សុខ ធី កំពុងសម្រុកហាត់នៅថៃ ត្រៀមប៉ះ Mongkolpetch នៅ ONE
- 2020-08-07 05:07:13
- ចំនួនមតិ 0 | ចំនួនចែករំលែក 0
សុខ ធី កំពុងសម្រុកហាត់នៅថៃ ត្រៀមប៉ះ Mongkolpetch នៅ ONE
ចន្លោះមិនឃើញ
សុខ ធី នឹងត្រូវឡើងសង្វៀន ONE ជាថ្មី ដោយប៉ះជើងខ្លាំងថៃ Mongkolpetch Petchyindee Academy ក្នុងកម្មវិធី ONE: NO SURRENDER III នាថ្ងៃទី២១ ខែសីហា នៅរាជធានីបាងកក ប្រទេសថៃ។
បច្ចុប្បន្ននេះ សុខ ធី កំពុងហ្វឹកហាត់យ៉ាងខ្លាំងក្លា ធ្វើយ៉ាងណា អាចរកជ័យជម្នះលើកដំបូងក្នុងសង្វៀនលំដាប់អន្តរជាតិមួយនេះ ខណៈ ៣ប្រកួតកន្លងមក សុខ ធី ចាញ់រហូត គឺចាញ់ Lerdsila ២ដង និងចាញ់ Rodtang ម្ដង។
លោក សាន សៅយ៉ាន់ ដែលជាគ្រូបង្វឹករបស់សុខ ធី នៅកម្ពុជា បានថ្លែងប្រាក់គេហទំព័រ ONE ជាភាសាខ្មែរថា៖ "និយាយទៅ សុខ ធី ខំប្រឹងហាត់យូរហើយ ហើយពេលមានឈ្មោះវ៉ៃគេកាន់តែប្រឹងទ្វេឡើង។ ខ្ញុំជឿថា សមត្ថភាពគេល្អជាងមុន ព្រោះហាត់នៅថៃជាប់លាប់ល្អ។ ប្រៀបធៀបសមត្ថភាពជើងខ្លាំងកម្ពុជា និងម្ចាស់ផ្ទះត្រូវបានគ្រូបង្វឹករូបនេះលើកឡើងថា Mongkolpetch មានបទពិសោធ និងចាស់វស្សាច្រើនជាង សុខ ធី"។
លោកសៅយ៉ាន់ បន្តថា៖ "គេល្អជាងយើង តែមិនដាច់ឆ្ងាយខ្លាំងទេ។ គ្រាន់តែកាយសម្បទាគេមានប្រៀបតិចតួច ហើយទម្ងន់គេលើយើង ព្រោះយើងទម្លើងគីឡូវ៉ៃជាមួយ។ និយាយទៅ គូនេះល្អ គួរឲ្យចាប់អារម្មណ៍ អាចស៊ីសងគ្នាបាន"។
សូមបញ្ជាក់ថា សុខ ធី បានទៅហ្វឹកហាត់នៅថៃ ក្នុងក្លឹប Paedminburi Gym យូរដែរមកហើយ ពោលគឺតាំងពីដឹងថាមានឈ្មោះប្រកួតមកម្ល៉េះ។
អ្នកប្រដាល់មកពីខេត្តបន្ទាយមានជ័យរូបនេះ បាននិយាយប្រាប់វិបសាយ ONE ថា៖ "ខ្ញុំបានហ្វឹកហាត់យូរដែរ តាំងពីមុនមានឈ្មោះប្រកួត។ អ្វីដែលខ្ញុំប្រឹងហាត់ខ្លាំង គឺបង្កើនទម្ងន់អាវុធរបស់ខ្ញុំ។ និយាយទៅ រាងកាយខ្ញុំមានលក្ខណៈពេញល្អ ហើយកម្លាំងស៊ុហ្វក៏អត់អីទេ។ ការហ្វឹកហាត់នៅទីនេះល្អ មានដៃគូឡាំរាល់ថ្ងៃ។ ខ្ញុំបានកំពុងហ្វឹកហាត់យ៉ាងទៀងទាត់ ដើម្បីត្រៀមខ្លួនប្រកួតខាងមុខនេះ"។
គួរដឹងផងដែរថា Mongkolpetch ជាអ្នកប្រដាល់ថៃកំពុងឡើងដៃមកពីក្លឹប Petchyindee Academy ដែលធ្លាប់ជាប់ជាអ្នកប្រដាល់ល្អបំផុតប្រចាំឆ្នាំ ២០១៧ នៅប៉ុស្តិ៍លេខ ៧ ថៃ។ មុនចូលសង្វៀន ONE អ្នកប្រដាល់វ័យ ២៥ឆ្នាំ មកពីខេត្តរ៉យអេតរូបនេះ ធ្លាប់ឈ្នះខ្សែក្រវាត់ទម្ងន់ ១៣០ផោន (៥៩គីឡូក្រាម) ប្រចាំសង្វៀន Lumpinee កាលពីឆ្នាំ២០១៧ និងឈ្នះជើងឯកប្រដាល់ម៉ារ៉ាតុង ទម្ងន់ ១៤០ផោន (៦៣,៥គីឡូក្រាម) កាលពីឆ្នាំ២០១៨ ផងដែរ។ វាយ២ប្រកួតនៅ ONE កន្លងមក គឺឈ្នះទាំងប្រកួត៕
ចុចអាន៖ មកមើលសមត្ថភាពរបស់ Mongkolpetch មុនប៉ះ សុខ ធី នៅសង្វៀន ONE
ចុចអាន៖ ច្បាស់១០០%! សុខ ធី ជួប Mongkolpetch វាយតំណែងគូឯករងនៅ ONE