មានហេតុផលធំៗច្រើន មាស សុខសោភា ប្រកាសរួមរស់ជាមួយផលិតកម្ម "រាម" ដែលនៅក្មេងខ្ចី
- 2021-02-20 05:28:08
- ចំនួនមតិ 0 | ចំនួនចែករំលែក 0
មានហេតុផលធំៗច្រើន មាស សុខសោភា ប្រកាសរួមរស់ជាមួយផលិតកម្ម "រាម" ដែលនៅក្មេងខ្ចី
ចន្លោះមិនឃើញ
គិតត្រឹមយប់មិញនេះ មាស សុខសោភា បានក្លាយជាតារាចម្រៀងផលិត "រាម" ផ្លូវការ ដោយមានការធ្វើពិធីទទួលស្វាគមន៍យ៉ាងគគ្រឹកគគ្រេងផង។ សាមីខ្លួនបាន ប្រាប់ថា តាមពិតនាងហេតុផលធំច្រើនដែលគាំទ្រការសម្រេចចិត្តរបស់នាងក្នុងការចូលរួមជាមួយផលិតកម្មក្មេងខ្ចីខាងលើ។
នៅមុនការប្រកាសផ្លូវការយប់មិញ មាស សុខសោភា ដែលតែលតោលជិត១ឆ្នាំ ក្រោយសម្រេចចិត្តដើរចេញពីផលិតកម្មថោននោះ ធ្លាប់មានចចាមអារ៉ាមថា នាងអាចនឹងចូល ហង្សមាស និង Galaxy ប៉ុន្តែក្រោយមក សាមីខ្លួនបានឲ្យតម្រុយថាកាលពីដើមខែថា នាងសម្រេចចិត្តចូលរួមជាមួយផលិតកម្ម "រាម" ហើយ។
ការសម្រេចចិត្ត បានធ្វើឲ្យមានការភ្ញាក់ផ្អើល ខណៈ "រាម" មិនទាន់មានឈ្មោះនៅក្នុងទីផ្សារនៅឡើយ។ ចំពោះបញ្ហានេះ នៅក្នុងសន្និសីទសារព័ត៌មានយប់មិញ មាស សុខសោភា បញ្ជាក់ថា នាងមានហេតុផលច្រើន ចំពោះការសម្រេចចិត្តមួយនេះ ក្នុងនោះហេតុផលមួយសំខាន់ តារាចម្រៀងស្រី ប្រាប់ថា នាងបានរកឃើញកន្លែងដែលមានការប្ដេជ្ញាចិត្តខ្ពស់ចំពោះភាពរីកចម្រើននៃសិល្បៈខ្មែរ។
“រាប់ថាជារឿងចៃដន្យដែរ ពេលមួយ ខ្ញុំបានជួបបងអគ្គនាយិកា ហើយគាត់ក៏បានសួរចិត្តពីការចូលរួមជាមួយគាត់ ក្រោយពីបានជជែកគ្នាយូរទៅ ខ្ញុំក៏សម្រេចចិត្តភ្លាម ព្រោះមិនងាយបានជួបអ្នកដែលមានចិត្តដូចគ្នា ពោលគឺ ចិត្ត បេះដូង និងគោលដៅតែមួយ គឺយើងស្រឡាញ់សិល្បៈដូចគ្នា ធ្វើអ្វីដើម្បីសិល្បៈ មិនដែលចង់បានអ្វីពីសិល្បៈមកវិញទេ ហើយគាត់ដូចគ្នាអីចឹង អីចឹងខ្ញុំដូចអត់ចាំបាច់គិតយូរទេ ខ្ញុំសម្រេចចិត្តភ្លាម តែ ៤-៥ម៉ោង ក្រោយជជែកជាមួយគាត់"។
ហេតុផលមួយផ្សេងទៀត គឺថា "រាម" ទុក សោភា ដូចជារាជនីម្នាក់ ក្នុងនោះតាមការបញ្ជាក់របស់អគ្គនាយិកាអ្នកនាង នួន សុន្ទរី បានឲ្យដឹងថា ផលិតកម្មត្រៀមទុនច្រើន សម្រាប់ធ្វើបទឲ្យ មាស សុខសោភា ដែលពេលនេះបានក្លាយជាតារាចម្រៀងទី១របស់ផលិតកម្ម។ ជាក់ស្ដែង ត្រឹមថ្ងៃប្រកាសស្វាគមន៍តារាចម្រៀង ផលិតកម្ម "រាម" បានធ្វើបទពិសេសមួយឲ្យ សោភា រួចហើយ។
