បន្ទះឈីប Samsung ថ្មីទើបចេញក្ដៅៗ មានម៉ាកទូរសព្ទផ្សេងយកប្រើមុនគេបាត់

2020-05-26 04:04:11
ចំនួនមតិ 0 | ចំនួនចែករំលែក 0

ចន្លោះមិនឃើញ

Samsung បានបង្ហាញចេញបន្ទះឈីបកម្រិតកណ្ដាលថ្មី Exynos 880 កាលពីប៉ុន្មានម៉ោងមុននេះ។ ពេលនេះស្មាតហ្វូនដំបូងដែលប្រើឈីបថ្មីនេះ ក៏បានបង្ហាញមុខជាផ្លូវការដែរ នោះគឺ vivo Y70s ដែលវាជាស្មាតហ្វូន vivo ទីបួនប្រើប្រាស់ឈីប Exynos របស់ Samsung។

vivo V70s ដំណើរការដោយប្រព័ន្ធប្រតិបត្តិការ Android 10 និងប្រើប្រាស់ស្បែក Funtouch 10.0។ បន្ទះឈីប Exynos 880 គឺមានគាំទ្រនូវសេវា 5G ដែលគួបផ្សំជាមួយ RAM ជម្រើសទំហំ ៦GB និង ៨GB ហើយមានអង្គផ្ទុកទំហំ ១២៨GB។

អេក្រង់របស់វាមានទំហំ ៦,៥៣អ៊ីញ ជាប្រភេទ LCD អាចបង្ហាញរូបភាពក្នុងកម្រិត FullHD+ និងមានចោះរន្ធតូចលើអេក្រង់សម្រាប់បំពាក់កាមេរ៉ា Selfie។ នៅផ្នែកចំហៀងគឺមានបំពាក់ដោយទ្រនាប់ស្កេនម្រាមដៃ ហើយមានរន្ធបំពងសំឡេងបែប Stereo ផងដែរ។

ប្រព័ន្ធកាមេរ៉ាខាងក្រោយគឺមានបីគ្រាប់ ដោយកាមេរ៉ាមេមានទំហំ ៤៨MP, កាមេរ៉ាទីពីរទំហំ ៨MP ជាប្រភេទ Ultrawide និងកាមេរ៉ាទីបីទំហំ ២MP ជាកាមេរ៉ាវាស់ជម្រៅ។ កាមេរ៉ាមេមានសមត្ថភាពថតវីដេអូបានកម្រិត 4K/30fps។ ចំណែកកាមេរ៉ាមុខទំហំ ១៦MP អាចថតវីដេអូបានកម្រិត 1080p។

ថ្មរបស់ Y70s មានទំហំ ៤៥០០ mAh ដែលគាំទ្រការសាកថ្មល្បឿន ១៨វ៉ាត់។ vivo ក៏បានបង្អួតអំពីសមត្ថភាពលេងហ្គេមដ៏ខ្លាំងក្លាលើ Y70s ដោយសារឈីប Exynos 880 មានប្រើប្រាស់ GPU Mali G-76 MP5។

ចំពោះប្រភេទ RAM 6GB មានតម្លៃប្រមាណ ២៨០ដុល្លារ ចំណែកប្រភេទ RAM 8GB មានតម្លៃប្រមាណ ៣០៨ដុល្លារ ដែលវានឹងចេញលក់នៅចិនចាប់ពីថ្ងៃទី ១ ខែមិថុនា៕

ប្រភព៖ Sammobile ប្រែសម្រួល៖ សុខហេង