Marcio ថាក្រុមលីគកម្ពុជានឹងមានការប្រជែងកាន់តែខ្លាំងក្នុងពេលខាងមុខ
- 2021-04-13 02:16:00
- ចំនួនមតិ 0 | ចំនួនចែករំលែក 0
Marcio ថាក្រុមលីគកម្ពុជានឹងមានការប្រជែងកាន់តែខ្លាំងក្នុងពេលខាងមុខ
ចន្លោះមិនឃើញ
ខ្សែប្រយុទ្ធក្លឹបណាហ្គាវើលដ៍ Marcio Marques បានបង្ហាញការយល់ឃើញថាលីគកំពូលកម្ពុជាបច្ចុប្បន្ន កំពុងតែមានការប្រកួតប្រជែងខ្លាំងពីក្លឹបខ្លាំងទាំង១៣ ហើយនឹងកាន់តែលំបាកនិងខ្លាំងក្លាថែមទៀត នៅរយៈពេលប៉ុន្មានឆ្នាំខាងមុខ។
បើយើងក្រឡេកមើលក្រុមនីមួយៗនាពេលបច្ចុប្បន្ន ពួកគេបាននាំចូលកីឡាករបរទេសល្អៗជាច្រើនមកពង្រឹងក្រុម តួយ៉ាងក្រុមអាស៊ីអឺរ៉ុបយូណាធីតមានកីឡាករបរទេស ៥នាក់ (ថ្មី៣នាក់) បឹកកេត ៥នាក់ (ថ្មីម្នាក់) អង្គរថាយហ្គឺរ ៥នាក់ (ថ្មីទាំង៥នាក់) ភ្នំពេញក្រោនមាន ៥នាក់ (ថ្មី៤នាក់) និងព្រះខ័នរាជស្វាយរៀងជាដើមមាន ៥នាក់ (ថ្មី២នាក់)។ វត្តមានកីឡាករបរទេស បូករួមនិងកីឡាករក្នុងស្រុកល្អៗ ធ្វើឱ្យការប្រកួតប្រជែងកាន់តែមានភាពស្វិតស្វាញ កាន់តែល្អមើលនិងជក់ចិត្ត។
ផ្អែកតាមការលើកឡើងខាងលើ និងការយល់ឃើញរបស់ខ្លួន ខ្សែប្រយុទ្ធសញ្ជាតិប្រេស៊ីលបានទម្លាយថា ៖«ទាក់ទងនឹង Metfone Cambodian League ខ្ញុំគិតថាលីគកាន់តែមានការប្រកួតប្រជែងខ្លាំង និងលំបាក ហើយខ្ញុំក៏ជឿដែរថានៅប៉ុន្មានឆ្នាំខាងមុខទៀត ក្រុមទាំងអស់នៅលីគកំពូលកម្ពុជានឹងមានការប្រកួតប្រជែងកាន់តែខ្លាំងឡើងៗ»។
មិនតែប៉ុណ្ណោះ Marcio បានសម្ដែងអារម្មណ៍រីករាយ ដែលបានលេងឱ្យណាហ្គាវើលដ៍ ព្រោះម្ចាស់ជើងឯកលីគ៣សម័យកាល ជាក្រុមមួយចាស់ទុំ ខ្លាំងក្លា និងល្អនៅលីគកំពូលកម្ពុជា។ តាមរយៈការប្រឹងប្រែងរបស់ក្រុមទាំងមូល Marcio ជឿជាក់ថា ពួកគេនឹងមានការប្រកួតប្រជែងដ៏អស្ចារ្យ និងអាចឈានទៅការលើកពាននារដូវកាលនេះទៀតផង។
ឆ្នាំ២០២១ជារដូវកាលទី២ហើយ ដែលខ្សែប្រយុទ្ធសញ្ជាតិប្រេស៊ីល Marcio Marques លេងឱ្យក្លឹបនិយមលេងការពារច្រើន និងវាយបកភ្លាមៗ ណាហ្គាវើលដ៍៕