ប៊ិន យ៉ាន៖ បើគ្រប់គ្នាចង់ក្លាយជានាយករដ្ឋមន្ត្រីកាន់តែល្អ
- 2015-07-27 22:42:12
- ចំនួនមតិ 0 | ចំនួនចែករំលែក 0
ប៊ិន យ៉ាន៖ បើគ្រប់គ្នាចង់ក្លាយជានាយករដ្ឋមន្ត្រីកាន់តែល្អ
ចន្លោះមិនឃើញ
ប៊ិន យ៉ានត្រូវសារព័ត៌មានក្នុងស្រុកជាច្រើនចាប់អារម្មណ៍ដោយសារគាត់ជាជនជាតិដើមភាគតិចដែលមានមហិច្ឆតាធំចង់ធ្វើជានាយករដ្ឋមន្ត្រីកម្ពុជា។ ក្នុងវេទិកា "ការកសាងខ្លួនក្លាយជាយុវជនឆ្នើមសតវត្សទី ២១" នៅសាកលវិទ្យាល័យបញ្ញាសាស្ត្រកាលពីថ្ងៃអាទិត្យ បុរសជនជាតិដើមកួយរូបនេះបានលើកឡើងថា បើយុវជនគ្រប់គ្នាសុទ្ធតែចង់ក្លាយជានាយករដ្ឋមន្ត្រីគឺជារឿងល្អ។
និយាយក្នុងវគ្គសំណួរចម្លើយជាមួយវាគ្មិនពីររូបទៀតគឺ កញ្ញា អៀង លីនដា និងតោ គឹមស៊ី យុវជនវ័យ ២៤ ឆ្នាំរូបនេះលើកអំណះអំណាងគាំទ្រការនិយាយខាងលើថា «បើយុវជនយើងសុទ្ធតែចង់ក្លាយជានាយករដ្ឋមន្ត្រីគ្រប់គ្នា ពួកគេនឹងខិតខំជាងមុន គិតគួរពីបញ្ហាសង្គម សេដ្ឋកិច្ច កាន់តែច្រើនឡើង[...]»។ បុរសដែលកំព្រាម្ដាយតាំងពីអាយុ ២ ឆ្នាំ និងត្រូវឪពុកបោះបង់នៅអាយុ ៤ ឆ្នាំបន្ថែមថា បើយុវជនមានក្ដីសុបិនធំ ពួកគេនឹងខិតខំប្រឹងប្រែងធ្វើដើម្បីសង្គមកាន់តែច្រើន ហើយវាអាចធ្វើឲ្យសង្គមរីកចម្រើនកាន់តែឆាប់រហ័ស។
យុវជន ប៊ិន យ៉ាន
បុរសដែលមានដើមកំណើតនៅខេត្តស្ទឹងត្រែងក៏បានចែករំលែកចំណេះដឹងមួយចំនួនដល់យុវជនដើម្បីត្រៀមខ្លួនឲ្យបានល្អពេលសមាហរណកម្មអាស៊ានចូលមកដល់។ មាន ៥ ចំណុចដែលយុវជនយើងបានលើកឡើង។
ទីមួយគឺត្រូវពង្រឹងភាសាបរទេស។ យ៉ាន រៀបរាប់ថា ការចេះភាសាជាការល្អ បើយកល្អគួររៀនភាសាអង់គ្លេសឲ្យបានស្ទាត់ជំនាញដើម្បីបង្កើតទំនាក់ទំនង ហើយភាសាផ្សេងទៀតបើចេះកាន់តែច្រើនគឺរឹតតែល្អ ព្រោះងាយស្រួលទាក់ទងបានគ្រប់ជាតិសាសន៍។ ទីពីរត្រូវចេះបច្ចេកវិទ្យា។ បច្ចេកវិទ្យាចេះតែវិវត្តឈានឡើងជាលំដាប់ ដូច្នេះបើចង់ប្រកួតប្រជែងនឹងយុវជនមកពីប្រទេសដទៃ ត្រូវពង្រឹងចំណេះដឹងផ្នែកបច្ចេកវិទ្យាឲ្យបានល្អ។ ទីបីត្រូវរៀនជំនាញវិជ្ជាជីវៈ។ ក្រៅពីចំណេះដឹងផ្នែកភាសា និងបច្ចេកវិទ្យា យុវជនដែលមិនមានឱកាសទទួលការអប់រំខ្ពស់ អាចចាប់យកជំនាញវិជ្ជាជីវៈណាមួយជាក់លាក់ ហើយរៀនដោយយកចិត្តទុកដាក់។ ចំណុចទីបួន និងទីប្រាំ បុរសសម្បុរស្រអែមបន្ថែមថា ត្រូវរៀនចេះប្រាស្រ័យទាក់ទងល្អជាមួយអ្នកដទៃដើម្បីពង្រីកបណ្ដាញនិងឱកាស ហើយស្ម័គ្រចិត្តចូលរួមការងារសង្គមក៏បានបន្ថែមនូវគុណសម្បត្តិឲ្យយុវជនងាយរកការងារបានធ្វើដែរ។
រាប់ពីឆ្វេងមកស្តាំ៖ លោក ប៊ិន យ៉ាន កញ្ញា តោ គឹមស៊ី ឌីជេ ណាណា និងកញ្ញា អៀង លីនដា
ប៊ិន យ៉ានឲ្យដឹងដែរថា ទៅអនាគត គាត់ចង់ដាក់អាហារូបករណ៍ទៅសិក្សាថ្នាក់បណ្ឌិតផ្នែកច្បាប់នៅសាកលវិទ្យាល័យ Harvard សហរដ្ឋអាមេរិក មុននឹងត្រឡប់មកចូលប្រឡូកឆាកនយោបាយ ដើម្បីសម្រេចក្ដីប្រាថ្នារបស់ខ្លួន បើទោះជាមានមនុស្សជាច្រើនចាំសើចពេបជ្រាយឲ្យក៏ដោយចុះ៕
អត្ថបទ៖ ប្រាក់ ចាន់សីហា
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
