ល្អណាស់!បិសាចសឺវីស រ៉ា អង្គរក្សបង្ហាត់សិស្សកំណត់មិនឲ្យបោកឬប៉ះសេជាប់ដៃឡើយ

2021-08-05 02:35:12
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីតស្មាត់ជម្រើសជាតិកម្ពុជា ឬត្រូវបានគេស្គាល់ថា បិសាចសឺវីស រ៉ា អង្គរក្សដែលឈ្មោះពិតប្រាកដហៅថា ម៉ុន តារា បានចាប់ផ្ដើមបង្ហាត់សិស្សកាលពីម្សិលមិញនេះនៅទឹកដីគីរីវង់ខេត្តតាកែវ ក្នុងការហ្វឹកហាត់នេះអតីតកីឡាកររបស់បញ្ជាការដ្ឋានអង្គរក្សកំណត់ថាមិនបង្ហាត់របៀបបោកឬការលេងប៉ះសេជាប់ដៃដែលអាចប៉ះពាល់ដល់វិស័យបាល់ទះនៅកម្ពុជា។

កីឡាករជំនាញវ៉ៃសេវាធ្ងន់រូបនេះបានឲ្យដឹងថា ជាការពិតការបង្ហាត់នេះមិនបានកំណត់អាយុឬកម្ពស់អ្វីឡើយ ប៉ុន្តែបើសិនក្មេងៗដែលចង់ចេះលេងពិតប្រាកដលោកនឹងបង្ហាត់ឲ្យត្រូវតាមស្តង់ដារ ពោលគឺត្រូវតាមក្បួនច្បាប់របស់បាល់ទះលើក្ដារតែម្ដង។ ចំណែកចាស់ៗដែលចង់ហាត់យកសុខភាពក៏អាចចូលរួមបាន។

ដើមហេតុនៃការគិតចង់បង្ហាត់សិស្សដោយខ្លួនឯងនេះគឺ ដោយសារលោកចង់ឲ្យកម្ពុជាសម្បូរទៅដោយកីឡាករល្អៗ ទៅដល់ទីណាក៏មានអ្នកខ្លាំង។ មួយវិញទៀតនៅពេលតាមភូមិស្រុកមានការបង្ហាត់វាក៏អាចជួយជំរុញឲ្យវិស័យមួយនេះដើរទៅមុខបានមួយកម្រិតផងដែរ។

រំលឹកថា កន្លងមកមានប្រិយមិត្តបាល់ទះមួយចំនួនធំបានមានការមិនសូវជាពេញចិត្តឡើយ នៅពេលឃើញការលេងជាប់ៗដៃ ហើយថែមទាំងស្ថិតក្រោមការផ្សាយលើបណ្ដាញសង្គម ដែលមើលទៅវាបានសាបព្រួសចាក់ឬសដល់ក្មេងៗជំនាន់ក្រោយ។ យ៉ាងណាដោយសារការមើលឃើញចំណុចអវិជ្ជមានខាងលើស្មាត់ រ៉ា ក៏បានកំណត់ថាទោះការហ្វឹកហាត់នៅកម្រិតតាមភូមិស្រុកក្ដីក៏មិនតម្រូវឲ្យក្មេងៗរៀនលេងជាប់ដៃឬចាប់បោកឡើយ៕