អោក សំនាង៖ ជាការលើកទឹកចិត្តធំធេងណាស់ ពេលប្រធានសហព័ន្ធចុះផ្ទាល់ដល់ក្លឹបបែបនេះ

2020-10-08 08:08:48
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្រូបង្វឹករបស់ក្លឹបក្ដីចាស់ អោក សំនាង ថាការចុះមកដល់ក្លឹបផ្ទាល់នៅបាក់ខែងនេះ ពិតជាមោទកភាព និងរឹតតែធ្វើឲ្យខ្លួនមានការខំប្រឹងបន្ថែមទៀតក្នុងការបណ្ដុះបណ្ដាលធនធានថ្នាលថ្មីៗដើម្បីរួមចំណែកឲ្យ ITF កាន់តែខ្លាំង។

លោកគ្រូ អោក សំនាង (រាប់ពីស្ដាំមកទី២)

អោក សំនាង បានឲ្យដឹងថា ក្លឹបក្ដីចាស់នេះគឺបង្កើតឡើងតាំងពីឆ្នាំ២០១៥ មកម្ល៉េះ និងបណ្ដុះបានកីឡាករចូលក្នុងជម្រើសជាតិឈុតធំ និងថ្នាលជាច្រើននាក់មកហើយ។ បច្ចុប្បន្ននេះក្លឹបកំពុងបណ្ដុះថ្នាលក្មេងៗជាច្រើនទៀតផងដែរ។

គ្រូបង្វឹក និងជាកីឡាករជម្រើសជាតិ ITF ខាងលើនេះបន្តប្រាប់ទៀតថា កាលពីថ្ងៃសៅរ៍សប្ដាហ៍មុននេះ ក្លឹបបានធ្វើពិធីប្រកួតដំឡើងខ្សែក្រវាត់ដល់កីឡាកររបស់ខ្លួនផងដែរ ខណៈមានការអញ្ជើញចូលរួមពីឯកឧត្ដម កែវ រ៉េមី ប្រធានសហព័ន្ធទៀតផង។

ទិដ្ឋភាពថ្នាក់ដឹកនាំ ITF ថតរូបជុំគ្នា

កាផ្ដល់វត្តមានផ្ទាល់ ក៏ដូចជាការផ្ដល់អនុសាសន៍ផ្សេងៗដល់ក្លឹបក្ដីចាស់នេះ ពីសំណាក់ប្រធានសហព័ន្ធគឺពិតជាមានសារសំខាន់ និងជាការលើកទឹកចិត្តខ្លាំងមែនទែនចំពោះសិស្សគុនក្នុងក្លឹបឲ្យខំប្រឹងប្រែងហ្វឹកហាត់ ដើម្បីជាធនធានជួយរកមេដាយជូនប្រទេសជាតិ។ គ្រូបង្វឹកខាងលើនេះក៏រឹតតែមានចិត្តខំប្រឹងបន្ថែមទៀតមែន ក្នុងការជួយស្វែងរកធនធានថ្មី បណ្ដុះសមត្ថភាពសិស្សឲ្យខ្លាំងដើម្បីជួយដល់ តេក្វាន់ដូ ITF រកភាពជោគជ័យជូនប្រទេសជាតិ នៅព្រឹត្តិការណ៍អន្តរជាតិធំៗ ជាពិសេសស៊ីហ្គេម ឆ្នាំ២០២៣ នេះតែម្ដង។

ទិដ្ឋភាពថ្នាក់ដឹកនាំ ITF ថតរូបជុំគ្នា

រំលឹកដែរថា ក្លឹបតេក្វាន់ដូ ITF ក្ដីចាស់ នៅឯបាក់ខែង កាលពីថ្ងៃសៅរ៍ ទី៣ ខែតុលា ឆ្នាំ២០២០ បានធ្វើពិធីប្រកួតដំឡើងខ្សែក្រវាត់សិស្សគុនរបស់ខ្លួន។ ក្នុងពិធីនោះដែរក៏មានវត្តមានចូលរួមពីប្រធានសហព័ន្ធឯកឧត្ដម កែវ រ៉េមី និងថ្នាក់ដឹកនាំផ្សេងៗជាច្រើនរួមចូលរួមផងដែរ៕

វីដេអូ៖

អត្ថបទ៖ នួន ស៊ីណា