ទីតាំង-ពេលវេលាល្អបំផុតធាក់កង់បានទាំងសប្បាយ និងសុខភាព មានពេលគួរសាកឲ្យគ្រប់រសជាតិម្ដង

2020-06-03 11:24:51
ចំនួនមតិ 0 | ចំនួនចែករំលែក 0

ចន្លោះមិនឃើញ

រៀងរាល់ឆ្នាំ នៅថ្ងៃ ទី ៣ ខែ មិថុនា ពិភពលោកទាំងមូល តែងប្រារព្ធទិវាធាក់កង់ពិភពលោក ដែលកាលបរិច្ឆេទនេះត្រូវបានសម្រេច និងប្រកាសជាផ្លូវការដោយមហាសន្និបាតសហប្រជាតិក្នុង ២០១៨ ។

ពិតណាស់ ការធាក់កង់មានជាង ២សតវត្សមកហើយ ហើយត្រូវបានទទួលស្គាល់ថា នេះជាកីឡាមួយប្រភេទដែលសាមញ្ញ ផ្តល់នូវភាពរំភើបរីករាយ កាត់បន្ថយភាពតានតឹង ល្អចំពោះសុខភាព និងថែមទាំងល្អចំពោះបរិស្ថានផងដែរ។

សម្រាប់អ្នកនិយមចូលចិត្តធាក់កង់ ពិតជាចូលចិត្តរកកន្លែងថ្មីៗ ឲ្យប្លែកភ្នែក ភ្លែកអារម្មណ៍ និងចង់ផ្លាស់ប្ដូរបទពិសោធន៍ជាច្រើនផងដែរ។ ដូចនេះឆ្លៀតពេលថ្ងៃសម្រាក ក៏ដូចជាអបអរទិវាធាក់កង់ផងដែរនោះលោកអ្នកអាចសាកល្បងជិះទៅកន្លែងទាំងនេះ ដោយសប្បាយរីករាយជាមួយមិត្តភ័ក្ដិ និងថតរួបលេងទុកជាអនុស្សាវរីយ៍ផង ដូចជា៖

១. ជិះនៅតាមដងទន្លេ ឆ្លៀតពេលហាត់ប្រាណ ក៏ដូចជាធាក់កង់ស្រូបយកខ្យល់អាកាសបន្ធូរអារម្មណ៍ ពីបញ្ហាស្មុគស្មាញទាំងឡាយ។ ម្យ៉ាងទីតាំងនេះក៏កំពុងពេញនិយមសម្រាប់អ្នកចូលចិត្តជិះលើផ្លូវបែបស្រួលៗ និងជិតៗ ។

នៅទីក្រុងភ្នំពេញ អ្នកអាចធាក់ មាត់ទន្លេនៅកោះពេជ្យ ផ្លូវមាត់ទន្លេក្រោយមហោស្រពចតុមុខ ផ្លូវមុខវាំង ឬ និងផ្លូវមាត់ទន្លេទៅខាងវិមានឈ្នះៗ ។

២. ជិះនៅតាមសួន ឬនៅកោះពេជ្រ ៖

នៅតាមបណ្ដាសួននៅទីក្រុងភ្នំពេញ ឃើញមានក្រុមធាក់កង់ជាច្រើនបានឡើងមកធាក់លេងជាប្រចាំ នេះបានទាំងកម្សាន្ត និងហាត់កីឡាផងដែរ។ ដូចជាគេនិយាយថា បានទាំងសុខភាពផ្លូវកាយ និងផ្លូវចិត្ត។ អ្នកអាចធាក់លេងនៅ សួនច្បារ វិមានឯករាជ្យ មុខវាំង មុខវត្តថបុទម កោះពេជ្យ ទៅវិមានឈ្នះឈ្នះ ។

៣. ផ្លូវភូមិ ៖

មិនសូវមានឡានម៉ូតូច្រើន មួយវិញទៀតអាចចំណេញដោយបានដឹងពីស្ថានភាពរស់នៅរបស់អ្នកស្រុកតាមភូមិ ប្លែកភ្នែក ភ្លែកអារម្មណ៍ ពិសេសបានស្គាល់ទិសតំបន់កន្លុកកន្លៀតនៅភ្នំពេញផង។ ឆ្លៀតឱកាសមើល ស្ថានភាពដីធ្លី និងតំបន់កំពុងអភិវឌ្ឍបានថែមទៀត។ ់

អ្នកអាចធាក់កង់ទៅទៅ ខាងព្រែកឯក តាមផ្លូវក្នុងៗ តាមមាត់ទឹក អ្នកនឹងអាចគយគន់ទេសភាពស្រស់ស្អាតប្លែកភ្នែក ឬ ក៏ធាក់តាមផ្លូវសួនសុបិន្ត ចាក់មកតាមតាខ្មៅដើម្បីចូលក្រុងវិញ ផ្លូវនេះចម្ងាយប្រមាណ ៣០គីឡូម៉ែត្រប៉ុណ្ណោះ។

