ត្រូវចិត្តអ្នកលេង VG និង Asphalt ស្ដូក Razor ចេញដៃដាក់ទូរសព្ទលេងហ្គេមបានយ៉ាងឡូយ!

2018-12-27 02:08:50
ចំនួនមតិ 0 | ចំនួនចែករំលែក 0

ចន្លោះមិនឃើញ

នាពេលថ្មីៗនេះ ក្រុមហ៊ុនផលិតកុំព្យូទ័រ ទូរសព្ទ និងគ្រឿងសម្រាប់លេងហ្គេមលំដាប់ពិភពលោក Razor បានបញ្ចេញផលិតផលថ្មីមួយជាដៃលេងហ្គេមដែលអាចដាក់ទូរសព្ទពួក Android សឹងគ្រប់ប្រភេទបាន ដោយមានឈ្មោះថា Razor Raiju Mobile។

Razor Raiju Mobile អាចឲ្យអ្នកដាក់ភ្ជាប់ទូរសព្ទ ហើយផ្អៀងបាន ៦០ ដឺក្រេទៅតាមប្រភេទហ្គេម និងចំណង់ចំណូលចិត្តអ្នកប្រើប្រាស់ ហើយអ្វីដែលកាន់តែពិសេសទៀតនោះ អ្នកលេងហ្គេមលើទូរសព្ទ នឹងទទួលបានបទពិសោធន៍ដូចការលេងហ្គេមលើម៉ាស៊ីន Console ដូច្នោះដែរ។ ដៃ Razor Raiju Mobile នេះមានប៊ូតុង ៤ ដែលអាចកែតាមចិត្តចង់អ្នកប្រើប្រាស់ អាចកំណត់ឲ្យបាញ់រះ ហើយនឹងប៊ូតុងមួយដាច់សម្រាប់ឲ្យអ្នកលេងផ្ដាច់ឬភ្ជាប់ឧបករណ៍របស់ខ្លួន។

អ្នកលេងអាចភ្ជាប់ទូរសព្ទ Android របស់ខ្លួនជាមួយនឹងដៃ Razor Raiju Mobile នេះតាមរយៈ Bluetooth ឬក៏អាចប្រើខ្សែ USB-C ដែលមានស្រាប់មកជាមួយនឹងដៃហ្គេម។ ការសាកថ្មម្ដងៗដៃ Razor Raiju Mobile អាចលេងហ្គេមបានដល់ទៅជាង ២៣ ម៉ោងឯណោះ ហើយវាគាំទ្រជាមួយហ្គេមជាច្រើនប្រភេទ ដូចជា Vain Glory (VG) និងហ្គេមប្រណាំងឡាន Asphalt ជាដើម។

ដៃបញ្ជា Razor Raiju នេះ ត្រូវបានធ្វើឡើងដោយយកលំនាំពី Rarzor Raiju Controller ដែលប្រើសម្រាប់លេងលើ PS4។ តាមការពិត Raiju Mobile នេះត្រូវចេញមកពិសេសសម្រាប់ជាគួជាមួយនឹងកំពូលស្មាតហ្វូនលេងហ្គេមរបស់ Razor គឺ Razor Phone 2 ប៉ុន្តែវាទើបតែមានឲ្យកុម្ម៉ង់ជាង ១០ ថ្ងៃមុនប៉ុណ្ណោះ ហើយនឹងមានលក់រាយនាដើមឆ្នាំក្រោយ ក្នុងតម្លៃប្រហែល ១៥០ ដុល្លារ (ទីផ្សារបរទេស)។

ចុចអាន៖

ប្រភព៖ theverge ប្រែសម្រួល៖ ផាត សុវត្ថិ