ទើបដឹង អ្នកនិពន្ធបទ "គ្រប់យ៉ាងព្រោះតែមេ” កំពុងល្បី គឺមេដែរសោះ!

2021-03-01 07:26:55
ចំនួនមតិ 0 | ចំនួនចែករំលែក 0

ចន្លោះមិនឃើញ

បទ”គ្រប់យ៉ាងព្រោះតែមេ” របស់ផលិតកម្ម Galaxy Navatra ដែលចេញកាលពីពាក់កណ្ដាលខែមុន បានទទួលគាំទ្រខ្លាំងមិនធម្មតា ក្នុងនោះមានមានទាំងរាស្ត្រ មានទាំងមន្ត្រី ជាក់ស្ដែងបទនេះ គេឃើញឯកឧត្តម ខៀវ កាញ៉ារីទ្ធ រដ្ឋមន្ត្រីក្រសួងព័ត៌មាន ក៏បានធ្វើការចែកចាយបទចម្រៀងនៅលើបណ្ដាញសង្គមរបស់ឯកឧត្តមផង។

ឥឡូវនេះ បទនេះ ត្រូវបានបើកបង្ហាញអ្នកនៅពីក្រោយហើយ ក្រោយទទួលបានប្រជាប្រិយភាពខ្ពស់។ តាមព័ត៌មាន អ្នកនិពន្ធបទនេះ លោក យឹម តាស្រង់ ដែលជាអ្នកគ្រប់គ្រងទូទៅក្នុងផលិតកម្មនេះតែម្ដង។ រយៈពេល២០ឆ្នាំនៃការប្រឡូកក្នុងវិស័យតែងនិពន្ធបទចម្រៀង យើងសង្កេតឃើញថាលោក យឹម តាស្រង់ ហាក់នៅតែមិនស្រកស្រុតទឹកដៃឡើយ និងនៅតែប្រឡូកពេញដៃពេញជើងក្នុងពិភពចម្រៀងដដែល។

អ្នកដឹកនាំ និងជាអ្នកនិពន្ធរូបនេះ គឺជាបុគ្គលសំខាន់បំផុតដែលនៅពីក្រោយ ការចេញបទចម្រៀងរាល់ថ្ងៃ ស្ទើរគ្មានលស់ថ្ងៃណា។ ពិសេសបទរបស់កំពូលតារាចម្រៀង ព្រាប សុវត្ថិ – ខេម – អ៊ុក សុវណ្ណារី – ធឿន បុរី នឹងតារាស្រីកំពុងល្បីខ្លំាង តន់ ចន្ទសីម៉ា មួយចំនួន ក៏សុទ្ធតែជាស្នាដៃនិពន្ធរបស់លោក យឹម តាស្រង់ មួយចំណែកធំដែរ។

និយាយពីបទ "គ្រប់យ៉ាងព្រោះតែមេ" ដែលច្រៀងឆ្លើយឆ្លងគ្នារវាង ព្រាប សុវត្ថិ និង តន់ ចន្ទសីម៉ា សម្រាប់អបអរឱកាសពិធីបុណ្យចូលឆ្នាំខ្មែរ អ្នកនិពន្ធរូបនេះ បង្ហើបថា ដកស្រង់ពីសភាពពិតដែលលោកមើលឃើញក្នុងរង្វង់ការងារ ពិសេសគឺក្រុមការងាររបស់លោកតែម្ដង។ លោកថា ជារឿយៗ គឺលោកបានជួប និងដឹងពីរឿងនេះដោយខ្លួនឯង ឬក៏មិត្តភ័ក្តិផ្សេងទៀត។ ដូច្នេះហើយ ទើបលោករៀបចំធ្វើវាចេញជាបទចម្រៀងតែម្ដង។

ក្រោយពីចេញបានតែ១ថ្ងៃបទរបស់ សីម៉ា និង ព្រាប សុវត្ថិ មួយនេះ ទទួលបានការគាំទ្រយ៉ាងខ្លាំង។ កាន់តែពិសេស ឯកឧត្តម ខៀវ កាញ៉ារីទ្ធ រដ្ឋមន្ត្រីក្រសួងព័ត៌មាន ក៏បានយកទៅស៊ែរនៅលើគណនីហ្វេសប៊ុករបស់ឯកឧត្តម ដោយផ្ញើទៅមន្ត្រីរបស់លោក ដែលឧស្សាហប្រើស្នៀតនេះដើម្បីដោះទាល់នោះ។ ភ្លាមៗ គេឃើញប្រិយមិត្ត រួមទាំងមន្ត្រីរបស់ឯកឧត្តម រដ្ឋមន្ត្រីខ្លះផង បានចូលទៅសរសេរសារក្នុងន័យ អស់សំណើច និងហួសចិត្ត។

មកទល់បច្ចុប្បន្នបទ "គ្រប់យ៉ាងព្រោះតែមេ" មានចំនួនអ្នកចូលទស្សនា ជិត ៣លានដងហើយ។ តោះ ទស្សនា និងស្ដាប់បទនេះទំាងអស់គ្នាទៀត៖