ពិសី ដាច់សរសៃ ACL ឆ្នាំមុនចង់បោះបង់អាជីពទៅហើយ បាន Tiger ប្រើវិធីនេះទើបមានថ្ងៃនេះ
- 2021-04-02 07:11:32
- ចំនួនមតិ 0 | ចំនួនចែករំលែក 0
ពិសី ដាច់សរសៃ ACL ឆ្នាំមុនចង់បោះបង់អាជីពទៅហើយ បាន Tiger ប្រើវិធីនេះទើបមានថ្ងៃនេះ
ចន្លោះមិនឃើញ
កាលពីឆ្នាំមុន តាំង ពិសី បានរបួសដាច់សរសៃ ACL ធ្ងន់ធ្ងរ ហើយត្រូវទៅវះកាត់ដល់ប្រទេសវៀតណាម ក្រោយវះកាត់រួចខ្សែការពារស្លាបស្ដាំរូបនេះស្ទើរតែបោះបង់អាជីពនេះចោលទៅហើយ កុំតែបានក្លឹបលើកទឹកចិត្ត ដោយប្រើវិធីតកុងត្រាឲ្យទើបគេមិនបោះបង់ហើយអាចមានដូចពេលនេះវិញ។
ខ្សែការពាររូបនេះកំបុងបង្ហាញភាពលេចធ្លោខ្លាំង ដោយបង្ហាញខ្លួន ៣ ប្រកួតរកបាន ២ គ្រាប់ និងបញ្ជូនបាល់ឲ្យមិត្តរួមក្រុមរកបាន ១ គ្រាប់។ ក្នុងនាមជាខ្សែការពារវាជារឿងដ៏កម្រក្នុងការជួយក្រុមតាមរយៈការរកគ្រាប់បាល់។ យ៉ាងណា ខ្សែការពារវ័យ២៦ ឆ្នាំខាងលើបានធ្វើឲ្យមានការចាប់អារម្មណ៍រួចទៅហើយដោយការបង្ហាញសមត្ថភាពដ៏ល្អរបស់គេ។
បើនិយាយពីភាពល្អប្រសើរបានដល់សព្វថ្ងៃគឺបានក្លឹប Tiger ជាអ្នកមានគុណរបស់គេ ដោយកាលរបួសនោះគេមានកូនចិត្តចង់បោះបង់អាជីពបាល់ទាត់ចោលទៅហើយ ពីព្រោះគេគិតថា បើជាសះស្បើយវិញក៏លេងមិនល្អដូចដើម ហើយណាមួយកុងត្រានៅ Tiger ក៏ជិតផុត។ ប៉ុន្តែដោយសារ Tiger បានលើកទឹកចិត្តដោយចេញលុយព្យាបាលទាំងអស់ ហើយថែមទាំងតកុងត្រាថ្មីឲ្យរហូតដល់ឆ្នាំ២០២៣ បានធ្វើឲ្យគេងាកមកប្រឹងប្រែងហ្វឹកហាត់ដោយខ្លួនឯងទាំងយប់ទាំងថ្ងៃ មិនគិតពីពេលសម្រាក ដើម្បីចង់តបស្នងទៅកាន់ Tiger ដែលផ្ដល់ឱកាសឲ្យខ្លួន។
ជារឿងដ៏ល្អ គេទទួលបានផ្លែផ្កាដូចបំណងអាចជួយ Tiger វិញដោយការចូលលេងបង្ហាញឲ្យប្រិយមិត្តមើលឃើញថា សមត្ថភាពរបស់ ពិសី មិនត្រឹមតែមិនធ្លាក់ចុះ ប៉ុន្តែបែជាល្អជាងមុនទៅទៀត ក្រោយពេលបាត់មុខពីទីលានដល់១ឆ្នាំដោយសាររបួសខាងលើ។
រំលឹកថា ៣ ប្រកួតរបស់ អង្គរ Tiger គឺឈ្នះ២ និងស្មើ១ប្រកួត ពោលគឺស្មើ ព្រៃវែង ១-១ ឈ្នះគីរីវង់ ២ -០ និងទើបឈ្នះ ទ័ព ៣-២ ៕