អៀង ចេនឡា បញ្ចេញរូប១សន្លឹកមើលមិនចង់ស្គាល់ រួមជាមួយសំណេរបង្ហាញពីការអន់ចិត្តរឿង១

2020-05-28 07:57:46
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅថ្ងៃត្រង់នេះ តារាសម្ដែង និងជាតារាកំប្លែង អៀង ចេនឡា បានបញ្ចេញរូបភាពអនុស្សាវរីយ៍ដ៏កម្រមួយមើលស្ទើរមិនស្គាល់ ព្រមជាមួយសារបង្ហាញពីការអន់ចិត្តខ្លះ ចំពោះរឿងដែលកើតឡើងចំពោះក្រុមតារារះពី Tik Tok។

រូបភាពមួយសន្លឹកនោះ គឺ ចេនឡា រួមជាមួយមិត្តភ័ក្ដិម្នាក់ទៀតឈរថតជាមួយគ្នាក្នុងសំលៀកបំពាក់ និងគូរមុខមាត់របៀបអ្នកកំប្លែង។ តាមការសាកសួរ ចេនឡា ប្រាប់ថា នេះជាអនុស្សាវរីយរបស់លោកកាលពីឆ្នាំ ២០០២ វេលាដែលលោកបានប្រឡងជាប់លេខ១ក្នុងកម្មវិធីមួយនៅតាមវិទ្យាល័យ។

"រូបហ្នឹង កាលខ្ញុំចូលប្រឡងជាប់លេខ១ក្នុងកម្មវិធីកំប្លែងប្រចាំសាលាឆ្នាំ ២០០២ កាលហ្នឹងសាលាមួយៗមានកម្មវិធីសិល្បៈសិស្ស ដែលរៀបចំដោយក្រសួងអប់រំយុវជន និងកីឡា ហើយកាលហ្នឹងខ្ញុំតំណាងឲ្យសាលាសន្ធរមុខ ហើយខ្ញុំបានជាប់លេខ១ផ្នែកកំប្លែងល្ខោននិយាយ និយាយអំពី "គ្រោះថ្នាក់នៃការជក់បារី" បង"។

បញ្ចេញរូបភាពនេះ តារាកំប្លែងកំពុងពេញនិយម បញ្ជាក់ថា ទម្រាំឈានដល់ចំណុចនេះ លោកបានឆ្លងកាត់ឧបសគ្គជាច្រើន ទម្រាំបានដូចសព្វថ្ងៃ។ "ខ្ញុំត្រូវឆ្លងកាត់ឧបសគ្គ ការតស៊ូជូរចត់ គ្រប់រសជាតិ ឆ្លងកាត់ការបណ្ដាលពីលោកគ្រូអ្នកគ្រូ និងសិល្ប:រៀមច្បងជាច្រើន ឆ្លងកាត់ការប្រលងដើម្បីទទួលបានពាន់រង្វាន់រាប់មិនអស់ ទើបអាចក្លាយជាអ្នកសិល្ប:មួយរូប ដែលទស្សនិកជនស្គាល់"។

ប៉ុន្តែវិលមកបច្ចុប្បន្ន អ្នកខ្លះ មិនមានស្នាដៃអ្វីទេ គ្រាន់តែលេង Tik Tok និង Facebook ក៏អាចដើរដល់ចំណុចមួយដែលលោកបានចាយពេលរាប់សិបឆ្នាំដែរ។ យ៉ាងណា តម្លៃក៏ទៅតាមនោះដែរ លោកថា "សម័យឥលូវគ្រាន់តែលេងTik Tok or Facebook ក៏អាចអោយគេលើកតម្កើងមកក្លាយជាអ្នកសិល្បៈបានដែរ តើតម្លៃនៃអ្នកសិល្បៈនៅកន្លែងណា ខ្ញុំមិនយល់ ហើយក៏កុំឆ្ងល់ថាហេតុអីគេមិនអោយតម្លៃអ្នកសិល្បៈ"។

រូបភាព ភ្ជាប់ជាមួយការអធិប្បាយខាងរបស់លោកតារាកំប្លែងមុខមាត់ស្រដៀងនាយ កុយ បានទទួលការគាំទ្រយ៉ាងច្រើនពីប្រិយមិត្ត ក៏ដូចជាអ្នកគាំទ្ររបស់លោក ក្នុងនោះអ្នកខ្លះបានកោតសរសើរចំពោះការខិតខំរបស់លោកក្នុងរយៈពេលជាច្រើនឆ្នាំមកនេះ។ ឯអ្នកខ្លះទៀត លើកទឹកចិត្តលោក ដោយស្នើកុំបាច់ខ្វល់ ព្រោះអ្នកសិល្បៈមួយចំនួន មិនមានគ្រឹះសិល្បៈដូចលោកឡើយ។

អៀង ចេនឡា បានចូលសិល្បៈតាំងពីឆ្នាំ ១៩៩៦ តាមរយៈប្រឡងចម្រៀងនៅទូរទស្សន៍ជាតិ ក្នុងកម្មវិធីទិវាកុមារអន្តរជាតិ ជាប់ចំណាត់ថ្នាក់លេខ៣។ លុះនៅឆ្នាំ ២០០២ បានប្រឡងជាប់លេខ១ក្នុងកម្មវិធីកំប្លែងប្រចាំសាលាឆ្នាំ និង ២០០៥ បានប្រឡងចម្រៀង ណេសកាហ្វេទូទាំងប្រទេស ជាប់ចំណាត់ថ្នាក់លេខមួយទៀត ផ្នែកចម្រៀងឆ្លងឆ្លើយ។ បន្ទាប់ពីនោះមក លោកចាប់ផ្ដើមអាជីពចម្រៀងតាមភោជនីយដ្ឋាន និងតាមកម្មវិធីទូរទស្សន៍នានា។

រូបភាព៖ហ្វេសប៊ុក ចេនឡា

ចុងក្រោយ ដោយសារនិស្ស័យចូលចិត្តនិយាយលេងសើច និងឱកាសមកដល់ផងលោកបានប្រែខ្លួនមកជាតារាកំប្លែងបន្ថែមមួយទៀត ក្រោមការផ្ចុងផ្ដើមដោយនាយ ក្រិន និងនាង ប្រឹមប្រិយ និងក្លាយជាតារាកំប្លែងពេញនិយមមួយរូបនាពេលបច្ចុប្បន្ន៕

អត្ថបទ៖ ទារិកា