Kim Jung Hyun ព្រមសុំទោសផ្ទាល់ជាសាធារណៈ ចំពោះទង្វើធ្វើដាក់ក្រុមការងាររឿង ពិសេស Seohyun
- 2021-04-14 09:28:25
- ចំនួនមតិ 0 | ចំនួនចែករំលែក 0
Kim Jung Hyun ព្រមសុំទោសផ្ទាល់ជាសាធារណៈ ចំពោះទង្វើធ្វើដាក់ក្រុមការងាររឿង ពិសេស Seohyun
ចន្លោះមិនឃើញ
បន្ទាប់ពីរឿងរ៉ាវបានកើតឡើងផ្ទួនៗគ្នាមក ពេលនេះតារាសម្ដែង Kim Jung Hyun បានចេញសុំទោសជាសាធារណៈ តាមរយៈសំបុត្រសរសេរដោយដៃផ្ទាល់ទៅកាន់អ្នកគាំទ្រ ក្រុមអ្នកដឹកនាំរឿង ក្រុមការងារថតទាំងអស់ ព្រមទាំងដៃគូសម្ដែង ដ៏ដូចជាក្រុមហ៊ុនរបស់លោកផង។
ទោះបីអ្វីដែលបានកើតឡើងពេលថតរឿង «Time» បានកន្លងផុតតាំងពីឆ្នាំ ២០១៨ បុន្តែមហាជនបានលើកមកពិភាក្សាជាថ្មីរហូតក្លាយជាប្រធានបទក្ដៅគគុកនៅប៉ុន្មានថ្ងៃនេះ។ ដោយក្នុងនោះមហាជនភាគច្រើនកើតទុក្ខមិនសុខចិត្តចង់ឲ្យ Kim Junghyunចេញសុំទោសផ្ទាល់ចំពោះ Seohyun ដែលត្រូវរងទង្វើព្រងើយកន្តើយស្របពេលពួកគេសម្ដែងរឿងរួមគ្នា និងទង្វើអសីលធម៌ផ្សេងទៀត ហើយតាមព័ត៌មានល្បីថា អ្វីដែលប្រព្រឹត្តិទាំងនេះគឺដោយសារ Seo Yeji ដែលកាលនោះជាសង្សាររបលោកជាអ្នកបញ្ជាពីក្រោយ។
ទោះជាយ៉ាងណា ពេលនេះ Kim Jung Hyun បានចេញលិខិតសុំទោសជាផ្លូវការហើយ ដែលលិខិតនេះលោកសរសេរដោយដៃផ្ទាល់ ជាការទទួលកំហុសគ្រប់យ៉ាងដែលខ្លួនបានធ្វើ។ ខ្លឹមសារក្នុលិខិតនោះមានដូចតទៅ៖
«សូមជម្រាបសួរ! ខ្ញុំគឺ Kim Jung Hyun! ដោយសាររឿង "Time” គឺជារឿងដំបូងដែលខ្ញុំទទួលតំណែងជាតួឯក ហើយវាក៏ជាការងារពិសេសសម្រាប់់ខ្ញុំដែរ។ ប៉ុន្តែទោះជាយ៉ាងណា ខ្ញុំបែរជាធ្វើឲ្យមានការឈឺចាប់ និងការខកចិត្តធំចំពោះអ្នកដឹកនាំរឿង អ្នកនិពន្ធ ក៏ដូចជាតួសម្ដែងរួមជាមួយខ្ញុំ ព្រមទាំងក្រុមការងារទាំងអស់ទៅវិញ។ ឲ្យខ្ញុំសុំទោស។
សន្និសីទកាសែតរបស់រឿង "Time” ក៏នៅតែក្លាយជាបំណែកក្នុងការចងចាំរបស់ខ្ញុំដែរ។ ទង្វើខ្ញុំពេលនោះ គឺជាអ្វីដែល សូម្បីខ្ញុំខ្លួនឯងក៏មិនអាចលើកលែងទោសឲ្យដែរ។ ជាអ្វីដែលខ្ញុំសោកស្ដាយខ្លាំងម្ដងហើយម្ដងទៀត ហើយបើអាចខ្ញុំចង់ទាញបង្វិលពេលឲ្យត្រឡប់ណាស់។
