នៅពីក្រោយការត្អូញត្អែររឿងប្រាក់ចំណូលរបស់អ្នកសិល្បៈជាច្រើន តារាពីរដួងនេះងាកមកក្ដាប់ជំនួញយ៉ាងណែន

2021-09-10 00:45:00
ចំនួនមតិ 0 | ចំនួនចែករំលែក 0

ចន្លោះមិនឃើញ

គិតត្រឹមខែកញ្ញា ឆ្នាំ២០២១ នេះ មិនទាន់ស្ងប់ពីការត្អូញត្អែររឿងបាត់ប្រាក់ចំណូល ខាតលើមុខរកស៊ីដោយសារបញ្ហាជំងឺកូវីដ-១៩ នៅឡើយទេ ដោយតារាខ្លះនៅពពាយនាយលក់ផ្ទះ ដី និងឡានដើម្បីស្ដារមុខជំនួញ ឬដោះស្រាយបញ្ហាជីវភាពក្នុងស្ថានភាពដ៏លំបាកនេះ។

ប៉ុន្តែបើងាកមកមើលតារាចម្រៀង និងសម្ដែងប្រុសទាំងពីរដួងនេះវិញ គេមិនដែលឮឡើយនូវពាក្យខាតឡុងចុងលើមុខជំនួញផ្ទាល់ខ្លួន ឬបាត់ទាំងស្រុងនូវចំណូលពីសិល្បៈ បើទោះបីជាវិបត្តិជំងឺកូវីដ-១៩ បានអូសបន្លាយអស់រយៈពេលជាង២ឆ្នាំ។ តារាប្រុសដែលមានវ័យស្របាលគ្នាទាំងពីរដួងនោះ គឺលោក ខាន់ ជេមស៍ និងលោក ចែម ចាន់រ៉ា ហៅនាយពាក់មី។

ក្រៅពីអាជីពកំប្លែង នាយពាក់មី មានជំនួញធំ២នៅក្នុងដៃ។ ទី១ គឺខាងអចលនទ្រព្យដែលដំណឹងក្រៅផ្លូវការលោកបុគ្គលបានបោះទុនវិនិយោគច្រើនក្នុងក្រុមហ៊ុនមួយឈ្មោះ”Trust me” និងទី២ រូបលោក បានក្លាយជាតំណាងចែកចាយធំមួយនូវផលិតផលថែទាំសុខភាព ឃូស៊ី របស់ថៅកែផលិតកម្ម”រ៉ាម” គឺអ្នកស្រី នួន សុន្ទរី ហៅស្រីអូន។

ត្បិតថា នៅអំឡុងពេលវិបត្តិកូវីដ-១៩ នេះមុខជំនួញរបស់លោកទាំងអំបាលម៉ានជួបបញ្ហា ឬជោគជ័យកម្រិតណានោះ? ស្ដែងតាមរយៈសកម្មភាពរបស់លោកដែលរវល់ដល់ថ្នាក់ភ្លេចថ្ងៃខួបកំណើតកូនកាលពីចុងខែសីហា ឆ្នាំ២០២១ ទៅនេះ គឺបង្ហាញថាលោករវល់ខ្លាំងណាស់ទាំងការងារសិល្បៈ និងមុខជំនួញផ្ទាល់ខ្លួន។

ថ្មីនេះដែរ លោកបានបញ្ចេញលុយមិនតិចម៉ឺនដុល្លារ ដើម្បីសង់ផ្ទះឲ្យម្ដាយក្មេកនៅអ្នកលឿងក្នុងតម្លៃប្រមាណ១០ម៉ឺនដុល្លារ ហើយមិនបានប៉ុន្មានផងក៏ស្រាប់ធ្លាយរឿងលោកទិញឡានសេរីទំនើបឲ្យកូនស្រីក្នុងតម្លៃជាង១០ម៉ឺនដុល្លារទៀត។ នេះ មិនទាន់គិតពីការចំណាយផ្សេងៗលើគ្រួសារខ្លួនឯង និងឪពុកបង្កើតនៅស្រុកកំណើត នាខេត្ដស្វាយរៀងផងទេ។

ងាកមកមើលតារាចម្រៀង ខាន់ ជេមស៍ វិញ។ គេមិនសូវឃើញលោកឡើងឆាកតន្ត្រី ឬកម្មវិធីសិល្បៈផ្សេងៗ ប៉ុន្ដែរឿងភាពជោគជ័យលើមុខជំនួញវិញ គឺលោកស្ទើរវ៉ាដាច់មិត្តសិល្បៈរួមជំនាន់ទៀតផង។ សព្វថ្ងៃក្រៅពីការងារសិល្បៈលោក មានជំនួញសំខាន់ចំនួន៣នៅក្នុងដៃ។

មុខជំនួញទី១ គឺលោកបានបោះទុនយ៉ាងសន្ធឹកលើការទិញ និងពុះដីឡូត៍លក់នៅម្ដុំភ្នំព្រះធាតុ ខេត្តកំពង់ឆ្នាំង ទី២ លោកទើបចុះកិច្ចព្រមព្រៀងវិនិយោគរួមគ្នាលើអាជីវកម្មម្ហូបអាហារជាមួយ"ស្ដេចបក្សី" និងជំនួញទី៣ គឺការនាំចូល និងចែកចាយនូវឧបករណ៍ច្រៀងរបស់ក្រុមហ៊ុនមួយឈ្មោះ"ASPOR"។

ចំពោះតារាចម្រៀង ខាន់ ជេមស៍ គេមិនដែលឃើញលោកបង្ហាញនូវការចាយវាយអ្វីធំដុំសោះនៅអំឡុងពេលវិបត្ដិជំងឺកូវីដ-១៩ ប៉ុន្តែគេឃើញលោកបង្ហាញពីភាពជោគជ័យលើជំនួញខាងអចលនទ្រព្យ ហើយបានពង្រីកការងាររកស៊ីរបស់ខ្លួនជាហូរហែ។

នៅគ្រាដែលអ្នកសិល្បៈស្ទើរគ្រប់ទម្រង់មិនទាន់ដំណើរការឡើងវិញស្រួលបួលដោយសារស្ថានភាពជំងឺកូវីដ-១៩ មិនទាន់ធូរស្រាលនោះ គេក៏កម្រឃើញតារាទាំងពីរដួងនេះឡើងសម្ដែង ឬច្រៀងលើឆាកនានាណាស់ ប៉ុន្តែពួកគេក៏ឆ្លៀតបានថតស្ពតពាណិជ្ជកម្មនានា ជាពិសេសស្ពតដែលទាក់ទងនឹងមុខជំនួញរបស់ពួកគេរៀងៗខ្លួន៕

អត្ថបទ៖ ជិន សុភ័ក្ដ្រ