បទនោះមានចំណងជើងថា "ការវិលត្រឡប់” ដែលក្រុមការងារចំណាយទុនធំ និងសម្រិតសម្រាំងបំផុត ទើបចេញវីដេអូចម្រៀងផ្លូវការពេញលេញយប់មិញនេះ។ ក្រៅពីនេះ ហេតុផលដាច់ដោយឡែកមួយ មាស សុខសោភា ក៏ត្រូវបានប្រគល់តំណែងធំដែរនៅក្នុងផលិតកម្មនេះ។ តាមអគ្គនាយិកា អ្នកនាង នួន សុន្ទរី សោភា មិនត្រឹមជាតារាចម្រៀង តែជាទីប្រឹក្សាជាន់ខ្ពស់របស់ផលិតកម្មដែរ។
តួនាទីនេះ សោភា នឹងផ្ដល់ប្រឹក្សាទៅលើយុទ្ធសាស្ត្រ និងយុទ្ធវិធីដើម្បី "រាម" ឆ្ពោះទៅមុខសម្រេចគោលដៅលឿន។ ក្រៅពីនេះ សោភា ក៏នឹងមានតួនាទីពិនិត្យសាច់ភ្លេងបទចម្រៀងនានាមុនចេញដែរ។ នៅយប់មិញនេះ ក្រៅពី មាស សុខសោភា ក៏មានតារាចម្រៀងម្នាក់ទៀត គឺលោក ដួង វីរៈសិទ្ធិ ក៏បានមកចូលរួម ក្នុងនោះតារាចម្រៀងស្រី បានចុះកុងត្រាការងារ ១ឆ្នាំជាមួយគ្នា។ ប៉ុន្តែដំណឹងចុងក្រោយពីអគ្គនាយិកា បានឲ្យដឹងថា សោភា បានប្ដូរចិត្ត ចង់ចុះកុងត្រាបន្ថែម។ "តាមមើលកុងត្រា១ឆ្នាំ អាចទៅជាកុងត្រា១ជីវិត"។ អ្នកស្រី នួន សុន្ទរី ហៅ ស្រីអូន ថ្លែងដោយសំណើច។
តាមលោក សេង ហាក់ នាយកគ្រប់គ្រងផលិតកម្ម "រាម" ឲ្យដឹងថា លោកត្រូវការតារាចម្រៀងបន្ថែមទៀត ប៉ុន្តែក៏មិនច្រើនពេកដែរ។ លោកថា ចង់បានកម្រិតល្មម សមស្របតាមយុទ្ធសាស្ត្រ ដែលផលិតកម្មមិនចង់បានតារាចម្រៀងមកច្រើនពេក នាំឲ្យហួសពីសមត្ថភាពផលិតបទចម្រៀងដាក់ចូលទីផ្សារនោះទេ។ លោក សង្កត់ធ្ងន់ថា "រាម" មិនផលិតបទចម្រៀងច្រើនទេ គឺផលិតមួយៗ តែមានគុណភាព។
លោក បានគូសបញ្ជាក់ថា "រាម" មកក្រោយគេ មានគោលដៅវែងឆ្ងាយ ប៉ុន្តែមិនមែនមកដើម្បីប្រជែងនឹងអ្នកណានោះទេ ប៉ុន្តែនឹងរួមគ្នាក្នុងទិសដៅតែមួយដើម្បីលើកកម្ពស់សិល្បៈខ្មែរ ឈានជើងទៅទីផ្សារអន្តរជាតិ។ លោកថ្លែង៖ "យើងមិនមែនមកដើម្បីប្រជែងគេទេ ប៉ុន្តែផ្ទុយទៅវិញ យើងរីករាយក្នុងការសហការណាមួយ ដើម្បីភាពរីកចម្រើនសិល្បៈខ្មែរយើង ឧទាហរណ៍ថា ផលិតកម្មណា ឬផលិតករណាខ្វះទុន ត្រូវការទុន អាចមកសហការជាមួយយើងបាន!"។
តាមអគ្គនាយិកា ផលិតកម្ម "រាម" បានផ្ដល់មូលនិធិគាំទ្រការផលិតភាពយន្តដល់ផលិតករ៣រូបរួចមកហើយ គិតត្រឹមចុងខែកុម្ភៈ ២០២១ នេះ៕
ទស្សនាវីដេអូចម្រៀងពិសេស ជាបទទី១របស់ សោភា ក្នុងផលិតកម្ម "រាម" ខាងក្រោម៖