ទិត្យ វិច្ឆិកា៖ វាសនារបស់ក្មួយៗ ពឹងលើការប្រគំតន្ត្រីលើកនេះ

2016-08-04 17:23:45
ចំនួនមតិ 0 | ចំនួនចែករំលែក 0

ចន្លោះមិនឃើញ

ទិត្យ វិច្ឆិកា គ្រោងរៀបចំការប្រគំតន្ត្រីម្ដងទៀតនៅដើមខែកញ្ញាខាងមុខនេះក្នុងបរិវេណបុរីមួយនៅសង្កាត់ចោមចៅ ដោយមានការចូលរួមពីតារាចម្រៀងល្បីៗជាច្រើននាក់។

តារាចម្រៀងរូបនេះបន្តថា ការប្រគំតន្ត្រីជាលើកនេះលោកមានគោលបំណងប្រមូលថវិកាកសាងសាលាមួយខ្នងមាន៤បន្ទប់ក្នុងភូមិជាំស្លារ ស្រុកថ្មបាំង ខេត្តកោះកុង និងសមិទ្ធផលមួយចំនួនទៀតរួមទាំងស្ពានឆ្លងទឹកសម្រាប់ក្មេងៗទាំងនោះទៅសាលាផងដែរ។

“ខ្ញុំឃើញក្មួយៗ នៅទីនោះគាត់មានការលំបាកណាស់ ខ្វះបន្ទប់រៀនសូត្រ គ្មានបន្ទប់ទឹកជាដើម ក៏សម្រេចរៀបចំការប្រគំតន្ត្រីម្ដងទៀត អញ្ចឹងវាសនារបស់ពួកគេពឹងលើសប្បុរសជន"។ ទិត្យ វិច្ឆិកា ថ្លែងមកកាន់ Sabay។

នេះជាលើកទី២ហើយ ដែលលោក ទិត្យ វិច្ឆិកា ផ្ដើមរៀបចំការប្រគំតន្ត្រីដូច្នេះក្នុងគោលដៅមនុស្សធម៌ជួយជនក្រីក្រនៅតំបន់ដាច់ស្រយាល។ តារាចម្រៀងដដែលអះអាងថា ការប្រគំតន្ត្រីលើកនោះមិនសូវទទួលបានជោគជ័យនោះទេ ព្រោះពេលវេលារៀបចំហាក់ប្រថុចញ៉ុចពេក ប៉ុន្តែក្លាយជាបទពិសោធន៍ល្អមួយសម្រាប់រូបលោក ដើម្បីរៀបចំកម្មវិធីលើកនេះ។

សិល្បករក្នុងឆន្ទៈសង្គមរូបនេះ បានបង្ហាញសុទិដ្ឋិនិយមថា ការប្រគំតន្ត្រីលើកនេះ នឹងទទួលបានការគាំទ្រពីមហាជននានាមិនខាន ព្រោះមានសុទ្ធសឹងតែតារាចម្រៀងល្បីឈ្មោះចូលរួម។ បន្ថែមពីនេះ លោកអំពាវនាវដល់សប្បុរសជន និងម្ចាស់ក្រុមហ៊ុននានាចូលរួមឱ្យបានច្រើន ដែលជាចំណែកមួយជួយដល់ក្មេងៗកំពុងមានតម្រូវការបន្ទប់រៀន៕