Chiellini នឹងចូលនិវត្តន៍ពីក្រុមជម្រើសជាតិអ៊ីតាលី នៅរដូវកាលក្ដៅខាងមុខនេះហើយ

2022-04-26 13:32:27
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែការពារ Giorgio Chiellini នឹងចូលនិវត្តន៍ពីក្រុមជម្រើសជាតិអ៊ីតាលី នៅរដូវកាលក្ដៅខាងមុខនេះហើយបន្ទាប់ពីការប្រកួត CONEMBOL-UEFA Cup of Champions រវាងក្រុមជម្រើសជាតិអ៊ីតាលី នឹងក្រុមជម្រើសជាតិអាហ្សង់ទីន នៅថ្ងៃទី០១ ខែមិថុនា ឆ្នាំ២០២២ខាងមុខ នៅទីលានអង់គ្លេស Wembley Stadium នេះបើតាមការបញ្ជាក់ផ្ទាល់របស់កីឡាកររូបនេះទៅកាន់សារព័ត៌មាន DAZN កាលពីថ្ងៃច័ន្ទ ម្សិលមិញ។

Chiellini បាននិយាយថា៖" ខ្ញុំនឹងទៅលេង ហើយក៏ទៅនិយាយពាក្យលាគ្នាទៅក្រុមជម្រើសជាតិរបស់ខ្ញុំនៅឯប្រកួតនៅទីលាន Wembly ខាងមុខផងដែរ ដែលជាកន្លែងដែលខ្ញុំមានអនុស្សាវរីយ៍ល្អៗបំផុតក្នុងអាជីពជាក្រុមជម្រើសជាតិ ក៏ដូចជាអាជីពជាកីឡាករទាំងស្រុងរបស់ខ្ញុំផងដែរ ព្រោះការធ្លាប់ជោគជ័យនៅទីនេះគឺពិសេសណាស់ "។

ខ្សែការពាររូបនេះបន្តថា៖" ខ្ញុំចង់និយាយលាគ្នាជាលើកចុងក្រោយនឹងក្រុមក្នុងពេលយើងប្រកួតទទួលបានលទ្ធផលឈ្នះផងដែរ។ តែយ៉ាងណាច្បាស់ណាស់ការប្រកួតនេះជាការប្រកួតចុងក្រោយជាមួយនឹងក្រុមជម្រើសជាតិហើយ។ វាគួរតែដល់ពេលឲ្យកីឡាករល្អៗលេងបន្តហើយ "។

នៅក្នុងឆ្នាំនេះ Chiellini មានវ័យ ៣៧ឆ្នាំហើយ កីឡាកររូបនេះបានលេងឲ្យក្រុមជម្រើសជាតិអ៊ីតាលីតាំងពីឆ្នាំ២០០៤មក ដោយចូលរួមលេងសរុបបាន ១១៦ប្រកួត ស៊ុតចូល ៨គ្រាប់ និងឈ្នះពាន Euro 2020។

សម្រាប់រដូវកាលក្ដៅខាងមុខ ខ្សែការពាររូបនេះក៏នឹងអាចចែកផ្លូវនឹង Juventus ដោយនឹងអាចផ្លាស់ទៅលេងនៅ MLS ផងដែរ៕

ប្រភព៖ Marca ប្រែសម្រួល៖ ហ៊ីម រស្មី