ការពិតទៅ! អនាគត CEO ថ្មី របស់ Toyota បានស្ទាក់ស្ទើរទទួលយកតំណែងនេះ
- 2023-02-02 07:57:42
- ចំនួនមតិ 0 | ចំនួនចែករំលែក 0
ការពិតទៅ! អនាគត CEO ថ្មី របស់ Toyota បានស្ទាក់ស្ទើរទទួលយកតំណែងនេះ
ចន្លោះមិនឃើញ
ក្រុមហ៊ុនរថយន្តជប៉ុន Toyota នឹងមានការផ្លាស់ប្តូរថ្នាក់ដឹកនាំថ្មីនៅក្នុងខែមេសាខាងមុខនេះហើយ ដោយលោក Akio Toyoda នាយកប្រតិបត្តិរបស់ Toyota បច្ចុប្បន្ន នឹងលាលែងពីតំណែងនេះ ហើយផ្ទេរទៅឱ្យលោក Koji Sato ដែលជាប្រធានក្រុមហ៊ុន Lexus ដែលបានចូលរួមចំណែកយ៉ាងធំក្នុងសមិទ្ធផលរបស់ក្រុមហ៊ុន Toyota។
ការចាកចេញរបស់លោក Toyoda គឺចង់ទុកឱកាសដល់អ្នកជំនាន់ក្រោយក្នុងការបើកទំព័រប្រវត្តិសាស្រ្តថ្មីរបស់ក្រុមហ៊ុន Toyota ជាពិសេសគឺលើការអភិវឌ្ឍរថយន្តអគ្គិសនី ខណៈដែលក្រុមហ៊ុន Tesla និង BYD ជាដើមនោះ បាននឹងកំពុងចេញហួសឆ្ងាយពីខ្លួនទៅហើយ។ លោក Toyoda ក៏បានសារភាពដែរថា វ័យរបស់លោក ៦៦ឆ្នាំនេះ គឺកាន់តែចាស់ណាស់ទៅហើយ ក្នុងការបត់បែនតាមការវិវត្តនៃឧស្សាហកម្មរថយន្ត។
បើតាមលោក Sato វ័យ ៥៣ឆ្នាំ បាននិយាយថា លោកជាអ្នកស្រឡាញ់ការផលិតរថយន្ត ដូច្នេះលោកចង់ក្លាយជាប្រធានមួយរូប ដែលបន្តការផលិតរថយន្ត។ ជាមួយនឹងបេសកកម្មដ៏វែងឆ្ងាយរបស់ក្រុមហ៊ុន Toyota គឺលោកចង់ឱ្យមានការកែទម្រង់ថ្មីមួយ និងដោះស្រាយជាមួយបញ្ហាសាកលពោលគឺការលុបបំបាត់ការបញ្ចេញផ្សែងកាបូនឌីអុកស៊ីត ដោយសំដៅលើឧស្សាហកម្មបៃតង គឺជារថយន្តអគ្គិសនី។
យ៉ាងណាមិញ អនាគតនាយកប្រតិបត្តិថ្មីរូបនះ ធ្លាប់បង្ហាញការស្ទាក់ស្ទើរក្នុងការយល់ព្រមទទួលយកតំណែងនេះ ដោយលោកបារម្ភថា មិនអាចធ្វើឬសម្រេចបានដូចនឹងអ្វីដែលលោក Toyoda បានធ្វើកន្លងមក។ នេះជាសម្តីរបស់លោក Sato ដែលបានឆ្លើយទៅកាន់តែលោក Toyoda ក្នុងអំឡុងពេលអ្នកទាំងពីរបានចូលរួមក្នុងកម្មវិធីប្រណាំងរថយន្តមួយនៅប្រទេសថៃ កាលពីខែធ្នូកន្លងទៅ។
ក្នុងពេលនោះ លោក Toyoda បានប្រាប់ទៅលោក Sato វិញថា «ត្រូវធ្វើជាខ្លួនឯង» ហើយការប្រគល់ការងារនេះ គឺជាក្តីសុបិន្តរបស់លោក Sato។
សូមជម្រាបថា សមិទ្ធផលដ៏ជោគជ័យរបស់លោក Sato ថ្មីៗនេះ គឺជាការបង្ហាញចេញរថយន្តអគ្គិសនីដ៏ល្បីល្បាញមួយនោះគឺ Lexus RZ កាលពីខែមេសា ឆ្នាំ២០២២ ហើយគ្រោងនឹងបញ្ចេញលក់ជាផ្លូវការក្នុងពេលឆាប់ៗខាងមុខនេះ។ រថយន្តនេះ បំពាក់អាគុយទំហំ ៧១,៤គីឡូវ៉ាត់ម៉ោង ដែលអាចធ្វើដំណើរបានចម្ងាយ ៤៥០គីឡូម៉ែត្ររាល់ពេលសាកពេញម្តង៕