ឥន្ទ្រីពិឃាដឌូកសង្ឃឹមថា ក្រុមបាល់ទះឆ្នេរខ្សាច់កម្ពុជាឆ្នាំនេះនឹងល្អជាងស៊ីហ្គេម២០១៩

2021-05-12 02:32:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ជម្រើសជាតិឆ្នេរខ្សាច់ផ្នែកបុរស ជុក សោភា ហៅឥន្ទ្រីពិឃាដឌូកបានលើកឡើងថា សមត្ថភាពក្រុមជម្រើសជាតិបាល់ទះឆ្នេរខ្សាច់របស់កម្ពុជាឆ្នាំនេះនឹងល្អជាងស៊ីហ្គេមឆ្នាំ២០១៩ នៅប្រទេសហ្វីលីពីន ព្រោះពួកគេបានត្រៀមខ្លួនរួចជាស្រេចហើយ។

ជុក សោភា និង ធី ម៉េងហួង ហ្វឹកហាត់ត្រៀមស៊ីហ្គេមឆ្នេរខ្សាច់ឆ្នាំ២០១៩

ជុក សោភា ដែលត្រូវសហព័ន្ធទើបកោះហៅចូលជម្រើសជាតិកាលពីពេលថ្មីៗ បានបញ្ជាក់បែបនេះ ៖«ឆ្នាំនឹងដូចជាយើងមាន២ធីម អាចនឹងបានលទ្ធផលល្អជាងឆ្នាំ២០១៩...យើងប្រឹងប្រែងទាំងអស់គ្នា បើមិនបានអីក៏បានឈ្នះ២ប្រទេស៣ប្រទេសដែរ»។

លើកឡើងដូច្នេះដោយសារឆ្នាំនេះ ឌូកមើលឃើញក្រុមឆ្នេរខ្សាច់កម្ពុជាមានកីឡាករល្អៗដូចជា ធី ម៉េងហួង អ៊ឹម ណារិទ្ធ សំ សាមីត ថុន លាបហេង និង ពេជ សុផុន ដោយពួកគេបាននឹងកំពុងប្រឹងប្រែងហ្វឹកហាត់នៅផ្ទះរៀងខ្លួន បើទោះកម្ពុជាកំពុងជួបវិបត្តិជំងឺកូវីដ-១៩យ៉ាងណាក្ដី។

ស្មាត់ធំមកពីក្លឹបកងពលធំអន្តរាគមន៍លេខ៣ បានសម្ដែងអារម្មណ៍រីករាយដែលសហព័ន្ធបានផ្ដល់ឱកាសជាថ្មី ហើយគេប្ដេជ្ញាខំប្រឹងឱ្យអស់ពីសមត្ថភាពដើម្បីជាប់ជម្រើស៤នាក់ ទៅប្រកួតស៊ីហ្គេមលើកទី៣១ នៅទីក្រុងហាណូយប្រទេសវៀតណាម។

កីឡាករមកពីខេត្តព្រៃវែងប្រាប់ទៀតថា ៖«មានអារម្មណ៍សប្បាយចិត្ត ព្រោះខាងសហព័ន្ធមើលឃើញសមត្ថភាព និងទេពកោសល្យរបស់យើង ហើយជម្រើស៤នាក់ដែលត្រៀមនៅស៊ីហ្គេមហ្នឹង ខ្ញុំអាចសង្ឃឹម៨០% ព្រោះអីយើងមានបទពិសោធ សមត្ថភាព និងឆ្លងកាត់ការប្រកួតច្រើន។ អ៊ីចឹងយើងនឹងប្រឹងប្រែងហ្វឹកហាត់ ដើម្បីត្រៀមលក្ខខណៈយកជម្រើស៤នាក់នេះ»។

បើសិនជាជាប់ជម្រើស៤នាក់ ការចាប់ដៃគូលេងឌូកមិនទាន់ច្បាស់ថាត្រូវលេងជាមួយម៉េងហួង ឬកីឡាករផ្សេងទៀតឡើយ អាស្រ័យលើការហ្វឹកហាត់ជាមួយគ្នា និងការមើលឃើញរបស់ក្រុមគ្រូបង្វឹកទៅតាមភាពជាក់ស្ដែង។

ព្រឹត្តិការណ៍កីឡាស៊ីហ្គេមឆ្នាំ២០១៩ ជុក សោភា បានជាប់ជម្រើសជាតិម្ដងរួចមកហើយ ខណៈឆ្នាំ២០២០មិនបានជាប់ឡើយ ដោយគេអះអាងថាទុកឱកាសឱ្យក្មេងៗជំនាន់ក្រោយម្ដង៕

អត្ថបទ៖ អ៊ុំ សុភក្តិ