទ្យាសាស្ត្រជំនាញ ធ្វើការសិក្សាស្រាវជ្រាវបន្តដើម្បីបញ្ជាក់។

ស្នាដៃរបស់ពួកគេត្រូវបានសារព័ត៌មានវិទ្យាសាស្ត្រ និងវិបសាយបរទេសល្បីៗផ្នែកវិទ្យាសាស្ត្របច្ចេកវិទ្យា យកទៅចុះផ្សាយទំព័រមុខយ៉ាងគគ្រឹកគគ្រេង កាលពីថ្ងៃទី ៣ ខែកុម្ភៈឆ្នាំ ២០២១។ យោងតាមតារាវិទូមួយរូបឈ្មោះ Clara Sousa-Silva ដែលដឹកនាំកម្មវិធីសម្រាប់សិស្សវិទ្យាល័យខាងលើនេះ បានលើកឡើងថា "សិស្សទាំងពីរនាក់នេះ អាចនឹងក្លាយជាតារាវិទូដែលមានវ័យក្មេងបំផុត ដែលបានស្រាវជ្រាវរកឃើញភពដ៏សែនឆ្ងាយនេះ" ៕