យឹម តាស្រង់ ភ្ញាក់ក្រញាង ក្រោយក្រសួងទេសចរណ៍សរសើរចំៗបទចម្រៀងប៉ុន្មានបទរបស់ផលិតកម្ម!
- 2021-03-29 02:31:21
- ចំនួនមតិ 0 | ចំនួនចែករំលែក 0
យឹម តាស្រង់ ភ្ញាក់ក្រញាង ក្រោយក្រសួងទេសចរណ៍សរសើរចំៗបទចម្រៀងប៉ុន្មានបទរបស់ផលិតកម្ម!
ចន្លោះមិនឃើញ
នៅថ្ងៃម្សិលមិញនេះ ក្រសួងទេសចរណ៍នៃព្រះរាជាណាចក្រកម្ពុជា បានផ្ញើលិខិតសរសើរយ៉ាងកម្រមួយមកកាន់ផលិតកម្ម Galaxy Navatra ដោយបានលើកសរសើរពីកិច្ចការកន្លងមករបស់ផលិតកម្មនេះ បានជួយដល់វិស័យទេសចរណ៍ក្នុងស្រុកច្រើន។
លោក យឹម តាស្រង់ នាយកគ្រប់គ្រង បានប្រាប់ថា លោកពិតជាមានការភ្ញាក់មែនទែនចំពោះរឿងនេះ។ "យើងចេះតែធ្វើទៅ មិនបានគិតអីលើរឿងហ្នឹងផង ស្រាប់តែសុខៗ ក្រសួងផ្ញើលិខិតសរសើរនេះមក ខ្ញុំពិតជានឹកស្មានមិនសោះហ្មង!”។
តាមថ្នាក់ដឹកនាំផលិតកម្មដដែល បានបញ្ជាក់ថា លិខិតសរសើររបស់ក្រសួងផ្ដល់ជូន Galaxy Navatra ក្រោយពីផលិតកម្មបានផលិតវីដេអូចម្រៀងជាច្រើនពីពេលកន្លងទៅដើម្បីអបអរបុណ្យចូលឆ្នាំប្រពៃណីជាតិខ្មែរដែលនឹងមកដល់នៅខែមេសានេះ មានបញ្ចូលតំបន់ទេសចរណ៍ល្បីៗរបស់កម្ពុជាជាច្រើន របស់ខេត្តសក្ដានុពលទេសចរណ៍របស់កម្ពុជានាភាគឥសាន្ត មានដូចជាខេត្ត មណ្ឌលគីរី រតនៈគីរី ក្រចេះស្ទឹងត្រែង និងមួយចំនួនទៀត នៅក្នុងខេត្តកំពត។
រមណីយដ្ឋានធម្មជាតិល្បីៗ មាន ទឹកជ្រោះប៊ូស្រា បឹងយក្សលោម ជ្រោះសុភមិត្ត និងបូកគោជាដើម ត្រូវបានបង្ហាញជាមួយនឹងវីដេអូចម្រៀងដែលមានកម្រិតរូបភាពច្បាស់ដល់ 4K ជាច្រើនបទ បង្ហាញឲ្យឃើញច្បាស់ពីសក្ដានុពលនៃតំបន់ទេសចរណ៍ធម្មជាតិនីមួយៗ ទាំងអេកូទេសចរណ៍ ទេសចរណ៍ និងកសិករទេសចរណ៍របស់កម្ពុជា ដែលទាំងនេះគេឃើញមានក្នុងបទ "ឡានទំនើប" “អរគុណកាមេរ៉ា" “ពេលណាជួបគេម្ដងទៀត" “រកស៊ីជាមួយយក្ស" "នឹកឃើញខ្លាចឈ្លើង" “ធ្លាប់បានបងនៅ" “កោះអ្វី" និងបទ "ទឹកត្រីកោះកុង" ជាដើម។
តាមខ្លឹមមានក្នុងសារលិខិតសរសើរផ្ញើជូន Galaxy Navatra ក្រសួងបានគូសបញ្ជាក់ថា ការងារទាំងនេះរបស់ Galaxy បានរួមចំណែកយ៉ាងសំខាន់ក្នុងការផ្សព្វផ្សាយអំពីគោលដៅទេសចរណ៍ និងផលិតផលទេសចរណ៍ថ្មីៗ និងសម្បូរបែបរបស់កម្ពុជាទៅកាន់ភ្ញៀវទេសចរជាតិ និងអន្តរជាតិ។
រំភើបនឹងសមិទ្ធផលនេះ លោក យឹម តាស្រង់ បានប្រាប់ថា លោកពិតជារីករាយមែនទែន។ ដូច្នេះហើយ ជំនួសមុខឲ្យបុគ្គលិកគ្រប់ជាន់ថ្នាក់របស់ផលិតកម្ម GALAXY NAVATRA សូមអរគុណនូវការលើកទឹកចិត្តរបស់ក្រសួងទេសចរណ៍ចំពោះការខិតខំប្រឹងប្រែងរបស់ផលិតកម្ម នូវការថតផ្តិតយករូបភាពវីដេអូចម្រៀងតាមតំបន់ទេសចរណ៍ជាច្រើនជុំវិញប្រទេសកម្ពុជា ក្នុងន័យផ្សព្វផ្សាយលើកកម្ពស់តំបន់ទេសចរណ៍ក្នុងប្រទេសសម្រាប់បទរាំកម្សាន្តដើម្បីអបអរនាឱកាសឆ្នាំថ្មីនេះ។ ជាពិសេស ក៏សូមអរគុណដល់ពុកម៉ែបងប្អូនទាំងអស់ដែលតែងគាំទ្រផលិតកម្ម Galaxy Navatra ទើបក្រុមហ៊ុនយើងអាចឈរនៅចំនុចនេះ៕