ផល ពិសាល៖ ខ្ញុំមិនរំពឹងផលប្រយោជន៍ផ្ទាល់ខ្លួន ដោយសារខ្ញុំឲ្យតម្លៃលើវប្បធម៌ចែករំលែក និងការធ្វើល្អបានល្អ
- 2020-06-06 03:52:49
- ចំនួនមតិ 0 | ចំនួនចែករំលែក 0
ផល ពិសាល៖ ខ្ញុំមិនរំពឹងផលប្រយោជន៍ផ្ទាល់ខ្លួន ដោយសារខ្ញុំឲ្យតម្លៃលើវប្បធម៌ចែករំលែក និងការធ្វើល្អបានល្អ
ចន្លោះមិនឃើញ
ស្របពេលនឹងការផ្ទុះឡើង និងការរីករាលដាលនៃជំងឺកូវីដ១៩ នៅលើសាកលលោក គម្រោងមួយរបស់ ធី អឹម អេហ្វ (TMF) ដែលមានឈ្មោះថា "ទាំងអស់គ្នា រួមគ្នា យើងនឹងឆ្លងផុតគ្រាលំបាកនេះជាមួយគ្នា" ក៏ត្រូវបានផ្ដួចផ្ដើមឡើង។
គម្រោងនេះបង្កើតឡើងក្នុងបុព្វហេតុសង្គមដោយមានទស្សនៈវិស័យប្រមូលផ្ដុំការចូលរួមពីគ្រប់វិស័យ ដើម្បីផ្ដល់ការគាំទ្រទៅនឹងតម្រូវការនានាពាក់ព័ន្ធនឹងសុវត្ថិភាពអនាម័យ និងសំដៅដោះស្រាយបញ្ហាប្រឈមផ្សេងៗ ដែលកំពុងកើតមានឡើងក្នុងសង្គម។
ទន្ទឹមនឹងលទ្ធផលវិជ្ជមាននេះ ដំណើរការគម្រោងក៏បានជួបប្រទះបញ្ហាចម្បងមួយពាក់ព័ន្ធនឹងការជ្រើសរើសយុវជនស្ម័គ្រចិត្ត។ បើទោះបីជាយុវជនស្ម័គ្រចិត្តគ្រប់រូបមានទំនុកចិត្តខ្ពស់លើការដឹកនាំរបស់ថ្នាក់ដឹកនាំទាំងមូល និងបរិស្ថានការងារសហភាព តែការព្រួយបារម្ភពីសំណាក់គ្រួសាររបស់ពួកគេមួយចំនួន ទាក់ទិននឹងសុវត្ថិភាពផ្ទាល់ខ្លួន បានក្លាយជាឧបសគ្គក្នុងការបន្តការងាររបស់ពួកគេ។
លោក ផល ពិសាល នាយកប្រតិបត្តិគម្រោងមូលនិធិម៉ានី ហៅកាត់ថា TMF បានឲ្យដឹងថា៖ "កន្លងមក ខ្ញុំអាចប្រមែប្រមូលអ្នកស្ម័គ្រចិត្តប្រមាណជា ២០០នាក់ ក្នុង១សប្ដាហ៍ ដើម្បីចូលរួមប្រតិបត្តិគម្រោងនានាបានដោយងាយស្រួល តែស្ថិតក្នុងកាលៈទេសៈប្រឈមនេះ វាធ្វើឲ្យមានការលំបាកខ្លះៗ ក្នុងការស្វែងរកអ្នកស្ម័គ្រចិត្ត ហើយយើងទទួលបានអ្នកស្ម័គ្រចិត្តមិនបានដល់ ១០នាក់ផងក្នុងមួយសប្ដាហ៍។ ការថមថយចំនួនយុវជនស្ម័គ្រចិត្តនេះ ជាយថាហេតុបានក្លាយជាបញ្ហាប្រឈមនៃកង្វះកម្លាំងស្នូលក្នុងប្រតិបត្តិការគម្រោង។ យ៉ាងនេះក្ដី ក្រុមការងារបានកំពុងខិតខំយ៉ាងស្វាហាប់ក្នុងការជ្រើសរើស និងបែងចែកកម្លាំងស្នូលដើម្បីឆ្លើយតបនឹងតម្រូវការគម្រោង"។
