"នាគបួស" ប្រាសាទលើកូនភ្នំ លាក់ខ្លួន ឆ្ងាយអ្នកផងក្នុងព្រៃក្បែរជើងភ្នំដងរែក

2020-10-19 06:49:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រាសាទនាគបួស ឬអ្នកបួស មានឈ្មោះដើមច័ន្ទគិរី មានទីតាំងនៅលើកូនភ្នំជិតជើងភ្នំដងរែក នៅក្នុង ឃុំទឹកក្រហម ស្រុកជាំក្សាន្ត ខេត្តព្រះវិហារ។ ប្រាសាទនេះស្ថិតនៅកណ្តាលព្រៃឧទ្ទិសថ្វាយដល់ព្រហ្មញ្ញសាសនា។

ចេញពីផ្លូវគ្រួសច្រកអានសេះមានផ្លូវបំបែកមួយទៅកាន់ផ្លូវប្រាសាទអ្នកបួស ជាផ្លូវមួយមានចម្ងាយប្រហែល ៣គីឡូម៉ែត្រ។ តែនៅជ្រលងភ្នំស្រះស្រង់ ឬបារាយណ៍ទឹកបុរាណមួយនៅជើងភ្នំខាងក្រោមប្រាសាទ ដែលមានទំហំដ៏ធំល្វឹងល្វើយមានទឹកថ្លាសម្រាប់ធ្វើពិធីសាសនាព្រហ្មញ្ញ និងសម្រាប់ការបង្ហូរទឹកស្រោចស្រពស្រូវប្រាំងនៃស្រែចម្ការរបស់សហគមន៍ខ្មែរតាំងបុរាណរហូតដល់សព្វថ្ងៃ។

សាងសង់បែរមុខទៅទិសខាងត្បូង គេឃើញមានជណ្ដើរឡើងចំនួន១១កាំ ទទឹងមានប្រវែងប្រហែល ១០០ម៉ែត្រ បណ្ដោយ៣០០ម៉ែត្រ ប្រាសាទនេះគឺជាក្រុមប្រាសាទមានប៉មតូចៗ ចំនួន៨ និងប្រាង្គខ្ពស់មួយ ហើយមានប្រាសាទនៅខាងក្រៅកំពែងផ្សេងទៀតផង។

នាគបួសសាងសង់អំពី ឥដ្ឋ ថ្មបាយក្រៀម និង ថ្មភក់ ដែលត្រូវបានសាងសង់ចាប់ពីសតវត្សទី៧ដល់សតវត្សទី ១១នៃ គ.ស។ ទីនេះអាចជាកន្លែងមូលដ្ឋានសហគមន៍មួយនៅសម័យបុរេអង្គរ៕ រូបភាព៖ មន្ទីរវប្បធម៌ខេត្តព្រះវិហារ