តាមពិតដើមឈើចាំស្នេហ៍លើផ្លូវទៅខេត្តព្រះសីហនុ សម្ដេចតេជោ ហ៊ុន សែន ជាអ្នកដាក់ឈ្មោះ បង្កប់អត្ថន័យជ្រាលជ្រៅណាស់

2021-12-01 08:03:03
ចំនួនមតិ 0 | ចំនួនចែករំលែក 0

ចន្លោះមិនឃើញ

មានកន្លែងសំខាន់ចំនួន២កន្លែងស្ថិតនៅក្នុងភូមិសាស្ត្រក្រុងព្រះសីហនុ នោះគឺ កន្លែងអក្សរឆ្លាក់ធំៗ "ខ្មែរធ្វើបាន" និងកន្លែង "ដើមឈើចាំស្នេហ៍" ដែលនៅថ្ងៃនេះទើបដឹងថា សម្ដេចនាយករដ្ឋមន្ត្រី ហ៊ុន សែន គឺជាអ្នកដាក់ឈ្មោះ ស្របពេលដែល "ដើមឈើចាំស្នេហ៍" បង្កប់នៅអត្ថន័យពីក្រោយយ៉ាងជ្រាលជ្រៅ។

សម្ដេចតេជោ ហ៊ុន សែន ទើបនឹងបើកកកាយរឿងនេះនៅថ្ងៃនេះវេលាដែលសម្ដេចបានធ្វើដំណើរទៅដល់ជាថ្មីលើទឹកដីខេត្តជាប់មាត់សមុទ្ររសៀលនេះ ត្រៀមសម្រាប់ការបើកសម្ពោធឲ្យប្រើប្រាស់ហេដ្ឋារចនាសម្ព័ន្ធសំខាន់ៗរបស់ខេត្តនៅព្រលឹមថ្ងៃស្អែក។

នៅក្នុងបទសម្ភាសន៍រយៈពេលខ្លីជាមួយអ្នកសារព័ត៌មាន សម្ដេចតេជោ ហ៊ុន សែន ពន្យល់ចំពោះការប្រសិទ្ធនាមឲ្យដើមឈើមួយដើមដែលឈរបង្អួតខ្លួនលើកណ្ដាលផ្លូវទើបស្ថាបនាថ្មីនេះថា ពាក្យថា "ដើមឈើចាំស្នេហ៍" ឬ "សិលាចាំស្នេហ៍" គឺតំណាងឲ្យភាពគង់វង្ស ដែលមិនចេះបាត់បង់។

រូបភាព៖ ទំព័រ ទេសភាពក្រុងព្រះសីហនុ

សម្ដេចថ្លែងថា "ពាក្យថា "ចាំ" គឺវាមិនដែលជួបទេគ្នាទេ គឺចាំរហូត!”។ ចំណុចនេះសម្ដេចបន្តពន្យល់ថា វាជាស្ថានភាពគង់វង្ស ស្ថិតស្ថេរ មិនប្រែប្រួល និងមិនបាត់បង់ ហើយអត្ថន័យទាំងនេះទៀតសោតក៏បានផ្សារភ្ជាប់ជាមួយនឹងស្ថានភាពស្ថិរភាពរបស់ប្រទេសកម្ពុជាថែមទៀត ដែលភាគច្រើនគេមិនដឹងពីអត្ថន័យទូលាយដែលបង្កប់ពីក្រោយ។

“សារព័ត៌មានអាចចោទសួរថា ចុះម៉េចទៅពាក់ព័ន្ធនឹងរឿងអស់នេះទៅវិញ...ខ្ញុំចង់ជម្រាបថា ពាក្យគង់វង់ គឺមិនបាត់បង់ គឺសំដៅលើការរក្សាសន្តិភាពមិនឲ្យបាត់បង់ រក្សាការពាររាជបល្ល័ង្គមិនឲ្យបាត់បង់...អីចឹងនេះជាអត្ថន័យដែលក្ដោបដែលមានវាន័យទូលាយបែបនេះ ដែលគេមិនបានដឹង!”។

រូបភាព៖ ហ្វេសប៊ុក Sothea Dara

ទីកន្លែង "ដើមឈើចាំស្នេហ៍" បានក្លាយជាទីពេញនិយមមួយនៅលើកំណត់ផ្លូវឆ្ពោះទៅខេត្តព្រះសីហនុ ដោយគេបានឃើញអ្នកដំណើរ ពិសេសយុវជន យុវនារីជាច្រើនរមែងចុះថត ភ្ជាប់អនុស្សាវរីយជាមួយទីនេះ ទីកន្លែងដែលមានសោភណ្ឌភាពល្អទាក់ភ្នែក ទើបលេចឡើង ក្រោយពីខេត្តព្រះសីហនុបានកែមុខមាត់ថ្មី៕

អត្ថបទ៖ ទារិកា