មេធាវីអួតតារា K-Pop ៣នាក់នេះពូកែបង្ក្រាបអ្នកនិយាយមិនល្អ ដោយវិធីត្រជាក់បំផុត
- 2020-10-26 05:02:31
- ចំនួនមតិ 0 | ចំនួនចែករំលែក 0
មេធាវីអួតតារា K-Pop ៣នាក់នេះពូកែបង្ក្រាបអ្នកនិយាយមិនល្អ ដោយវិធីត្រជាក់បំផុត
ចន្លោះមិនឃើញ
ជាតារា K-Pop គេចមិនផុតពីជួបរឿងឈឺក្បាល និងមតិ ឬ Comment យល់ឃើញមិនល្អពីមហាជននោះទេ ទោះបីរឿងខ្លះពិត ឬមិនពិតក្ដី។ មានតារាភាគច្រើនត្រូវមកអំពល់ទុក្ខដោយសារពាក្យមិនល្អ ស្របពេលតារាខ្លះបានប្រឹងងើបឈរ តបនឹងការយល់ឃើញមិនល្អខុសពីការពិត ធ្វើឲ្យ Hater បាត់មាត់ រកអ្វីតបលែងបាន។
ផ្អែកតាមមេធាវីជើងចាស់ប្រចាំវិស័យ K-Pop បានឲ្យដឹងថា Heechul (Super Junior), Suga (BTS) និង IU គឺជាតារាដែលអាចជម្នះរឿងឈឺក្បាលទាំងនេះ ដោយវិធីត្រជាក់ និងមានប្រសិទ្ធិភាពបំផុតលើអ៊ីនធើណិត។
លោក Ko Seung Woo និង Jeong Chong Myeong គឺជាមេធាវីដែលមានបទពិសោធន៍ពេញខ្លួនក្នុងវិស័យនេះ ដោយធ្លាប់បានធ្វើការជាមួយនឹងសមាជិក Wanna One, តារាសម្ដែង KIm Soo Hyun, Seo Ye Ji និងតារាល្បីផ្សេងទៀត។
មេធាវីទាំង ២បានជជែកគ្នា ដោយបានលើកឡើងពីបញ្ហាដែលតែងក្លាយជារឿងក្ដៅប្រចាំ K-Pop នោះគឺ Comment បែបវាយប្រហារ ក៏ដូចជាវិធីដែលតារាៗចេះលើកមកការពារ និងបង្ក្រាបអ្នកនិយាយមិនល្អទាំងនោះ។
រម្លឹកកាលពីឆ្នាំ ២០១៨ Suga បានកត់សម្គាល់ឃើញថា ARMY មួយចំនួនតែង Comment សុំកុំឲ្យលោកមើល ឬខ្វល់នឹង Comment វាយប្រហារផ្សេងៗ។ ជាលទ្ធផល Suga ថា លោកមិនមានពេលទៅអាន Comment អាក្រក់ៗទាំងនោះទេ។ ជាក់ស្ដែងលោកបានប្រាប់ទៅ Anti-Fan ឲ្យបន្តសរសេរអ្វីដែលពួកគេចង់ចុះ ព្រោះនៅថ្ងៃណាមួយ នឹងមានគេប្ដឹង បើសិនមានរឿងអ្វីកើតឡើងមែន។
ពាក្យមួយម៉ាត់នេះ មេធាវី Jeong Chong Myeong បានសរសើរ Suga មិនដាច់ពីមាត់ នូវអ្វីដែលលោកបានឆ្លើយតប។
បន្ទាប់ពី Suga លោកក៏បានលើកយក IU និង Heechul (Super Junior) មកជាឧទាហរណ៍ដែរ ទាក់ទងនឹងការឆ្លើយតបចំពោះ Hater។ ជាក់ស្ដែងកាលពីខែមិថុនា ឆ្នាំ ២០២០ ផលិតកម្មរបស់ IU គឺ EDAM Entertainment បានប្រាប់អ្នកគាំទ្រថាពួកគេឈ្នះក្ដីប្រឆាំងនឹងអ្នកដែលមានចេតនាសរសេរ ឬនិយាយបង្កាច់បង្ខួចហួសហេតុ ដាក់តារាស្រីរូបនេះហើយ។ ជាលទ្ធផលក្រុមអយ្យការ បានថ្កោលទោសអ្នកនិយាយមិនល្អទាំងនោះ ពីបទបរិហារកេរ្តិ៍ធ្ងន់ធ្ងរ ដោយកាត់ទោសកម្រិតធ្ងន់ជាងធម្មតា។
ស្រដៀងគ្នានេះដែរ ងាកចូល Heechul បានទាំងជួលមេធាវីជំនាញដល់ទៅ ៦នាក់ កាលពីដើមឆ្នាំ ២០២០ ឲ្យធ្វើការ និងរៀបចំឯកសារផ្សេងៗប្រឆាំង ប្ដឹងចំពោះអ្នកណាដែលចូលចិត្តនិយាយមិនល្អ និងមិនពិត ហើយបើទោះបីមានការសុំអង្វរពីភាគីណាក៏ដោយ ក៏ Hechul លែងអត់ឱនដែរ។ Heechul និយាយថា «ចេញពីបទពិសោធន៍ផ្ទាល់ខ្លួនខ្ញុំតែម្ដង មនុស្សយើងបានឆ្លងកាត់បញ្ហាច្រើន ដើម្បីចាប់ខ្លួនអ្នកប្រព្រឹត្តិខុសក្នុងករណីនេះ។ ខ្ញុំទទួលបានការគាំទ្រច្រើន ដូចនេះខ្ញុំមិនបញ្ឈប់ការតាំងចិត្តសម្រាប់ការប្រឆាំងតបនឹងអ្នកណាដែលនិយាយមិនល្អទាំងនោះទេ»។
មេធាវី Ko Seung Woo ក៏បាននិយាយដែរថាជាទូទៅមហាជនតែងសម្លឹងរកចំណុចអវិជ្ជមាន និងរិះគន់មិនសំចៃមាត់ ប៉ុន្តែអរគុណដល់តារាដែលជាសាមីខ្លួនដែលមានភាពក្លាហានក្នុងការងើបឈរប្រឆាំងបកទៅអ្នកទាំងនោះ៕