ជ័យជម្នះ កញ្ញា ស៊ន សៀវម៉ី រញ្ជួយដល់រដ្ឋមន្រ្តីអប់រំ ផ្ញើសារអបអរសារ

2014-10-04 00:15:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ភ្លាមៗ បន្ទាប់ពីទទួលបានមេដាយមាស លើវិញ្ញាសារតេក្វាន់ដូ នៅវគ្គផ្ដាច់ព្រ័ត្រ ក្នុងព្រឹត្តិការណ៍កីឡាទ្វីបអាស៊ី Asian Games លើកទី១៧ នៅទីក្រុង Incheon ប្រទេសកូរ៉េខាងត្បូង រដ្ឋមន្រ្តីក្រសួងអប់រំយុវជន និងកីឡាបានផ្ញើសារអបអរសារទរ កញ្ញា សៀវម៉ី ជាលើកដំបូងមិនធ្លាប់មាន។ នៅលើបណ្តាញសង្គម Facebook មុននេះ ឯកឧត្តម ហង់ ជួនណារ៉ុន បានសរសេរថា "កីឡាការិនីកម្ពុជា កញ្ញា ស៊ន សៀវម៉ី បានឈ្នះមេដាយមាស ក្នុងទម្ងន់ ៧៣ គីឡូក្រាម លើវិញ្ញាសាតេក្វាន់ដូ ក្នុងការប្រកួតកីឡា Asian Games ជាលើកដំបូង ក្នុងរយៈពេលជាង៤០ ឆ្នាំសម្រាប់កម្ពុជា។ អបអរសារទរចំពោះកញ្ញា និងតេក្វាន់ដូកម្ពុជា”។

កីឡាការិនីតេក្វាន់ដូ ជម្រើសជាតិកម្ពុជា ស៊ន សៀវម៉ី បានក្លាយជាកីឡាការិនីម្នាក់គត់របស់កម្ពុជាក្នុងការឈ្នះ បានមេដាយមាស បន្ទាប់ពីបានបំបាក់ជើងខ្លាំងអ៊ីរ៉ង់ Rouhani Fatameh ដោយលទ្ធផល៧-៤ នៅវគ្គផ្ដាច់ព្រ័ត្រក្នុងព្រឹត្តិការណ៍កីឡាទ្វីបអាស៊ី Asian Games លើកទី១៧ នៅទីក្រុង Incheon ប្រទេសកូរ៉េខាងត្បូង។

មុនឈ្នះមេដាយមាសនៅវគ្គផ្តាច់ព្រ័ត្រនេះ ម្ចាស់មេដាយមាសស៊ីហ្គេម សៀវម៉ី បានផ្តួលម្ចាស់មេដាយមាសស៊ីហ្គេមពីរសម័យរបស់ហ្វីលីពីន ALORA Kirstie Elaine ដោយលទ្ធផល៦-៥ក្នុងវគ្គពាក់កណ្តាល និងបានផ្តួលកីឡាការិនីអ៊ូបេគីស្ថាន Abdullaeva Umida ដោយលទ្ធផល ២៩-៧ក្នុងវគ្គ៨នាក់ចុងក្រោយ៕