លើកនេះស្ទីលជប៉ុនហ្មង! បាត់មុខ ធឿន បុរី រាប់ខែ ឥឡូវមកវិញ ជិតកំលោះបាត់ហើយ
- 2021-03-06 05:08:56
- ចំនួនមតិ 0 | ចំនួនចែករំលែក 0
លើកនេះស្ទីលជប៉ុនហ្មង! បាត់មុខ ធឿន បុរី រាប់ខែ ឥឡូវមកវិញ ជិតកំលោះបាត់ហើយ
ចន្លោះមិនឃើញ
ជាច្រើនខែណាស់មកហើយ កុមារា ធឿន បុរី ដែលធ្លាប់តែបំពេរអារម្មណ៍ប្រិយមិត្តតាមរយៈសំនៀងដ៏ក្រអួនក្រអៅនោះ បានបាត់មុខបាត់សំឡេងឈឹង ឥឡូវថ្ងៃនេះមកវិញ ប្រែរូបរាងស្ទើរពេញកំលោះទៅហើយ ហើយអ្វីដែលសំខាន់ មកលើកនេះ ស្ទីលប្លែកអស់ទាស់ទៀត។
ជាមួយនឹងការបាត់មុខមួយរយៈកន្លងមក ប្រិយមិត្តជាច្រើនបានចោទជាសំណួរអំពីដំណឹងរបស់ ធឿន បុរី ចង់ដឹងពីមូលហេតុបាត់មុខ។ ក្រោយមកលោក យឹម តាស្រង់ បានចេញមុខឆ្លើយតបទៅនឹងចម្ងល់ប្រិយមិត្តទាំងឡាយថា មូលហេតុដែល ធឿន បុរី បាត់មុខ និងមិនមានបទចេញ គឺដោយសារតែ បុរី បានវិវត្តវ័យកាន់តែជិតពេញរូបពេញរាង។
សំខាន់ជាងនោះ បុរី បានប្រែប្រួលទាំងសំឡេងថែមទៀត។ បញ្ហានេះ ជាហេតុឲ្យតារាចម្រៀងតូច មិនអាចច្រៀងឆ្លើយឆ្លងជាមួយ អ៊ុក សុវណ្ណារី បានទៀត ដោយសារទឹកដមសំឡេងលែងសូវស៊ីគ្នាដូចមុន។ ដូច្នេះហើយ ខណៈពេលផលិតកម្មសម្រុកចេញបទឲ្យ ព្រាប សុវត្ថិ សីម៉ា និងខេមនោះ បុរី ក៏ត្រូវនៅទុកឲ្យនៅស្ងៀមសិន។
ប៉ុន្តែឥឡូវនេះ ក្រោយរៀមច្បងអុកឡុកទីផ្សារអស់ចិត្ត ផលិតកម្មក៏ងាកមកគិតពី បុរី ម្ដង។ ដូច្នេះហើយនៅថ្ងៃនេះ គឺឃើញតារាចម្រៀងតូច បានចេញបទថ្មីរបស់ខ្លួននៅព្រឹកនេះជាថ្មី បន្ទាប់ពីម្សិលមិញ គេឃើញ Galaxy បានឲ្យតម្រុយពីលើរឿងនេះថា ធឿន បុរី ត្រឡប់វិញនៅថ្ងៃនេះហើយ។ បទថ្មីរបស់ បុរី ពេលនេះ មានចំណងជើងថា "ចូលចិត្តជប៉ុន" មានស្ទីលប្លែកស្ទើរ ១៨០ ដឺក្រេ។
"ចូលចិត្តជប៉ុន" របស់ ធឿន បុរី មានន័យយ៉ាងណា រៀបរាប់ពីអ្វីខ្លះ? តោះ...ទស្សនា និងស្ដាប់ទាំងអស់គ្នា!