រឿងទាំង១០ ដែលអ្នកមិនទាន់ដឹងពីអ្នកចាត់ការឆ្នើម Jurgen Klopp
- 2020-06-02 08:35:16
- ចំនួនមតិ 0 | ចំនួនចែករំលែក 0
រឿងទាំង១០ ដែលអ្នកមិនទាន់ដឹងពីអ្នកចាត់ការឆ្នើម Jurgen Klopp
ចន្លោះមិនឃើញ
លោក Jurgen Klopp ជាអ្នកចាត់ការក្រុមទូទៅល្អបំផុតមួយរូបនៅលើពិភពលោកនាពេលបច្ចុប្បន្ន និងជាអ្នកគ្រប់គ្រងដ៏អស្ចារ្យបំផុត កើតចេញពីប្រទេសអាល្លឺម៉ង់។
តើអ្វីខ្លះដែលអ្នកមិនធ្លាប់បានដឹងពីអ្នកចាត់ការក្រុម ដ៏មានប្រជាប្រិយភាពរបស់ហង្សក្រហម Liverpool? ខាងក្រោមនេះជារឿងទាំង១០ ដែល Sabay បានលើកយកមក ដូច្នេះសូមតាមដានដូចខាងក្រោម៖
១. Jurgen Klopp បានឈ្នះពានគ្រូបង្វឹកល្អប្រចាំឆ្នាំ ២ដង
អំឡុងពេលជោគជ័យខ្លាំងនៅ Borussia Dortmund លោក Klopp បានឈ្នះពានរង្វាន់គ្រូបង្វឹកល្អបំផុតប្រចាំឆ្នាំ (German Football Manager of the Year award) ចំនួន២ដង ក្នុងឆ្នាំ២០១១ និង២០១២។ កាលនោះលោកជាអ្នកចាត់ការទី២ ដែលបានឈ្នះពាននេះច្រើនជាង១ ចំណែកម្នាក់ទៀតគឺលោក Felix Magath។ យ៉ាងណាបច្ចុប្បន្ន លោកនៅតែជាអ្នកចាត់ការតែម្នាក់គត់ ដែលឈ្នះពាននេះរយៈពេល២ឆ្នាំជាប់គ្នា។
២. Klopp ជួយ Borussia Dortmund បំបែកកំណត់ត្រាពិន្ទុថ្មី
ដឹកនាំនៅ Dortmund បានធ្វើឱ្យលោកក្លាយជាអ្នកចាត់ការក្រុម ល្អបំផុតម្នាក់នៅក្នុងពិភពលោក។ ក្រោមការគ្រប់គ្រងរបស់លោក Dortmund ឈ្នះពានលីគកំពូល Bundesliga ២ដង។
ជ័យជម្នះរដូវកាលទី១ កើតឡើងក្នុងឆ្នាំ ២០១១-២០១២ ដោយមានកំណត់ត្រាពិន្ទុសរុបល្អបំផុត ៨១ ល្អជាង Bayern Munich នៅរដូវកាល ១៩៩៨-១៩៩៩ គឺមានត្រឹម ៧៨ប៉ុណ្ណោះ។
យ៉ាងណាកំណត់ត្រាននេះ មិនមានរយៈពេលវែងទេ ក្រោយនៅរដូវកាលបន្ទាប់ (២០១២-២០១៣) Bayern Munich ធ្វើរកបានដល់ទៅ ៩១ពិន្ទុ ដោយលទ្ធផលនេះមិនទាន់ មានក្លឹបណាអាចធ្វើបាននៅឡើយទេ។
៣. Bayern Munich ចង់ចុះកុងត្រាយក Klopp
Klopp ដឹកនាំបានល្អគួរសមពេលនៅក្លឹប FSV Mainz ដោយលោកបានដឹកនាំក្រុមនេះមកលេងនៅ Bundesliga ជាលើកដំបូងក្នុងប្រវត្តិសាស្ត្រក្លឹប។ លោកធ្វើឱ្យ Bayern Munich ចាប់អារម្មណ៍ និងចង់បាន ប៉ុន្តែ Klopp មិនបានចូលរួមជាមួយឡើយ ប៉ុន្តែបែរជាចូលមកក្លឹបគូប្រជែង Borussia Dortmund។ ក្នុងឆ្នាំ២០១៣ Bayern Munich បានយកឈ្នះក្រុម Dortmund របស់ Klopp ២-១ ក្នុងការប្រកួតវគ្គផ្ដាច់ព្រ័ត្រ។
៤. Jurgen Klopp ជាគ្រូបង្វឹកដឹកនាំ Dortmund ជោគជ័យ និងឈ្នះពានជាងគេបំផុត
Klopp នៅយូរជាងគេគឺ ៧ឆ្នាំ ឈ្នះពានចំនួន ៥ មាន Bundesliga ២ដង ឆ្នាំ២០១០-១១ និង ២០១១-១២ ពានរង្វាន់ DFB Pokal ១ដងឆ្នាំ ២០១១-១២ និង DFL Supercup ២ដងក្នុងឆ្នាំ២០១៣-២០១៤។
