ទីបំផុតឯកឧត្តម ម៉ៅ អាយុទ្ធ បានមកដល់ផ្ទះហើយ ដោយមកជាធាតុ១កោដិ មើលហើយសែនស្រណោះ

2021-04-17 11:21:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ធាតុឯកឧត្តម ម៉ៅ អាយុទ្ធ ត្រូវបានក្រុមគ្រួសារយកមកដល់គេហដ្ឋានហើយ បន្ទាប់ពីក្រុមគ្រូពេទ្យបានធ្វើពិធីបូជារួចរាល់តាមរបៀបអ្នកជំងឺកូវីដ១៩។

ព័ត៌មាននេះ ត្រូវបានបញ្ចេញដោយលោក សុខ រ៉ាស៊ី សិល្បករម្នាក់ដែលមានអនុស្សាវរីយខ្លះៗជាមួយឯកឧត្តម ម៉ៅ អាយុទ្ធ ព្រឹទ្ធាចារ្យសិល្បៈ ដែលទទួលបានការគោរពស្រឡាញ់ចិត្តយ៉ាងច្រើនពីសិល្បករជំនាន់ក្រោយ។ លោក រ៉ាស៊ី បានសរសេរថា "ទីបំផុតធាតុ រប់ស លោកអ៊ុំ ម៉ៅ អាយុទ្ធ បានមកដល់ គេហដ្ធានហើយ! ដោយមិនអាចរៀបចំ ពិធីបុណ្យសពបាន គ្រួសារលោកអ៊ុំ សម្រេចចិត្តរៀបចំ ជាលក្ខណៈគ្រួសារ!”។

ជាមួយគ្នា គេឃើញរូបភាពប៉ុន្មានសន្លឹក ត្រូវបានភ្ជាប់មកជាមួយ ដោយឃើញស្ត្រីវ័យកណ្ដាលម្នាក់ដែលគេដឹងថាជាកូនស្រីរបស់ឯកឧត្តមឈ្មោះ ម៉ៅ មុន្នីរតន៍ និងក្រុមគ្រួសារ ២ ៣នាក់ ធ្វើពិធីអុជធូបថ្វាយរំលឹកដល់វិញ្ញាណក្ខន្ធ អ្នកមានគុណដែលបានចែកឋានរំលាយកាយ ដោយសារជំងឺកាចសាហាវកាលពីប៉ុន្មានថ្ងៃនេះទាំងនឹកស្មានមិនដល់។ ជាមួយគ្នាក៏មានសិល្បករ អ្នកដឹកនាំរឿង ខ្លះទៀតបានចូលមកសរសេរសាររំលែកទុក្ខដល់គ្រួសារនៃសព និងបង្ហាញពីការគោរពរបស់ពួកគេចំពោះព្រឹទ្ធចារ្យសិល្បៈរូបនេះ។

លោក យឹម សុសត្យា អតីតអ្នកគ្រប់គ្រងការផលិតរបស់ផលិតកម្ម រ៉ក់ បានសរសេរថា "លោកជារៀមច្បងក្នុងវិស័យសិល្បៈ និងជាគ្រូរបស់ខ្ញុំ ខ្ញុំសូមចូលរូមរំលែកទុក្ខដ៏ក្រៀមក្រំនេះជាមួយគ្រួសារ និងមានតែក្ដីសោកសៅក្រៃលែងតែមិនអាចថ្លែងបាន ”។

ឯកឧត្តម ម៉ៅ អាយុទ្ធ ត្រូវបានក្រុមគ្រួសារនាំយកទៅសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត ហៅពេទ្យរុស្សី កាលពីថ្ងៃទី ៥ មេសា ដោយសារឯកឧត្តមមានការអាការខ្សោយខ្លាំង ស្របពេលឯកឧត្តមមានវ័យដល់ទៅ ៧៧ឆ្នាំហើយ។ ២ថ្ងៃបន្ទាប់ ព្រឹទ្ធាចារ្យសិល្បៈរូបនេះ ត្រូវបានរកឃើញវិជ្ជមានកូវីដ១៩ ដែលបានធ្វើឲ្យសាច់ញាតិ និងសិល្បករទាំងឡាយដែលធ្លាប់មានភាពជិតស្និទ្ធ មានការព្រួយបារម្ភ។

រូបភាព៖ ហ្វេសប៊ុក សុខ រ៉ាស៊ី

ដំបូងឯកឧត្តម ត្រូវបានយកទៅដាក់ក្នុងបន្ទប់សង្គ្រោះបន្ទាន់ តែនៅរសៀលថ្ងៃទី ៧មេសា មានព័ត៌មានឮថា ឯកឧត្តមបានធូរស្រាល ហើយត្រូវបានក្រុមគ្រូពេទ្យយកចេញពីបន្ទប់សង្គ្រោះបន្ទាន់វិញ។ ឯកឧត្តមបានតស៊ូនឹងការយាយីរបស់មេរោគកំណាចបាន១សប្ដាហ៍ ស្របពេលមានដំណឹងពីគ្រូពេទ្យថា ប្រសិនបើឯកឧត្តមអាចតស៊ូបាន ៣ថ្ងៃទៀត នឹងឆ្លងផុតគ្រោះអាក្រក់ហើយ។

ប៉ុន្តែគួរឲ្យស្ដាយ នៅរសៀលថ្ងៃទី ១៦ មេសា ឯកឧត្តម ក៏បានចែកឋានទៅ ដោយបានធ្វើឲ្យមានការតក់ស្លុតក្នុងចង្កោមសិល្បករ និងមិត្តរួមអាជីព រួមការងារជាច្រើនទៀត ព្រោះថា ឯកឧត្តម គឺជាធនធានសិល្បៈដ៏ល្អកម្ររកបានក្នុងជាង ៣ទសវត្សរ៍កន្លងមកនេះ៕

អត្ថបទ៖ ទារិកា