កត្ដាទាំងនេះ បញ្ជាក់ថាក្លឹបសូលទីឡូអង្គរ នឹងធ្វើឱ្យលីគកម្ពុជាឆ្នាំក្រោយ កក្រើកមិនខាន
- 2017-12-27 04:52:43
- ចំនួនមតិ 0 | ចំនួនចែករំលែក 0
កត្ដាទាំងនេះ បញ្ជាក់ថាក្លឹបសូលទីឡូអង្គរ នឹងធ្វើឱ្យលីគកម្ពុជាឆ្នាំក្រោយ កក្រើកមិនខាន
ចន្លោះមិនឃើញ
ក្លឹបសូលទីឡូអង្គរ ជាក្លឹបថ្មីមួយដែលទើបបង្កើតឡើងនៅឆ្នាំមុន ប៉ុន្តែមានសកម្មភាពបាល់ទាត់រីកចម្រើនលូតលាស់លឿនមែនទែន សឹងមួយគួរឱ្យជឿ។
ក្លឹបដែលមានម្ចាស់ជាកីឡាករបាល់ទាត់ល្បីឈ្មោះ Keisuke Honda ខាងលើនេះ បានរៀបចំក្រុមចូលលេងលីគលំដាប់ទី២ ឆ្នាំមុនហើយក៏មានឱកាសបានឡើងមកលេងលីគកំពូលភ្លាមៗតែម្ដង។ ក្រោយពីមានឈ្មោះលេងលីគនេះហើយ ពួកគេបានទិញចូលកីឡាករថ្មីៗជាច្រើន និងបានទៅលេងពានរង្វាន់អន្តរជាតិមួយនៅប្រទេសចិនថែមទៀត ជាមួយក្រុមក្រសួងការពារជាតិ។
ត្បិតតែលទ្ធផលមិនទទួលផលល្អមែន ប៉ុន្តែក្លឹបសូលទីឡូអង្គរ ក៏បានបង្កើតឱកាសសម្រាប់ខ្លួនឱ្យក្លឹបបរទេសស្គាល់ផងដែរ។ ដើម្បីជាការត្រៀមចូលលេងលីគកំពូលរដូវកាលខាងមុខនេះ ពួកគេបាននាំចូលកីឡាករថ្មីៗ រួមទាំងបរទេសផងដែរ ក្នុងន័យរក្សាខ្លួននៅលីគកំពូលតែម្ដង។ អ្វីដែលកាន់តែពិសេសថែមទៀត ក្លឹបថ្មីមានមូលដ្ឋាននៅសៀមរាបមួយនេះ ក៏នឹងមានក្រុមអ្នកគាំទ្រ Ultra Siem Reap ផងដែរ ។
ដោយក្រុមអ្នកគាំទ្រ Ultra នេះ ក្លឹបផ្សេងៗហាក់ដូចជាមិនទាន់អាចបង្កើតបាននៅឡើយទេ សូម្បីតែជម្រើសជាតិកម្ពុជាក៏មិនទាន់មានជាផ្លូវការផង។ ពាក្យថាUltra នេះ គឺសំដៅទៅលើក្រុមអ្នកគាំទ្រ ដែលស្រលាញ់ក្លឹបពិតប្រាកដ មានការគាំទ្រដោយមិនគិតពីជ័យជម្នះ និងទៅគាំទ្រគ្រប់ទីកន្លែង អមជាមួយសំលៀកបំពាក់និងកន្សែងដូចៗគ្នាផងដែរ។
ដើម្បីតាំងខ្លួនជាក្លឹបអាជីពមួយ ក្លឹបសូលទីឡូអង្គរ ក៏កំពុងតែជ្រើសរើសថ្នាលយុវជនរបស់ខ្លួន ព្រោះក្លឹបមួយខ្លាំងបានទាល់តែមានថ្នាលល្អ គ្រប់កម្រិតដើម្បីអភិវឌ្ឍយុវជនទៅថ្ងៃអនាគត៕