ទីបំផុត! Zidane បកស្រាយពីមូលហេតុ ដែលលាចេញពី Real Madrid ជាលើកទី២

2021-05-31 10:50:14
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Zinedine Zidane គ្រូបង្គោលក្លឹប Real Madrid បានសរសេរសំបុត្របើកចំហមួយជូនទៅកាន់អ្នកគាំទ្រ Real Madrid តាមរយៈកាសែត AS របស់អេស្ប៉ាញ។ ក្នុងខ្លឹមសារសំបុត្រនោះគឺ មូលហេតុដែលលោកចាកចេញពី Real Madrid លើកនេះគឺ ដោយសារតែក្លឹបអស់ជំនឿចិត្តលើលោក។

លោកបានសរសេរថា៖ "កាលពីខែឧសភា ឆ្នាំ២០១៨ ខ្ញុំបានចាកចេញពីក្លឹប ដោយសារតែខ្ញុំគិតថា ក្លឹបត្រូវការវិធីសាស្ត្រថ្មី ដើម្បីបន្តនៅកម្រិតដ៏ខ្ពស់ដដែល។ ប៉ុន្តែលើកនេះមានភាពផ្សេងគ្នា ខ្ញុំចាកចេញក៏ដោយសារតែ ក្លឹបលែងមានជំនឿចិត្តលើខ្ញុំ ហើយលែងគាំទ្រក្នុងការបង្កើតផែនការសម្រាប់រយៈពេលមធ្យម និងរយៈពេលវែង"។

ជាមួយគ្នានេះ លោកក៏បានប្រាប់ត្រង់ៗថា អារម្មណ៍របស់បុគ្គលិក និងក្រុមកីឡាករមិនត្រូវបានខាងក្លឹបយកចិត្តទុកដាក់ឲ្យដិតដល់នោះទេ ពោលគឺខាងក្លឹបត្រូវការតែជ័យជម្នះប៉ុណ្ណោះ។

លោកបានបន្តថា៖ "នៅសព្វថ្ងៃនេះ គ្រូបង្វឹកនៅក្លឹបធំៗដឹកនាំបានយ៉ាងច្រើនតែ ២ឆ្នាំនោះទេ។ ដើម្បីឲ្យដឹកនាំបានយូរបាន ចាំបាច់ត្រូវតែគិតគូរលើទំនាក់ទំនងរវាងមនុស្ស និងមនុស្ស។ វាមានភាពសំខាន់ជាងលុយ សំខាន់ជាងភាពល្បីឈ្មោះ និងសំខាន់ជាងអ្វីៗគ្រប់យ៉ាង"។

សូមជម្រាបផងដែរថា លោក Zinedine Zidane បានប្រឡូកនៅជាមួយក្លឹប Real Madrid តាំងពីជំនួយការគ្រូបង្គោលឈុតធំ គ្រូបង្វឹកក្លឹបយុវជនថ្នាល និងចុងក្រោយជាគ្រូបង្គោលឈុតធំតែម្ដង។ លោកដឹកនាំ Real Madrid លើកទី១ ពីឆ្នាំ២០១៦ ដល់ឆ្នាំ២០១៨ និងលើកទី២ ពីឆ្នាំ២០១៩ ដល់ឆ្នាំ២០២១៕

ប្រភព៖ AS English ប្រែសម្រួល៖ ហ៊ីម រស្មី