Samsung OnePlus និង Xiaomi បញ្ឈឺ Apple ចុកៗរឿងដកដុំសាក និងកាស
- 2020-10-16 02:16:42
- ចំនួនមតិ 0 | ចំនួនចែករំលែក 0
Samsung OnePlus និង Xiaomi បញ្ឈឺ Apple ចុកៗរឿងដកដុំសាក និងកាស
ចន្លោះមិនឃើញ
ក្រោយពី Apple បានប្រកាសចេញ iPhone ជំនាន់ថ្មី ប្រធានបទនៃការដកដុំសាក និងកាសស្ដាប់ក្លាយជាប្រធានបទក្ដៅគគុកមួយក្នុងបណ្ដាញសង្គម។ ជាងនេះទៅទៀត ក្រុមហ៊ុនជាគូប្រជែងរបស់ Apple ក៏បានបង្ហោះសារឌឺដងជាហូរហែផងដែរ។
ទំព័រ Facebook ផ្លូវការរបស់ Samsung ប្រចាំនៅតំបន់ Caribbean បានបង្ហោះរូបភាពមួយសន្លឹកនៃដុំសាករបស់ខ្លួន ដែលមានភ្ជាប់ជាមួយពាក្យចាក់ដោតមួយឃ្លាថា "Included with your Galaxy” ដែលមានន័យថា "មានបន្ថែមមកជាមួយស្មាតហ្វូន Galaxy របស់អ្នក"។
ចំណែក OnePlus ឯណោះបានយកឱកាសបង្ហាញចេញស្មាតហ្វូន OnePlus 8T កាលពីល្ងាចថ្ងៃទី១៤ ខែតុលា ដោយបានសង្កត់ធ្ងន់ថា ដុំសាកគឺមានដាក់ជូនដោយឥតគិតថ្លៃនៅក្នុងប្រអប់។
ចំពោះ Xiaomi វិញ បានប្រើប្រាស់គណនី Twitter ដោយបង្ហោះនូវវីដេអូខ្លីមួយបង្ហាញអំពីការបើកប្រអប់ Xiaomi Mi 10T Pro និងបានភ្ជាប់ពាក្យមួយឃ្លាថា "កុំបារម្ភអី, ពួកយើងមិនយករបស់ណាមួយចេញពីប្រអប់ Mi 10T Pro ឡើយ”។
គួរដឹងថាគូប្រជែងទាំងបីខាងលើនេះ ក៏ធ្លាប់មានប្រវត្តិសើចចំអក Apple លើការសម្រេចចិត្តមួយចំនួនកាលពីពេលកន្លងទៅ ដូចជាសើចចំអករឿងដករន្ធកាស 3.5mm និងការប្រើរចនាបថក្បាលឆកជាដើម។ ប៉ុន្តែចុងក្រោយពួកគេសុទ្ធតែបានធ្វើតាម Apple៕