លោកបន្តថា៖ "ស្របពេលដែលមនុស្សគ្រប់គ្នាកំពុងជួបប្រទះ និងភ័យខ្លាចការឆ្លងជំងឺកូវីដ១៩នេះ ការជួយសង្រ្គោះពួកគាត់ពីការចម្លង និងទប់ស្កាត់ការរីករាលដាលនៃវីរុសនេះ គឺជារឿងល្អមួយដែលមនុស្សគ្រប់ៗរូបគួរធ្វើ ហើយសម្រាប់ខ្ញុំ និងក្រុមការងារ ពិតជាទទួលបានអារម្មណ៍ល្អបំផុត នៅពេលបានរួមចំណែកជួយដល់ជនរួមជាតិ។ បច្ចុប្បន្នយើងក៏បានឃើញពីលទ្ធផលវិជ្ជមានជាច្រើន ដែលកើតមានជាបណ្ដើរៗ បន្ទាប់ពីធ្វើគម្រោងមួយនេះ ទទួលបានជោគជ័យ"។
បច្ចុប្បន្នយុវជនស្ម័គ្រចិត្ត និងក្រុមហ៊ុនឯកជនមួយចំនួន បានចូលរួមទ្រទ្រង់ដល់គម្រោងមួយនេះ ដែលក្នុងនោះ កញ្ចប់អំណោយមនុស្សធម៌ចំនួន ១១០០០កញ្ចប់ ត្រូវបានបែងចែកផ្ដល់ជូនដល់សហគមន៍ចំនួន ១០៥ ទូទាំងរាជធានីភ្នំពេញ ដោយជោគជ័យ។ កញ្ចប់អំណោយនីមួយៗ មានដូចជា អង្ករចំនួន ៥គីឡូក្រាម សាប៊ូលាងដៃចំនួន ១ដុំ ទឹកស៊ីអ៊ីវចំនួន ១ដប និងទឹកភេសជ្ជៈចំនួន ១កំប៉ុង។
លោកពិសាល លើកឡើងទៀតថា "សម្រាប់ខ្ញុំផ្ទាល់ គឺមិនបានរំពឹងទុកនូវផលប្រយោជន៍ផ្ទាល់ខ្លួនណាមួយឡើយពីការអនុវត្តគម្រោងនេះ ដោយសារខ្ញុំតែងតែឲ្យតម្លៃលើវប្បធម៌ចែករំលែក និងការធ្វើល្អបានល្អ។ ខ្ញុំជឿជាក់យ៉ាងមុតមាំថា ការផ្ដល់ការទំនុកបម្រុងទៅកាន់សង្គមទាំងមូលជារឿងល្អគាប់ប្រសើរមួយ"។
សូមបញ្ជាក់ថា ក្រោយបញ្ចប់ការសិក្សាថ្នាក់អនុបណ្ឌិតផ្នែកច្បាប់អន្តរជាតិនៅប្រទេសបារាំង លោក ផល ពិសាល បានធ្វើមាតុភូមិនិវត្តន៍ មកបំពេញការងារក្នុងផ្នែកអភិវឌ្ឍច្បាប់ក្នុងប្រទេសកម្ពុជា និងបានចូលរួមសកម្មភាពក្នុងសហភាពសហព័ន្ធយុវជនកម្ពុជាវិញ។ បន្ថែមពីនេះ លោកក៏ជាជាសាស្រ្ដាចារ្យមួយរូបដែលបង្រៀននៅសាកលវិទ្យាល័យមួយ ក្នុងរាជធានីភ្នំពេញផងដែរ។ លោកធ្លាប់បានដឹកនាំគម្រោងសង្គមមួយចំនួន និងទទួលបានលទ្ធផលជាវិជ្ជមាន និងជោគជ័យជាច្រើន។ ជាក់ស្ដែងគម្រោងភ្នំពេញស្អាត ដែលជាយុទ្ធនាការផ្សព្វផ្សាយពីសារៈសំខាន់នៃអនាម័យក្នុងជីវភាពរស់នៅប្រចាំថ្ងៃរបស់មនុស្សទូទៅ ក្នុងប្រទេសកម្ពុជា៕