៥. Jurgen Klopp ជាគ្រូបង្វឹក Dortmund យូរជាងគេ
លោកក្លាយជាគ្រូរបស់ Dortmund ឆ្នាំ២០០៨ ជំនួសលោក Thomas Doll ដែលដឹកនាំក្រុមធ្លាក់ដល់លេខ១៣ នៅរដូវកាល ២០០៧-២០០៨។
Klopp គ្រប់គ្រងក្លឹបនេះអស់ ៧ ឆ្នាំ មុនចេញទៅដឹកនាំ Liverpool នៅឆ្នាំ២០១៥ លើសលោក Ottmar Hitzfeld ដឹកនាំបានតែ ៦ឆ្នាំប៉ុណ្ណោះ ចាប់តាំងពីឆ្នាំ ១៩៩១-១៩៩៧។
៦. មានអាជីពជាអ្នកព័ត៌មាន
ក្រៅពីជាអ្នកគ្រប់គ្រងក្នុងវិស័យបាល់ទាត់ Klopp ធ្លាប់ជាអ្នកព័ត៌មានអំឡុងការប្រកួតធំៗ។ ឆ្នាំ២០១៥ លោកជាអ្នកជំនាញ របស់បណ្ដាញទូរទស្សន៍អាល្លឺម៉ង់ ZDF និងធ្វើការជាអ្នកវិភាគការប្រកួត World Cup និង Euro ឆ្នាំ២០០៨។ ការងារជាអ្នកវិភាគ លោកធ្លាប់ទទួលបានពានរង្វាន់ Best Sports Show។ លោកចេញពី ZDF បន្ទាប់ពីជំនួសដោយ Oliver Kahn។ Klopp ក៏ធ្លាប់ធ្វើការឱ្យទូរទស្សន៍ក្នុងស្រុក RTL អំឡុង World Cup ឆ្នាំ២០១០ នៅអាហ្រ្វិកខាងត្បូង និងទទួលបាន German Television Award for Best Sports Show ជាលើកទី២។
៧. លោកជាទូតសុច្ឆន្ទៈតំណាងក្រុមហ៊ុនផលិតរថយន្ត Opel
Jurgen Klopp ជាទូតសុច្ឆន្ទៈតំណាងក្រុមហ៊ុនផលិតរថយន្ត Opel របស់អាល្លឺម៉ង់ ចាប់តាំងពីឆ្នាំ២០១២មក។
៨. Jurgen Klopp ជាអ្នកគាំទ្រក្រុមបាល់ទាត់អាល្លឺម៉ង់ Vfb Stuttgart កាលនៅក្មេង
កាលនៅក្មេង Klopp ជាអ្នកគាំទ្រក្រុមនៅស្រុកកំណើត Vfb Stuttgart ហើយធ្លាប់និយាយថា កីឡាករដែលគេចូលចិត្តគឺ Karlheinz Forster។
Forster ជាកីឡាករល្អបំផុតមួយរូបជំនាន់នោះ និងជាតារាឆ្នើមនៅ Vfb Stuttgart។ លោកជាក្រុមជម្រើសជាតិលេង Euro ឆ្នាំ ១៩៨០ និង១៩៨៤។
គេជាសមជិកលេង World Cup ឆ្នាំ ១៩៨២ និង១៩៨៦ ប៉ុន្តែអាល្លឺម៉ង់ចាញ់ការប្រកួតវគ្គផ្ដាច់ព្រ័ត្រទាំងពីរលើក។
៩. Jurgen Klopp មានសញ្ញាប័ត្រជាន់ខ្ពស់មួយ
ឆ្នាំ១៩៩៥ ពេលលេងឱ្យ FSV Mainz វ័យ២៨ឆ្នាំ Klopp ទទួលបានសញ្ញាប័ត្រកីឡា Sports Science នៅសាកលវិទ្យាល័យ Goethe University of Frankfurt។
១០. Jurgen Klopp ជាអ្នករកគ្រាប់បាល់បានច្រើឱ្យក្រុម FSV Mainz
មុនក្លាយជាអ្នកចាត់ការក្រុម FSV Mainz ខ្សែប្រយុទ្ធ Klopp បានលេងនៅទីនេះអស់១១ឆ្នាំ។ លោកបង្ហាញខ្លួនបាន ៣៤០លើក រកបាន ៥៦គ្រាប់ បញ្ជូនបាល់បាន ៦លើក។ មកដល់បច្ចុប្បន្ន លោកនៅតែជាអតីតកីឡាករទី៣ រកគ្រាប់បាល់បានច្រើនឱ្យ Mainz។ មានតែ ichael Thurk និង Sven Demandt ប៉ុណ្ណោះដែលរកបានច្រើនជាងលោក៕