ក្លឹបមួយ សម្រេចចិត្តលេងតែ៧នាក់ ដោយសារកីឡាករកើតកូវីដ

2021-04-12 09:08:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ជារឿងភ្ញាក់ផ្អើលក្នុងលីគកំពូលរបស់ប្រទេសកូឡំុប៊ី ដោយសារតែមានក្រុមមួយបង្ខំចិត្តលេងទាំងកីឡាកររបស់ខ្លួនមានតែ៧នាក់ប៉ុណ្ណោះ។

កាលពីថ្ងៃអាទិត្យម្សិលមិញ ក្រុម Rionegro Aguilas បង្ខំចិត្តលេងជាមួយកីឡាករ៧នាក់។ ក្នុងនោះមានម្នាក់ជាអ្នកចាំទីបម្រុង បានដាក់ឲ្យលេងជាខ្សែការពារ ដោយសារកីឡាករក្នុងក្រុមមួយចំនួនធំកើតជំងឺកូវីដ-១៩ និងរបួស។

Rionegro Aguilas អវត្តមានកីឡាករដល់ទៅ២២នាក់ក្នុងជំនួបលេងក្នុងផ្ទះខ្លួនឯងស្វាគមន៍ក្រុម Boyaca Chico។ ទោះបីមានការតវ៉ាទៅកាន់លីគ ដើម្បីលុបចោលការប្រកួត តែ Rionegro Aguilas នៅតែបង្ខំចិត្តលេង។ ក្នុងក្រុម Rionegro Aguilas គេបានរកឃើញកីឡាករ១៦នាក់ផ្ទុកកូវីដ-១៩។

ត្បិតតែមានគ្នា៧នាក់មែន តែ Rionegro Aguilasអាចទប់ Boyaca Chico លទ្ធផល ០-០ រហូតដល់ជិត៦០នាទី។ ការប្រកួតរងចាំដល់នាទី៥៧ទើប Boyaca Chico រកបានគ្រាប់ដំបូង និង២គ្រាប់បន្ថែមនៅនាទីបន្តបន្ទាប់។ អំឡុងពេលប្រកួត មានកីឡាកររបស់ Rionegro ម្នាក់របួស។ ដោយសារកីឡាករមិនគ្រប់ចំនួន ក្រុមទាំងពីរចចារបញ្ចប់ការលេងត្រឹមនាទី៧៩ ជាលទ្ធផល Rionegro Aguilasចាញ់ Boyaca Chico ០-៣៕