សម្លឹងមើលទូរសព្ទពេលយប់ប៉ះពាល់ភ្នែក ដេកអត់លក់ គួរធ្វើបែបណា?
- 2020-07-22 09:13:51
- ចំនួនមតិ 0 | ចំនួនចែករំលែក 0
សម្លឹងមើលទូរសព្ទពេលយប់ប៉ះពាល់ភ្នែក ដេកអត់លក់ គួរធ្វើបែបណា?
ចន្លោះមិនឃើញ
ការសម្លឹងមើលអេក្រង់ឧបករណ៍អេឡិចត្រូនិកដូចជាស្មាតហ្វូន ឬ ថេប្ល៊ែតនៅពេលយប់វាជាបញ្ហាបង្កឲ្យដេកពុំលក់ ព្រោះថាពន្លឺពណ៌ខៀវដែលចេញពីអេក្រង់ឧបករណ៍ទាំងនោះ វារំខានដល់ការផលិតអ័រម៉ូនម៉េឡាតូនីន (Melatonin) (ជាអ័រម៉ូនមួយប្រភេទត្រូវបានផលិតឡើងដោយខួរក្បាល នៅពេលយប់ ឬក្នុងស្ថានភាពងងឹត ហើយវាប្រាប់ឲ្យរាងកាយបានដឹងថាវាជាពេលយប់និងជាពេលដែលត្រូវដេក)។ ដូច្នេះដើម្បីការពារនូវការប៉ះពាល់នេះ សូមអនុវត្តតាមគន្លឹះខាងក្រោម៖
១. ឈប់ប្រើមុនពេលចូលគេង ២ ម៉ោង
រៀងរាល់មុនពេលចូលគេងរយៈពេល២ម៉ោង អ្នកប្រើប្រាស់គួរបញ្ឈប់ការប្រើ ឬសម្លឹងមើលទៅអេក្រង់ ស្មាតហ្វូន ឬ ថេប្ល៊ែត។ រាងកាយរបស់មនុស្សចាប់ផ្ដើមបង្កើតអ័រម៉ូនម៉េឡាតូនីនប្រហែលជាមុនពីរម៉ោងប៉ុណ្ណោះមុនម៉ោងចូលគេង។ មានន័យថា បើទម្លាប់ចូលគេងគឺម៉ោង ១២ ដូច្នេះរាងកាយនឹងមិនចាប់ផ្ដើមផលិតអ័រម៉ូនម៉េឡាតូនីនមុនម៉ោង ១០ នោះទេ។ ដូច្នេះគួរតែបញ្ឈប់ការប្រើប្រាស់ឧបរណ៍ទាំងនោះពីរម៉ោងមុនម៉ោងចូលគេង ដើម្បីកុំឲ្យរំខានដល់ការផលិតអ័រម៉ូនម៉េឡាតូនីន។
២. គួរប្រើឧបករណ៍មានផ្ទៃអេក្រង់តូច បើកាលណាការសម្លឹងមើលផ្ទៃអេក្រង់កាន់តែធំ វានឹងទទួលពន្លឺក៏កាន់តែខ្លាំងដែរ ជាពិសេសពន្លឺពណ៌ខៀវដែលចេញពីអេក្រង់ដែលជាហេតុធ្វើឲ្យមានផលប៉ះពាល់កាន់តែខ្លាំងផងដែរ។
៣. បន្ថយពន្លឺអេក្រង់
ជាមួយគ្នានោះដែរ បើកាលណាពន្លឺចេញពីអេក្រង់កាន់តែភ្លឺ វាអាចជះឥទ្ធិពលកាន់តែខ្លាំងដល់ភ្នែក ហើយនឹងនាំឲ្យមានការរំខានកាន់តែខ្ពស់ដល់ការផលិតអ័រម៉ូនម៉េឡាតូនីនកាន់តែច្រើនផងដែរ។ ដូច្នេះគួរបន្ថយពន្លឺអេក្រង់ឲ្យស្ថិតក្នុងកម្រិតសមរម្យមួយដើម្បីជួយកាត់បន្ថយនូវចំនួនពន្លឺពណ៌ខៀវដែលជះចូលភ្នែក។
