Girls' Generation តែងរង់ចាំឱកាសចេញបទជុំគ្នា ជាពិសេសនៅឆ្នាំក្រោយ ចំខួប ១៥ឆ្នាំ
- 2021-09-03 02:27:22
- ចំនួនមតិ 0 | ចំនួនចែករំលែក 0
Girls' Generation តែងរង់ចាំឱកាសចេញបទជុំគ្នា ជាពិសេសនៅឆ្នាំក្រោយ ចំខួប ១៥ឆ្នាំ
ចន្លោះមិនឃើញ
ពេលចូលរួមកម្មវិធី «You Quiz On The Block» សមាជិក Girls’ Generation ពិតជាបង្កការភ្ញាក់ផ្អើលខ្លាំងដល់អ្នកគាំទ្រ ព្រោះតែនេះជាការជួបជុំគ្នាលើកដំបូងលើកម្មវិធីទូរទស្សន៍ ក្រោយពួកស្ងាត់ការងារក្រុម ដោយសារការងាររៀងខ្លួន។
ស្របពេលជជែកគ្នាលេងពីនេះពីនោះ សមាជិកទាំង ៨ក៏បាននិយាយពីអ្នកគាំទ្រដែលតែងចង់ដឹង ថាតើពេលណាក្រុមវិលមកជុំគ្នា?
ពិធីករបានសួរសាមីខ្លួនទាំង ៧ដែរថាតើ ពួកគេមានគម្រោង ចេញបទចម្រៀងជាក្រុមឬអត់នាពេលអនាគត? ឆ្លើយតបនឹងរឿងនេះ YoonA បាននិយាយថា៖ «យើងតែងតែលើកយករឿងនេះមកនិយាយ យើងតែងតែបើកចិត្តរហូត»។
ពេលឮហើយ ពិធីករ Yoo Jaesuk បន្លឺ៖ «ខ្ញុំគិតថា ដោយសារគ្រប់គម្រប់ខួប ១៥ឆ្នាំនៅឆ្នាំក្រោយ វាអាចជារឿងល្អបំផុតបើអ្នកធ្វើអ្វីមួយជាមួយគ្នា»។
Sunny តបថា៖ «ខ្ញុំគិតថា យើងនឹងធ្វើហើយអ៊ីចឹង ដោយសារបងប្រុសនិយាយបែបហ្នឹងទៅហើយ»។
អ្វីដែលបានលើកឡើងនេះ បានផ្ដល់ជាក្ដីសង្ឃឹមសម្រាប់អ្នកគាំទ្រទាំងអស់ ព្រោះយ៉ាងណាទោះបីជាមិនទាន់មានការបញ្ជាក់ផ្លូវការ ប៉ុន្តែអាចជាតម្រុយនៃការត្រឡប់មកវិញ៕