បើចង់បានបរិយាកាសប្លែកបន្តិចតិច អាចជិះស្រឡាងទៅ ខាងអរិយក្សត្រ ទៅកោះដាច់ និង កោះអន្លង់ចិន ចម្ងាយផ្លូវនេះ ប្រមាណជា ៤០គីឡូម៉ែត្រប៉ុណ្ណោះពេលត្រលប់ចូលក្រុងវិញ ។

៤. ផ្លូវខ្សាច់ និង ថ្ម ៖

ផ្លូវប្រភេទនេះ បើជិះជាក្រុមកាន់តែសប្បាយ ព្រោះថាបើជិះតែផ្លូវស្រួល អាចនឹងមានអារម្មណ៍ធុញទ្រាន់ ឬមិនចង់ជិះក្បែរឡានម៉ូតូ ។ ផ្លូវបែបនេះ ឡានម៉ូតូចូលមិនកើត ឬមិនសូវប្រើទេ។ តែត្រូវដឹងថា ផ្លូវខ្សាច់ពិបាកធាក់កង់ណាស់ ត្រូវសារ៉េលីបមកធូរ ។

៥. ផ្លូវឡើងភ្នំ ៖

អ្នកអាចដឹកកង់របស់អ្នកតាមឡាន រួចចាំដល់ទីតាំងចាំចាត់ផ្តើមធាក់ក៏បាន។ ការធាក់កង់មិនគួរបង្ខំកម្លាំងខ្លាំងនោះទេ គួរជិះតាមសម្រួល ប្រសិនបើហត់ឈប់សម្រាកសិនចាំទៅតទៅមុខទៀត។ គួរចាំថា ដើម្បីជិះផ្លូខ្ពង់រាប ឬ តំបន់ភ្នំរួច ត្រូវប្រើកង់ ប្រភេទ Mountain Bike និងពូកែទប់លំហ្នឹង និងសារ៉េលីបកង់ឲ្យបានរហ័សផង ។

អ្នកចូលចិត្តធាក់កង់ ច្រើនធាក់ពីភ្នំពេញទៅ ភ្នំប្រសិទ្ធ , ទៅតំបន់ធម្មជាតិក្នុងខេត្តកំពង់ស្ពឺ ឬ គេយកកង់ទៅធាក់នៅ ខេត្តកំពត ឡើងភ្នំបូកគោ គីរីរម្យ និង រតនគីរី ឬ មណ្ឌលគីរី ព្រោះអាកាសធាតុត្រជាក់ស្រួលខ្លួន ។

៦ .ពេលវេលាល្អបំផុតសម្រាប់ធាក់កង់ ៖

ចំពោះពេលវេលា ដែលល្អបំផុតសម្រាប់ធាក់កង់នោះ គឺនៅពេលព្រឹក និងពេលល្ងាច ព្រោះថាអាកាសធាតុត្រជាក់ស្រួល និងមិនធ្វើឲ្យខូចស្បែក ឬ ឈឺក្បាលខ្លាំងដោយសារកម្តៅថ្ងៃ។ បើអ្នកចេញធាក់កង់ពីព្រឹកព្រហាម អ្នកអាចមើលឃើញថ្ងៃរះ ដ៏ស្រស់ស្អាត ហើយបើអ្នកធាក់ពេលល្ងាច កុំភ្លេចគយគន់ទេសភាពថ្ងៃលិច ដ៏ស្រស់ត្រកាលផង ដែលទេសភាពទាំងពីរនេះ នឹងផ្តល់ឲ្យអ្នកនូវអារម្មណ៍ស្រស់ស្រាយភ្លាមៗ បំភ្លេចអស់រាល់ទុក្ខកង្វល់ក្នុងចិត្ត។

ប៉ុន្តែប្រសិនបើជិះពេលល្ងាច គួរតែមានរបស់ការពារ និងឧបករណ៍ប្រើប្រាស់មួយចំនួន ដើម្បីសុវត្ថិភាព ៖

គួរមានអំពូលភ្លើងជាប់កង់ ការពារពេលងងឹត ( អំពូល ទាំងខាងមុខ និងខាងក្រោយ)
ត្រូវស្គាល់ផ្លូវឲ្យច្បាស់ ជៀសវាងវង្វេងនៅពេលយប់
គួរមានសោជួសជុលកង់ ខណៈកង់មានបញ្ហាណាមួយ
អាវដែលមានចំណាំងប្លាត ឬភ្លឺៗ
ជិះជាក្រុម មិនគួរជិះម្នាក់ឯងពេលល្ងាច ឬមេឃងងឹត ឬ ផ្លូវស្ងាត់ពេកឡើង។

ដើម្បីបានសុខភាពល្អ រាងកាយមាំមួនអ្នកគួរឧស្សាហ៍ហាត់ប្រាណ យ៉ាងហោចណាស់ ១ម៉ោងក្នុងមួយថ្ងៃ។ ប៉ុន្តែបើមាន គ្នាជិះកង់វិញ ដូចបាញ់ព្រួញមួយ បានសត្វពីរអ៊ីចឹង បានទាំងសុខភាពផ្លូវកាយ និងផ្លូវចិត្ត ៕

Manulife Cambodia គាំទ្រការស្រលាញ់សុខភាព

អត្ថបទ៖ លីដា

ពាក្យទាក់ទង