Haaland និង Pogba ក៏ដូចជាកីឡាករជាច្រើនចូលរួមរំលែកទុក្ខការបាត់បង់ លោក Mino Raiola

2022-05-02 13:25:57
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Mino Raiola កំពូលភ្នាក់ងារកីឡាករប្រចាំបាល់ទាត់អឺរ៉ុបដ៏មានឥទ្ធិពលមួយរូប បានបាត់បង់ជីវិតនៅវ័យ៥៤ឆ្នាំ ដោយសារតែបញ្ហាសុខភាព។ នេះបើយោងតាមការបញ្ជាក់របស់គ្រួសាររបស់លោកផ្ទាល់កាលពីថ្ងៃសៅរ៍ ទី៣០ ខែមេសា ឆ្នាំ២០២២កន្លងទៅនេះ។

ការស្លាប់របស់លោកត្រូវកីឡាករជាច្រើនដូចជា Erling Haaland, Paul Pogba, Moise Kean ជាដើមក៏ដូចជាថ្នាក់នាំក្លឹបដូចជាប្រធានក្លឹប Juventus លោក Andrea Agnelli ចេញសារចូលរួមរំលែកទុក្ខ និងអរគុណចំពោះស្នាដៃរបស់លោកកន្លងមក។

លោក Raiola ជាភ្នាក់ងារកីឡាករបស់ Zlatan Ibrahimovic, Paul Pogba, Erling Haaland, Marco Verratti, Moise Kean, Henrikh Mkhitaryan, Gianluigi Donnarumma, Mario Balotelli និងកំពូលកីឡាករជាច្រើនរូបទៀត។

ក្នុងអាជីពរបស់លោកជាភ្នាក់ងារកីឡាករចាប់ពីឆ្នាំ១៩៩៣មក លោកទទួលខុសត្រូវលើចរចាកុងត្រាឲ្យកីឡាករនានាសរុប ៨៤៧.៧លានដុល្លារ ដែលធ្វើឲ្យលោកមានទ្រព្យសម្បត្តិសរុប ៨៤.៧លានដុល្លារពីការងារមួយនេះ បើយោងតាម Forbes ។

ក្រោយលោកបានស្លាប់បែបនេះ ក្រុមហ៊ុនភ្នាក់ងារកីឡាកររបស់លោកនៅតែបន្តដំណើរការដដែលព្រោះតែក្រុមហ៊ុននេះជាលក្ខណៈគ្រួសារគឺដំណើរការកន្លងមកដោយចូលរួមពីសាច់ញាតិ និងមនុស្សជិតស្និទ្ធរបស់លោកផ្ទាល់។ កីឡាករដែលបន្តប្រើក្រុមហ៊ុនភ្នាក់ងារមួយនេះគឺមានដូចជា Zlatan, Pogba និង Haaland ៕