សៀន សុភក្ត្រា៖ ប៉ះក្រុមកាន់តែខ្លាំង យើងកាន់តែដឹងចំណុចខ្សោយយើងអីគេ

2020-07-08 08:14:48
ចំនួនមតិ 0 | ចំនួនចែករំលែក 0

ចន្លោះមិនឃើញ

សៀន សុភក្ត្រា បានបង្ហាញអារម្មណ៍ប្លែក ពេលក្លឹបអគ្គិសនីកម្ពុជា មិនប្រើកីឡាករបរទេស ដ្បិតក្រុមខ្លួនជួបឧបសគ្គខ្លះ ពេលប្រកួតជាមួយបណ្ដាក្រុមអាជីពសំបូរដោយកីឡាករបរទេសល្អៗ ក្នុងការប្រកួតដណ្ដើមពានរង្វាន់លីគកំពូលកម្ពុជា។ ទោះបីជាយ៉ាងណា អតីតយុវជនសាលាបាល់ទាត់ជាតិបាទី ថានេះជាឱកាសដ៏ល្អសម្រាប់គេក្នុងការអភិវឌ្ឍខ្លួន ហើយរីករាយប្រជែងលើទីលាន ដោយចាត់ទុកវាជាការដកស្រង់បទពិសោធន៍ដ៏ល្អបំផុត។

រូបភាពក្លឹបអគ្គិសនីកម្ពុជា

ខ្សែប្រយុទ្ធក្លឹបអគ្គិសនីកម្ពុជា សុភក្ត្រា បញ្ជាក់ ៖«ខ្ញុំមានអារម្មណ៍ប្លែកដែរ ពេលក្រុមរបស់ខ្ញុំអត់ប្រើប្រាស់កីឡាករបរទេស អ៊ីចឹងវាជាឱកាសល្អមួយដែលធ្វើឱ្យយុវជន ហើយកូនខ្មែរយើងមានឱកាសបានលេងច្រើន ប្រកួតប្រជែងច្រើន ហើយកុ្នុងនោះក៏មានផលពិបាកមួយចំនួនដែរ...ក្លឹបភាគច្រើនគេប្រើកីឡាករបរទេសមានកាយសម្បទារឹងមាំធំៗជាងយើង ជាហេតុផលមួយធ្វើឱ្យយើង ពិបាកក្នុងការប្រជែងជាមួយគេ ប៉ុន្តែវាមិនចោទជាបញ្ហាអីប៉ុន្មានទេ ហើយអ្វីខ្ញុំសប្បាយចិត្តកាលណាយើង ប៉ះក្រុមកាន់តែខ្លាំង ការអភិវឌ្ឍខ្លួនរបស់យើង វាកាន់តែល្អជាងមុន ព្រោះអីធម្មតាក្នុងការប្រកួតនីមួយៗ យើងតែងតែមានកំហុសហើយ អ៊ីចឹងយើងលេងប៉ះក្រុមកាន់តែខ្លាំង យើងកាន់តែដឹងថាចំណុចខ្សោយយើងអីគេ អ៊ីចឹងបន្ទាប់ពីការប្រកួតនេះមក យើងព្យាយាមកែកំហុស កុំឱ្យវាមានកំហុសដដែលៗ អ៊ីចឹងយើងអភិវឌ្ឍខ្លួនលឿនទៅតាមហ្នឹងដែរ»។

ទោះបីក្លឹបមិនប្រើកីឡាករបរទេស ប៉ុន្តែសៀនសុភក្ត្រាសប្បាយចិត្ត ពេលបានលេងនៅក្លឹបអគ្គិសនីកម្ពុជា ព្រោះក្លឹបនេះជាកន្លែងបណ្ដុះបណ្ដាលមួយសម្រាប់យុវជនកម្ពុជា ជាពិសេសគេមានឱកាសបង្ហាញសមត្ថភាពលើលានច្រើន។

សៀន សុភក្ត្រា ពន្យល់បែបនេះថា ៖«ទីមួយខ្ញុំស្រលាញ់ក្លឹបអគ្គិសនី ទីពីរគឺនៅទីនេះ ខ្ញុំគិតថាខ្ញុំអាចបង្ហាញខ្លួនបានច្រើនជាងក្លឹបផ្សេងៗ»។

បើតាមសម្ដីរបស់គ្រូបង្គោល មាស សំអឿន កាលពីដើមឆ្នាំ ក្លឹបអគ្គិសនីកម្ពុជាមិនប្រើកីឡាករបរទេសទេ ព្រោះក្លឹបចង់អភិវឌ្ឍយុវជនកម្ពុជាឱ្យមានសមត្ថភាពល្អ ដើម្បីជាធន់ធានប្រជែងជាមួយបណ្ដាប្រទេសជិតខាង ក៏ដូចជាការប្រកួតកម្មវិធីនានានៅកម្ពុជា ព្រោះយល់ថាក្លឹបធំៗនៅ MCL តែងប្រើកីឡាករបរទេសជាជាងកីឡាករខ្មែរ។

ខ្សែប្រយុទ្ធ សៀន សុភក្ត្រា បានចូលធ្វើតេស្តជាប់នៅសាលាបាល់ទាត់ជាតិបាទីនៅឆ្នាំ២០១៤ ហើយរូបគេFធ្លាប់លេង U16 U18 និង U19។ ចុងឆ្នាំ២០១៨ គេបានផ្លាស់ទៅកាន់ក្លឹបអគ្គិសនីកម្ពុជា រហូតមកដល់បច្ចុប្បន្ន។ ឆ្លងកាត់ប៉ុន្មានប្រកួតមកនេះ គេទើបរកបានមួយគ្រាប់ប៉ុណ្ណោះ គឺស៊ុតបញ្ចូលទីក្លឹបអង្គរថាយហ្គឹរ ជួយឱ្យអគ្គិសនីកម្ពុជា ២-២ កាលពីពេលថ្មីៗនេះ៕

អត្ថបទ៖ អ៊ុំ សុភក្តិ