បើមើលលើតួលេខនេះឡានអគ្គិសនីនៅខ្មែរ កំពុងរីកដូចផ្សិតហើយបន្តិចទៀតឃើញពេញដងផ្លូវ
- 2022-05-30 04:12:31
- ចំនួនមតិ 0 | ចំនួនចែករំលែក 0
បើមើលលើតួលេខនេះឡានអគ្គិសនីនៅខ្មែរ កំពុងរីកដូចផ្សិតហើយបន្តិចទៀតឃើញពេញដងផ្លូវ
ចន្លោះមិនឃើញ
គិតត្រឹមរយៈពេលប្រាំខែដើមឆ្នាំ ២០២២ នេះមាន យានយន្តអគ្គិសនី បានមកចុះបញ្ជីនៅក្រសួងសាធារណការ និងដឹកជញ្ជូនសរុបចំនួន ៨៤ គ្រឿង ត្រូវបាននាំចូល បើធៀបនឹងរយៈពេលដូចគ្នាឆ្នាំ ២០២១ ដោយមានយានយន្តអគ្គិសនីត្រឹមតែ ៩ គ្រឿងប៉ុណ្ណោះ គឺមានការកើនឡើងប្រមាណជាង ៨០០% បើមើលលើទំនោរអ្នកប្រើប្រាស់រថយន្តអគ្គិសនី គេរំពឹងថានឹងបន្តកើនឡើងបន្ថែមទៀត ខណៈដែលចំនួននេះនៅមិនទាន់រាប់បញ្ចូលទាំងរថយន្តអគ្គិសនីកំពុងបរលើដងផ្លូវដែលមិនទាន់ចុះបញ្ជីផ្លូវការផង ដូចនេះបើមើលលើតួលេខឡានអគ្គិសនីនៅក្នុងប្រទេសកម្ពុជា នឹងឃើញមានបរពេញដងផ្លូវនាពេលអនាគតដ៏ខ្លី។
ឯកឧត្តម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន បានឱ្យដឹងថា៖ «ចំនួនប្រាំខែឆ្នាំ២០២២នេះ យើងមាន៨៥ គ្រឿង បើប្រៀបនឹង៥ខែឆ្នាំ ២០២១ យើងមានតែ៩ គ្រឿងទេ ដូច្នេះមានការកើន ឡើងជាង៨០០ភាគរយ កើនសម្បើមណាស់ នេះជាការមួយដែលយើងពេញចិត្ត យើងសប្បាយចិត្ត ដែលបានឃើញរថយន្តច្រើន ដែលប្រើដោយអគ្គិសនីមានការកើនឡើងច្រើន»។
ជាមួយគ្នានោះដែរនៅក្នុងឆ្នាំ ២០២២ នេះក្រសួងបានសហការជាមួយអង្គការ UNDP និងវិស័យឯកជនក្នុងការដាក់ឱ្យដំណើរការទីតាំងសាកយានយន្តអគ្គិសនីមួយចំនួនក្នុងនោះរួមមាន៖ ៤ ទីតាំងត្រូវបានគាំទ្រដោយអង្គការUNDP និងទីតាំងមួយកន្លែងត្រូវបានគាំទ្រដោយ សភាពាណិជ្ជកម្មចិននៅកម្ពុជា។ ក្រសួងក៏កំពុងសហការជាមួយអង្គការUNDPផងដែរ ក្នុងការសិក្សា និងចងក្រងផែនទីចង្អុលផ្លូវស្តីពីហេដ្ឋារចនាសម្ព័ន្ធបញ្ចូលថាមពលយានយន្តអគ្គិសនី ដែលនឹងកំណត់ អំពីទីតាំងជាក់លាក់ លក្ខខណ្ឌនៃការរៀបចំស្ថានីយបញ្ចូលថាមពលដើម្បីស្វែងរកដៃគួវិនិយោគ និងពង្រីកបណ្តាញស្ថានីយបញ្ចូលថាមពលទូទាំងប្រទេសកម្ពុជា។
គិតមកទល់ពេលនេះ កម្ពុជា បានដំឡើងស្ថានីយសាកថ្មរថយន្តអគ្គិសនីនៅលើទីតាំងចំនួនបួនរួចមកហើយដែលមានដូចជា ចំណតដំបូងគេនៅកម្ពុជា នៅទីស្ដីការក្រសួងសាធារណការ និងដឹកជញ្ជូន ចំណែកឯចំណតទីពីរ ដំឡើងនៅសាខាទី ៥០ នៃស្ថានីយប្រេងឥន្ទនៈ Caltex ចំណតទីបី ដំឡើងនៅមុខផ្សារទំនើប ហ្វូរី ថាម សឃ្វែរ ម៉ល ក្រុងព្រះសីហនុ ចំណតទីបួននៅក្នុងទីរួមក្រុងបាត់ដំបង និងចំណតនៅទីតាំងដទៃទៀតកំពុងសាងសង់ជាបណ្ដើរៗផងដែរ៕
អត្ថបទទាក់ទង៖
-បើកំពុងជិះឡានអគ្គិសនីនៅខ្មែរ អាចទៅបីកន្លែងនេះដើម្បីសាកភ្លើង
-ឡានអគ្គិសនីនៅខ្មែរយើងថ្ងៃអនាគតនឹងមាន App ដឹងចំណតសាកថ្មទំនេរឬមិនទំនេរ
អត្ថបទ៖ រក្សា