ស្គាល់មុខហើយស្មាត់ រ៉ន ល្បីល្អមួយចប់ទាំងការបាំង ចាប់សេវារឹង ម៉ាត់ និងសារ៉េជើងក្រោម

2021-05-10 02:20:09
ចំនួនមតិ 0 | ចំនួនចែករំលែក 0

ចន្លោះមិនឃើញ

បើតាមការឱ្យដឹងពីប្រភពដ៏ទុកចិត្តមួយលោក ចាន់ សារ៉ន ហៅស្មាត់រ៉ន លេងបាល់ទះល្អមួយចប់ទាំងការធ្វើរនាំង ការចាប់សេវា ការម៉ាត់ និងសារ៉េជើងក្រោម ហើយលោកចាប់ផ្ដើមលេងឡើងក្នុងអំឡុងឆ្នាំ២០០៩។

បាល់ទះក្រៅផ្លូវការ

ចំពោះឆ្នាំលេងឡើងនេះដែរអតីតកីឡាករក្លឹបកងពលធំអន្តរាគមន៍លេខ១១ ចាន់ សារ៉ន បានឱ្យ Sabay ដឹងតាមរយៈប្រអប់សារហ្វេសប៊ុកថា លោកចាប់ផ្ដើមលេងឡើងតាំងពីឆ្នាំ២០០៩ និងលេងល្អបំផុតនៅឆ្នាំ ២០១០ ២០១១ និង ២០១២។

ការប្រកួតាបាល់ទះក្រៅផ្លូវការ ស្មាត់កម្ពស់១,៧៨ម៉ែត្រមកពីខេត្តកំពត លេងមិនសូវតឱ្យគូប្រជែងប៉ុន្មានឡើយដោយច្រើនចាប់គូស្មើ ព្រោះមានអ្នកលេងល្អៗច្រើនជំនាន់នោះ។

អេគីបដ៏យល់ចិត្តដំបូងរបស់លោកមានលោក សោម ភក្ដី ហៅស្មាត់ហ៊ុប លោក ទិត្យ វណ្ណា ហៅតាទន្លេ និងលោកព្រីង។ ក្រោយៗមកទើបមានអេគីបថ្មីដូចជាស្មាត់ហ៊ុប លោកគ្រូ សោម ចំណាប់ លោក កែម រតនា ហៅកូនឪ និងលោក ពេជ្រ សុន។

ក្នុងការប្រកួតមិនអាជីព លោកសារ៉នជាស្មាត់ធំល្អមួយរូប ដែលអាចឡើងវ៉ៃខាងឆ្វេង-ស្ដាំបានយ៉ាងល្អ ជាពិសេសការធ្វើរនាំងរបស់លោកក៏ល្អមិនធម្មតាដែរ។

ប្រវត្តិបាល់ទះអាជីព

លោក ចាន់ សារ៉ន ជាអតីតកីឡាកររបស់ក្លឹបកងពលធំអន្តរាគមន៍លេខ១១ ធ្លាប់ជួយក្លឹបមួយនេះបានចំណាត់ថ្នាក់លេខ២ ក្នុងការប្រកួតដណ្ដើមពានរង្វាន់កងទ័ពនៅឆ្នាំ២០០៦ ដែលកាលនោះលោកលេងតំណែងអ្នកប៉ះសេ និងបានប្ដូរមកតំណែងស្មាត់ ក្រោយចេញពីកងពលធំ។

ចេញពីកងពលលោកបានចូលរួមជាមួយក្លឹប កងរាជអាវុធហត្ថលើផ្ទៃប្រទេស (មិនបានពាន) ក្លឹបឆ័ត្រយោង៩១១ (មិនបានពាន) និងក្លឹបក្រសួងការពារជាតិ ជួយឱ្យក្លឹបមួយនេះបានចំណាតថ្នាក់លេខ៣នៅខេត្តពោធិ៍សាត់ ប៉ុន្តែមិនចាំឈ្មោះថាពានរង្វាន់ និងឆ្នាំប្រកួតឡើយ។

ចូលលេងបាល់អាជីព រហូតមានឈ្មោះល្បីល្បាញ លោកចាន់ សារ៉ន តាមរយៈ Sabay សូមបង្ហាញការដឹងគុណដល់អ្នកពាក់ព័ន្ធទាំងអស់ ជាពិសេសលោកគ្រូរបស់ក្លឹបក្រសួងមហាផ្ទៃ ជុំ រដ្ឋា លោកគ្រូ អ៊ុំ សុខ និងលោកគ្រូ យុង សុខុម ដែលបានបណ្ដុះបណ្ដាលរូបលោកឱ្យក្លាយជាកីឡាករល្អ និងមានកេរ្តិ៍ឈ្មោះមួយរូបនាអំឡុងពេលនោះ៕

អត្ថបទ៖ អ៊ុំ សុភក្តិ