អាស្រ័យលើបញ្ហាផ្ទាល់ខ្លួន ខ្ញុំបានបង្កបញ្ហាច្រើនដោយស្មានមិនដល់។ ខ្ញុំបានធ្វើឲ្យមានកំហុសសម្រាប់ទំនួលខុសត្រូវ ក្នុងនាមជាតួឯក និងក្នុងនាមជាតារាសម្ដែង។ ខ្ញុំសុំទោស ដោយមិនយកលេសអ្វីមកការពារទាំងអស់។
ចំណែកពេលដែលខ្ញុំឈប់សម្ដែងរឿង ក៏ដូចជាទង្វើដែលខ្ញុំបានធ្វើក្នុងសន្និសីទកាសែត សុទ្ធតែជាកំហុសរបស់ខ្ញុំទាំងអស់។ ខ្ញុំមិនចង់ត្រឹមតែសុំទោសចំពោះ តារាសម្ដែង Seohyun អ្នកដែលរងការឈឺចាប់ដោយសាររឿងនេះទេ ប៉ុន្តែក៏សុំទោសដល់គ្រប់គ្នាដែលជាប់ពាក់ព័ន្ធ អ្នកដែលជយបរឿងទាំងអស់នៅពេលនោះ។
ខ្ញុំគិតថា ខ្ញុំត្រូវតែស្វែងរកបុគ្គលម្នាក់ៗ និងអ្នកគ្រប់គ្នាដែលជាប់ពាក់ព័ន្ធនឹងរឿង "Time” អ្នកដែលទទួលការឈឺចាប់ ឬក៏ទទួលនូវការគំរាមកំហែង ដោយសាររូបខ្ញុំទាំងអស់នោះឲ្យឃើញហើយ ហើយខ្ញុំចង់សុំទោសផ្ទាល់ទៅកាន់ពួកគេ។ ទោះបីត្រូវការពេលយូរមែន តែខ្ញុំនឹងរកអ្នកដឹកនាំរឿង អ្នកនិពន្ធ តារាសម្ដែង និងក្រុមការងាររឿង "Time” ហើយសុំការអភ័យទោសពីពួកគេ។
ខ្ញុំក៏ចង់សុំការអភ័យទោសចំពោះ ក្រុមហ៊ុនខ្ញុំគឺ O& Entertainment ក៏ដូចជា Culture Depot ផងដែរ ដែលត្រូវមកជួបរឿងនេះដោយស្មានមិនដល់។ ខ្ញុំក៏ចង់សុំទោសអស់ពីចិត្ត ទៅកាន់អ្នកគាំទ្រទាំងអស់ ដែលតែងលើកទឹកចិត្តខ្ញុំ និងរង់ចាំការបកស្រាយរបស់ខ្ញុំ។
ខ្ញុំសុំឱនក្បាលគោរព និងសុំការអភ័យទោស ចំពោះគ្រប់គ្នា ដែលជួបប្រទះបញ្ហាមិនស្រួលចិត្ត ដោយសារតែខ្ញុំ។ ការសរសេរលិខិតមួយនេះ ក៏ជាពេលដែលខ្ញុំត្រូវក្រឡេកទៅក្រោយមើលកំហុសរបស់ខ្ញុំ ក៏ដូចជាទង្វើអសីលធម៌កន្លងមកដែរ។ ខ្ញុំនឹងប្រឹងប្រែង ដើម្បីក្លាយជាតារាសម្ដែងដែលមានសុខភាពល្អ ដែលមិនឆ្លៀតឱកាសគិតតែពីខ្លួនឯងទេ ហើយខ្ញុំនឹងគ្រប់គ្រងខ្លួនឯងឲ្យបានល្អជាងនេះ។ ខ្ញុំសុំទោស។»