លោក Bill Gates ថាការសម្រេចចិត្តរបស់លោក ដូណាល់ ត្រាំ ពេលនេះគ្រោះថ្នាក់បំផុត

2020-04-15 06:24:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រធានាធិបតីអាមេរិក លោក ដូណាល់ ត្រាំ បានប្រកាសនៅថ្ងៃអង្គារ ទី១៤ ខែមេសា ឆ្នាំ២០២០ អំពីការផ្អាកផ្តល់មូលនិធិរបស់សហរដ្ឋអាមេរិក ដល់អង្គការសុខភាពពិភពលោក ពីព្រោះលោកនិយាយថា អង្គការនេះបានបិទបាំងភាពធ្ងន់ធ្ងរនៃជំងឺកូវីដ១៩ នៅក្នុងប្រទេសចិន មុនពេលវារីករាលដាលពាសពេញពិភពលោក។

ទាក់ទងនឹងការប្រកាសដ៏គួរឲ្យភ្ញាក់ផ្អើលនេះដែរ លោក Bill Gates សហស្ថាបនិក Microsoft បានបញ្ចេញមតិតាមរយៈគណនី Twitter ផ្លូវការថា ៖ "ការផ្អាកផ្ដល់មូលនិធិសម្រាប់អង្គការសុខភាពពិភពលោក (WHO) អំឡុងវិបត្តិសុខភាពសកលបែបនេះ គឺគ្រោះថ្នាក់ខ្លាំងបំផុត។ ការងាររបស់ពួកគេ (WHO) គឺជួយពន្យឺតល្បឿននៃការរាតត្បាតជំងឺកូវីដ១៩ ហើយប្រសិនបើពួកគេឈប់ គឺគ្មានអង្គការណាអាចជំនួសពួកគេបានឡើយ។ ពិភពលោកនាពេលនេះគឺត្រូវការ WHO ខ្លាំងជាងពេលណាៗទាំងអស់។”

មហាសេដ្ឋី Bill Gates សហស្ថាបនិក Microsoft ធ្លាប់បានព្រមានពិភពលោកកាលពី ៥ឆ្នាំមុន អំពីជំងឺរាតត្បាតដែលនឹងចូលមកដល់ ហើយកាលពីថ្មីៗកន្លងទៅលោកបានប៉ាន់ស្មានថានៅខែកញ្ញា ឆ្នាំ ២០២១ ទើបមានវ៉ាក់សាំងការពារជំងឺកូវីដ១៩ដ៏មានប្រសិទ្ធភាព៕

ប្រភព៖ Twitter ប្រែសម្រួល៖ សុខហេង