ដំណឹងល្អ! បិសាចសឺវីស រ៉ាអង្គរក្ស ប្រកាសបើកបង្ហាត់សិស្ស យកប្រាក់ឈ្នួលតែ៥ពាន់រៀលប៉ុណ្ណោះ

2021-08-04 08:02:15
ចំនួនមតិ 0 | ចំនួនចែករំលែក 0

ចន្លោះមិនឃើញ

នេះជាដំណឹងល្អមួយសម្រាប់ក្មេងៗជំនាន់ក្រោយ ដែលមានបំណងចង់ហាត់បាល់ទះ ព្រោះស្មាត់ ម៉ុន តារា រហស្សនាមបិសាចសឺវីសថ្មីៗនេះ បានប្រកាសបើកបង្ហាត់សិស្សនៅខេត្តតាកែវ។

កីឡាករប្រចាំក្លឹបបញ្ជាការដ្ឋានអង្គរក្ស បានបង្ហោះសារលើហ្វេសប៊ុកខ្លួនកាលពីម្សិលមិញថា ៖«ខ្ញុំជាកីឡាករជម្រើសជាតិបាល់ទះកាលពីឆ្នាំ២០១២ រហូតដល់ ២០១៧ ឥឡូវខ្ញុំបាទទទួលបង្ហាត់សិស្សហើយស្អែកនេះ នៅភូមិជ្រោយ ស្រុកគិរីវង់ ខេត្តតាកែវ អាចមកចុះឈ្មោះហាត់បានបងប្អូនហ្វេនៗ បើចង់អោយខ្លួនឯងចេះលេងបាល់ខ្លាំងមួយរូប។ ទឹកប្រាក់ហាត់មិនយកច្រើនទេបងប្អូន ម្នាក់តែ៥០០០៛ប៉ុណ្ណោះ ដូចអោយកាហ្វេគ្រូចឹង ផ្ដល់បទពិសោធ»។

តាមការអោយដឹងពីស្មាត់ធំខាងលើ តារាងបាល់ទះរបស់លោកបានធ្វើរួចរាល់ហើយ ប៉ុន្តែជាតារាងដីបាំងសំណាញ់ក្នុងលំហរធម្មតាប៉ុណ្ណោះ ព្រោះលោកមិនទាន់មានលទ្ធភាព បើកតារាងស្តង់ដារឡើយ។ ថ្ងៃអនាគតលោកសង្ឃឹមថា នឹងមានលទ្ធភាពបើកតារាងមានដំបូលមួយសម្រាប់ចែករំលែកចំណេះដឹងបាល់ទះ រីឯថ្លៃឈ្នួល៥ពាន់រៀល គឺគ្រាន់តែទុកទិញទឹកអោយក្មេងៗប្រើប្រាស់ប៉ុណ្ណោះ។

តារាងបាល់ទះស្មាត់រ៉ា

ស្មាត់ដដែលបញ្ជាក់ថា ៖«ខ្ញុំបើកបង្ហាត់សិស្សនេះ មិនយកថ្លៃបង្ហាត់ថ្លៃអីនោះទេ ព្រោះថ្លៃយក៥ពាន់ហ្នឹងកុំអីក៏មិនយកដែរ តែយកសម្រាប់ទឹកព្រោះគាត់មកហាត់ចប់ គាត់ក៏បានប្រើទឹកប្រើអីចឹងទៅ ចឹងចំពោះបង្ហាត់នេះគឺអត់យកអីតែម្ដង...ចំពោះការហាត់ខ្ញុំមានតែការស្រលាញ់ ហើយមានបទពិសោធច្រើន ចឹងអត់ទុកបទពិសោធចោលទេ ក៏សម្រេចចិត្តថាប្រគល់អោយប្អូនៗក្មេងៗស្រករក្រោយដែលគាត់ស្រលាញ់វិស័យបាល់ទះ»។

ដូច្នេះសម្រាប់អ្នកដែលស្រលាញ់វិស័យកីឡាបាល់ទះ ក៏ដូចជាហ្វេនរបស់ស្មាត់រ៉ាផ្ទាល់អាចទាក់ទងទៅកាន់ហ្វេសប៊ុករបស់លោកផ្ទាល់ Da Ra មាន Profile រូបលោកឈរក្បែរឡាន។

គួរបញ្ជាក់ថាស្មាត់ ម៉ុន តារា ជាអតីតជម្រើសជាតិដែលមានឈ្មោះបោះសំឡេង ហើយក៏ជាស្មាត់ខ្លាំងលេងបាល់ក្រៅផ្លុវការមួយរូបផងដែរ។ ម៉ុន តារា ជាកីឡាករមកពីក្លឹបបញ្ជាការដ្ឋានអង្គរក្ស មានវ័យ៣២ឆ្នាំ កម្ពស់១,៩៣ម៉ែត្រ និងទម្ងន់៨៣គីឡូក្រាម៕