ឡុង សុភី៖ មិនសុខចិត្តអាជ្ញាកណ្ដាលដេញខ្លួនចុះខុសរឿងហើយ បើកលុយតម្លៃខ្លួនឲ្យមិនគ្រប់ទៀត

2022-06-27 04:28:35
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាករគុនខ្មែរ ឡុង សុភី កើតទុក្ខមិនសុខចិត្តចំពោះការដេញចុះរបស់អាជ្ញាកណ្ដាល អ៊ិន ខេមរិន្ទ នាការប្រកួតជាមួយថៃ ម្សិលមិញនៅ PNN ខណៈដែលខ្លួនដើរចូលវ៉ៃរហូត៤ទឹកទៅទៀត។

ការប្រកួតម្សិលមិញ

ឡុង សុភី បានឲ្យដឹងថា រូបគេពិតជាឆ្ងល់ខ្លាំងណាស់ ហេតុអ្វីអាជ្ញាកណ្ដាលគឺលោក អ៊ិន ខេមរិន្ទ បញ្ឈប់ការប្រកួត និងដេញចុះទៅវិញ ស្របពេលដែលខ្លួនបានដើរចូលវ៉ៃកីឡាករថៃតាំងពីទឹក១ ដល់ទឹក៤។

កីឡាករចាស់វស្សាខាងលើនេះបន្ថែមទៀតថា បើអត់ចូលវ៉ៃមិនថាទេ ប៉ុន្តែនេះដើរចូលវ៉ៃ៤ទឹកហើយនៅខុសទៀត។ ចំណែកកីឡាករថៃគិតតែថយ មិនសូវវ៉ៃមិនព្រមាននោះទេ បែរជាមកដាក់បន្ទុកលើខ្លួនទៅវិញ។ សុភី បញ្ជាក់ទៀតថា រូបគេគឺវ៉ៃរបៀបមួយពីៗបែបនេះតាំងពីដើមមកម្ល៉េះ ប៉ុន្តែម្សិលមិញថាខ្លួនវ៉ៃមិនអស់ទៅវិញ។

ការប្រកួតម្សិលមិញ

ម្ចាស់ខ្សែក្រវាត់ច្រើនគ្រឿងរបស់កម្ពុជាខាងលើនេះ ដាក់ចម្ងល់ថាច្បាប់សហព័ន្ធយ៉ាងម៉េចទៅវិញឲ្យច្បាស់លាស់ អ្នកដើរចូលវ៉ៃហើយនៅខុសទៀត រីឯអ្នកថយរហូតបែរជាត្រូវទៅវិញ។ មួយវិញទៀតម្សិលមិញនេះគឺខាងអ្នកបើកលុយតម្លៃខ្លួនក៏បើកឲ្យតែ ៣០០-៤០០ដុល្លារប៉ុណ្ណោះ ខណៈតម្លៃខ្លួនពេញ៥០០ដុល្លារ។ រឿងតម្លៃខ្លួន សុភី មិនព្រមទទួលយកឡើយ ខណៈនៅពេលនេះមិនទាន់មានដំណោះស្រាយអ្វីទាំងអស់។

ទាក់ទិនរឿងនេះដែរលោក ហេង សុឃន អគ្គលេខាធិការសហព័ន្ធប្រដាល់គុនខ្មែរបានឲ្យដឹងមុននេះថា គណៈកម្មការប្រតិបត្តិរបស់សហព័ន្ធទាំងអស់នឹងកោះប្រជុំបន្ទាន់នៅល្ងាចនេះយកដោះស្រាយបញ្ហារបស់ ឡុង ភី ដូច្នេះលទ្ធផលយ៉ាងណាចាំមើលល្ងាច។

ការប្រកួតម្សិលមិញ

ចំពោះខាងស្ថានីយទូរទស្សន៍ PNN លោក តាំង លីហួរ ក៏ប្រាប់ដែរថា នៅពេលនេះមិនទាន់អាចនិយាយអ្វីបាននោះទេ ពោលរង់ចាំការដោះស្រាយខាងសហព័ន្ធសិន។ មួយវិញទៀតច្បាស់សហព័ន្ធ បើព្រមាន ឬដេញចុះនោះ ខាងស្ថានីយមិនបើកតម្លៃខ្លួនជូនឡើយ ប៉ុន្តែម្សិលមិញខាង PNN ក៏សម្រួលឲ្យមានតម្លៃខ្លួនខ្លះៗជូនដល់ ឡុង សុភី ផងដែរ ប៉ុន្តែម្ចាស់ខ្លួនមិនយល់ព្រមទាល់តែបាន ៥០០ដុល្លារទើបទទួលយក។

រូបភាពផេក PNN Sport

រំលឹកដែរថា ម្សិលមិញនេះកីឡាករ ឡុង សុភី ប៉ះកីឡាករថៃ ភិតឈិតឆ័យ ប្រកួតក្នុងតំណែងគូមិត្តភាពអន្តរជាតិ។ យ៉ាងណាការប្រកួតបានត្រឹម៤ទឹកប៉ុណ្ណោះ ដោយអាជ្ញាកណ្ដាលលោក អ៊ិន ខេមរិន្ទ បានដេញកីឡាករ ឡុង សុភី ចុះព្រោះប្រកួតមិនអស់ពីសមត្ថភាព៕

អត្ថបទ៖ នួន ស៊ីណា