គិតឲ្យមែនទែនទៅ iPhone 12 ដែលអត់ដុំសាក មិនបានជួយបរិស្ថានខ្លាំងឡើយ

2020-10-27 06:24:57
ចំនួនមតិ 0 | ចំនួនចែករំលែក 0

ចន្លោះមិនឃើញ

Apple បានអះអាងថាការសម្រេចចិត្តដកគ្រឿងបន្ថែមដែលធ្លាប់មានមកជា iPhone ដែលមានដុំសាក និងកាសស្ដាប់ គឺជាការសម្រេចចិត្តដែលគិតគូរដល់បរិស្ថានជាចម្បង។ យ៉ាងណាក្ដី Apple មិនបានលើកឡើងអំពីរឿងប៉ុន្មានចំណុចទាក់ទងនឹងការសម្រេចចិត្តនេះ ៖

១. Apple នៅផលិតដុំសាកសម្រាប់លក់ ៖ ដុំសាកសម្រាប់ iPhone 12 នៅតែមាន ប៉ុន្តែគ្រាន់តែមិនមានក្នុងប្រអប់។ Apple ផលិតដុំសាកដោយដាក់លក់ក្នុងតម្លៃ ១៩ដុល្លារ (តម្លៃនៅបរទេស)។

២. ដុំសាក iPhone ចាស់ៗភាគច្រើនគឺមិនអាចប្រើបាន ៖ ខ្សែដែល Apple ដាក់មកក្នុងប្រអប់ iPhone ថ្មីៗគឺជាខ្សែ Lightning-to-USB-C ដែលមានន័យថាក្បាលម្ខាងជា USB-C និងម្ខាងទៀតជា Lightning។ ខ្សែនេះមិនអាចប្រើជាមួយដុំសាក iPhone ចាស់ៗនោះទេ គឺលើកលែងតែ iPhone 11 Pro/Pro Max ប៉ុណ្ណោះ។ ដូចនេះប្រសិនបើអ្នកមិនមែនឡើងស៊េរីពី iPhone 11 Pro/Pro Max អ្នកនឹងត្រូវទិញដុំសាក USB-C មួយបន្ថែមទៀតពេលទិញ iPhone 12។

៣. iPhone 12 អាចសាកលឿនជាងមុន ប៉ុន្តែទាល់តែដុំសាកដែលគាំទ្រជាមួយវា ៖ iPhone 12 ទាំងអស់អាចសាកថ្មដល់កម្លាំង 20W។ Apple មានផ្ដល់ជូនខ្សែដែលអាចសាកដល់ 20W ប៉ុន្តែមិនមានផ្ដល់ជូនដុំសាកទេ។ ប្រសិនបើប្រើឆ្នាំងសាក 18W បានមកពី iPhone 11 Pro/Pro Max អ្នកនឹងមិនបានល្បឿនសាក 20W នោះទេ។ ចុងក្រោយអ្នកត្រូវទិញដុំសាកពី Apple ឬទិញដុំសាកពីក្រុមហ៊ុនផ្គត់ផ្គង់ផ្សេងដែលមានពាក្យសម្គាល់ថា "Made for iPhone” ក្រោមអាជ្ញាប័ណ្ណ MFi របស់ Apple។

នៅពីក្រោយការសម្រេចចិត្តនេះដែរ Apple នឹងអាចទទួលបានផលចំណេញបានច្រើនជាងមុនជាជាងការជួយដល់បរិស្ថាន។ ទីមួយ Apple ចំណេញលុយដោយមិនបាច់ដាក់សុំសាក និងកាសស្ដាប់ក្នុងប្រអប់។ បន្ទាប់មកចំណេញលុយតាមរយៈការធ្វើឲ្យប្រអប់ស្ដើង និងចំណាយលុយតិចជាងមុនលើការដឹកជញ្ជូន។ ចុងក្រោយ Apple អាចចំណេញបន្ថែមតាមរយៈការដាក់លក់ដុំសាក និងកាសស្ដាប់ ដែលមួយមានតម្លៃ ១៩ដុល្លារ (តម្លៃនៅបរទេស)៕

ប្រភព៖ Androidauthority ប្រែសម្រួល៖ សុខហេង