អ្នកប្រើ iOS 14 ត្រូវដឹងរឿងពីក្រោយ សញ្ញាពណ៌ទឹកក្រូច និងពណ៌បៃតងដែលបង្ហាញចេញមក
- 2020-09-21 02:29:18
- ចំនួនមតិ 0 | ចំនួនចែករំលែក 0
អ្នកប្រើ iOS 14 ត្រូវដឹងរឿងពីក្រោយ សញ្ញាពណ៌ទឹកក្រូច និងពណ៌បៃតងដែលបង្ហាញចេញមក
ចន្លោះមិនឃើញ
iOS 14 មានបន្ថែមនូវមុខងារថ្មីៗជាច្រើន ហើយក៏មានកែសម្រួលលើចំណុចតូចៗជាច្រើនផងដែរ។ អ្នកប្រើ iOS 14 ប្រហែលជាបានសង្កេតឃើញសញ្ញាថ្មីមានរាងមូលពណ៌ទឹកក្រូច និងពណ៌បៃតង ដែលបង្ហាញខ្លួននៅរបារបង្ហាញដំណឹង ដែលស្ថិតនៅផ្នែកលើខាងស្ដាំក្បែរកន្លែងបង្ហាញបរិមាណថ្ម។ តាមពិតទៅសញ្ញាទាំងពីរនេះ គឺជាសញ្ញាឲ្យដំណឹងដែលជួយឲ្យអ្នកការពារភាពឯកជនបានល្អប្រសើរជាងមុន។
សញ្ញាពណ៌ទឹកក្រូចមានន័យថា មានកម្មវិធីលើទូរសព្ទរបស់អ្នកកំពុងប្រើប្រាស់រន្ធស្រូបសំឡេង។ រន្ធស្រូបសំឡេងនេះអាចប្រើដើម្បីស្ដាប់សំឡេង និងអាចថតសំឡេងបានផងដែរ។ ជាធម្មតាវាបង្ហាញចេញនៅពេលអ្នកប្រើប្រាស់ Siri ឬពេលអ្នកធ្វើការហៅចេញជាដើម ដែលរន្ធស្រូបសំឡេងត្រូវការស្រូបយកសំឡេងរបស់អ្នក។
ប្រសិនបើសញ្ញាពណ៌ទឹកក្រូចនេះលេចចេញនៅពេលអ្នកប្រើកម្មវិធី ដែលមិនសមថានឹងប្រើរន្ធស្រូបសំឡេង ដូចជាពេលអូស Facebook លេង ឬមើល YouTube ជាដើម វាមានន័យថាកម្មវិធីនោះបានល្មើសនឹងភាពឯកជនរបស់អ្នក។
សញ្ញាពណ៌បៃតងបង្ហាញនៅពេលដែលកម្មវិធីណាមួយប្រើប្រាស់កាមេរ៉ា ដូចជាពេលកំពុងថតរូបភាព ឬវីដេអូជាដើម។ ពេលដែលប្រើប្រាស់កាមេរ៉ា មានន័យថារន្ធស្រូបសំឡេងក៏ត្រូវបានប្រើដូចគ្នា ប៉ុន្តែអ្នកនឹងមិនឃើញសញ្ញាពណ៌ទឹកក្រូចលេចចេញមួយទៀតនោះទេ។
ប្រសិនបើកម្មវិធីណាមួយប្រើប្រាស់កាមេរ៉ាដោយមិនសមទំនង ប្រហែលជាមានន័យថាកម្មវិធីនោះបានរំលោភភាពឯកជនរបស់អ្នក។ គួរដឹងថាសញ្ញាពណ៌បៃតងនេះមិនមានន័យថារូបភាពដែលកាមេរ៉ាមើលឃើញត្រូវបានថត ឬរក្សាទុកនោះទេ អ្វីដែលប្រព័ន្ធប្រតិបត្តិការ iOS អាចដឹងបាននោះ គឺកម្មវិធីនោះបានប្រើប្រាស់កាមេរ៉ា៕