៤. ប្រើ Kindle ជំនួស
ជាការពិតណាស់នៅពេលប្រើប្រាស់ឧបករណ៍អេឡិចត្រូនិកដែលមានពន្លឺខ្លាំងនៅពេលយប់ វានឹងធ្វើឲ្យមានការរំខានដល់ការគេង ដូច្នេះអ្នកប្រើប្រាស់អាចងាកមកប្រើប្រាស់ឧបករណ៍អេឡិចត្រូនិកផ្សេងជំនួស ដែលមិនបញ្ចេញពន្លឺខ្លាំង។ ជាក់ស្ដែងដូចជាឧបករណ៍ Kindle ជាដើមដែលយើងអាចប្រើវាសម្រាប់ការអានសៀវភៅបាន។
៥. ប្រើកម្មវិធីជំនួយដើម្បីជួយសម្រួលពន្លឺ
បើនិយាយពីកម្មវិធីជួយសម្រួលពន្លឺវិញ គឺមានកម្មវិធីមួយចំនួនដែលអាចប្រើបានជាមួយនឹងទូរសព្ទស្មាតហ្វូន និងថេប្ល៊ែត ដោយកម្មវិធីទាំងនោះអាចជួយសម្រួលនូវអាំងតង់ស៊ីតេពណ៌នៃការជះពន្លឺចេញពីអេក្រង់។ កម្មវិធីដែលអាចប្រើបានមានដូចជា f.lux ដោយវាអាចសម្រួលពន្លឺ និងពណ៌បានដោយស្វ័យប្រវត្តិដោយផ្អែកទៅតាមពន្លឺថ្ងៃ។ ចំណែកឯកម្មវិធីមួយផ្សេងទៀតនោះគឺ Night Filter ដែលមានមុខងារដូចគ្នាដែរ។
៦. ពាក់វ៉ែនតាការពារពន្លឺ
ជំនួសដោយការប្រើកម្មវិធីដើម្បីសម្រួលពន្លឺ អ្នកប្រើប្រាស់អាចធ្វើការជ្រើសរើសការប្រើប្រាស់នូវវ៉ែនតាការពារពន្លឺបាន ដោយវ៉ែនតាប្រភេទនេះអាចជួយការពារ និងជួយរារាំងពន្លឺពណ៌ខៀវមិនឲ្យចូលដល់ប្រស្រីភ្នែកបាន។
៧. ចេញក្រៅឲ្យបានច្រើននៅពេលថ្ងៃ
ការដើរចេញក្រៅនៅពេលថ្ងៃបានច្រើនក៏ជាផលល្អមួយផងដែរដើម្បីឲ្យការគេងនៅពេលយប់បានស្រួល ព្រោះថាវាធ្វើឲ្យរាងកាយទទួលបានពន្លឺពណ៌ខៀវធម្មជាតិបានច្រើន និងអាចប្រឆាំងទៅនឹងការប៉ះពាល់ពន្លឺពណ៌ខៀវចេញពីអេក្រង់ឧបករណ៍អេឡិចត្រូនិចនៅពេលយប់បានថែមទៀតផង។ ទោះបីជាពន្លឺពណ៌ខៀវវាមានផលប៉ះពាល់នៅពេលយប់មែន ប៉ុន្តែវាក៏មានផលល្អផងដែរជាពិសេសគឺវាមានផលល្អសម្រាប់មុខងារជីវសាស្ត្រ។ ពន្លឺពណ៌ខៀវមានមុខងារឲ្យដំណឹងប្រាប់ទៅកាន់រាងកាយឲ្យដឹងថាវាជាពេលថ្ងៃ ហើយវាជាពេលដែលត្រូវធ្វើការ។ ប៉ុន្តែវាអាចជាផលអាក្រក់នៅពេលដែលយើងទទួលវាច្រើនពេកនៅពេលយប់ព្រោះវានឹងប្រាប់ឲ្យរាងកាយរបស់យើងមិនឲ្យដេក៕
ប្រភព៖ fastcompany