តាមការពិត! គ្រាប់បែកបរមាណូដែលទម្លាក់លើជប៉ុន គឺបានផ្ទុះទាំងមិនទាន់ធ្លាក់ដល់ដី
- 2022-08-12 07:56:46
- ចំនួនមតិ 0 | ចំនួនចែករំលែក 0
តាមការពិត! គ្រាប់បែកបរមាណូដែលទម្លាក់លើជប៉ុន គឺបានផ្ទុះទាំងមិនទាន់ធ្លាក់ដល់ដី
ចន្លោះមិនឃើញ
ជប៉ុន គឺជាប្រទេសដំបូងគេបង្អស់ដែលទទួលរងគ្រោះពីការទម្លាក់គ្រាប់បែកបរិមាណូ ឬអាតូមិក នៅចុងសង្គ្រាមលោកលើកទី២។ នៅព្រឹកថ្ងៃទី៦ ខែសីហា ឆ្នាំ១៩៤៥ យន្តហោះអាមេរិក B-29 បានទម្លាក់គ្រាប់បែកបរមាណូទីមួយ ដែលមានឈ្មោះថា «Little Boy» ទម្ងន់ ៤,៤តោន លើក្រុងហ៊ីរ៉ូស៊ីម៉ា ប្រទេសជប៉ុន ដើម្បីបង្ខំឱ្យប្រទេសនេះចុះចាញ់សង្គ្រាម។
គ្រាប់បែកនេះ ត្រូវបានទម្លាក់ចេញពីយន្តហោះនៅម៉ោង ៨:១៥នាទីព្រឹក ហើយត្រូវបានផ្ទុះនៅកម្ពស់ ៦១០ម៉ែត្រ ពីលើក្រុងហ៊ីរ៉ូស៊ីម៉ា ដែលមានកម្លាំង ១៥គីឡូតោន នៃកម្លាំងផ្ទុះ TNT ទាំងមិនទាន់ធ្លាក់ដល់ដី ហើយការកម្ទេចគឺលាតសន្ធឹងជិត ១៣គីឡូម៉ែត្រការ៉េនៃក្រុង។
ការផ្ទុះគ្រាប់បែកបរមាណូនេះ បានសម្លាប់មនុស្សប្រហែល ៨ម៉ឺននាក់ភ្លាមៗ ហើយក្រោយមកមានមនុស្ស រាប់ម៉ឺននាក់ទៀតស្លាប់ជាបន្តបន្ទាប់ ដោយសារត្រូវសារធាតុវិទ្យុសកម្ម។ បើគិតចំនួនអ្នកស្លាប់សរុបទាំងអស់ប្រហែល ១៤ម៉ឺននាក់។
យ៉ាងណាមិញ ការទម្លាក់លើកទីមួយនេះ មិនបានធ្វើឱ្យជប៉ុនចុះចាញ់សង្គ្រាមឡើយ។ ៣ថ្ងៃក្រោយមក គឺនៅថ្ងៃទី៩ ខែសីហា ១៩៤៥ យន្តហោះអាមេរិក បានទម្លាក់គ្រាប់បែកបរមាណូ១ទៀតឈ្មោះ «Fat Man» ទម្ងន់ ៤,៦ តោន ទៅលើក្រុងណាហ្គាសាគី បណ្តាលឱ្យមនុស្សពីជិត ៤ម៉ឺន ទៅ ៨ម៉ឺននាក់ បានបាត់បង់ជីវិតថែមទៀតផង។ ក្រោយការទម្លាក់លើកទី២នេះ អធិរាជជប៉ុន ក៏បានប្រកាសចុះចាញ់សង្គ្រាមតែម្តង៕