សាយ រំភើបស្ទើរស្រក់ទឹកភ្នែក ដោយសារពាក្យមួយឃ្លារបស់លោកជំទាវ មិថុនា ភូថង
- 2020-12-02 02:28:16
- ចំនួនមតិ 0 | ចំនួនចែករំលែក 0
សាយ រំភើបស្ទើរស្រក់ទឹកភ្នែក ដោយសារពាក្យមួយឃ្លារបស់លោកជំទាវ មិថុនា ភូថង
ចន្លោះមិនឃើញ
លោក អ៊ួន បឋម និងក្រុមការងាររត់ដើម្បីសប្បុរសធម៌ជាមួយសាយ កំពុងស្ថិតនៅលើទឹកដីខេត្តព្រះវិហារ ប៉ុន្តែនៅព្រឹកថ្ងៃទី២ ខែធ្នូ ឆ្នាំ២០២០ នេះ ចិត្ដអារម្មណ៍របស់លោក កំពុងស្ថិតនៅលើខេត្ដកោះកុងនៅឡើយ បន្ទាប់ពីបានទទួលសារដ៏ក្ដុកក្ដួលមួយពីអភិបាលខេត្តកោះកុង គឺលោកជំទាវ មិថុនា ភូថង។
សារដែលសាយ បានទទួលនៅព្រឹកនេះ គឺជាសារដែលលោកជំទាវរំលឹកឡើងវិញពីបុព្វហេតុជួយជាតិ មាតុភូមិ និងសង្គ្រោះជីវិតមនុស្សកាលពី៤២ឆ្នាំមុនរបស់ជីតាលោកជំទាវ គឺលោកតា សាយ ភូថង។ លោកជំទាវបានប្រៀបធៀប បេសកកម្មរបស់សាយក្នុងឆ្នាំ២០២០ នេះ គឺដូចទៅនឹងបេសកកម្មរបស់លោកតាលោកជំទាវកាលពីឆ្នាំ១៩៧៨ដែរ។
មិថុនា ភូថង៖"២ ធ្នូ ១៩៧៨ លោកតា ដឹកនាំ ប្រជាជនជាពិសេសយុវជនដើម្បីចូលរួមជាមួយរណសិរ្សសាមគ្គីសង្គ្រោះជាតិកម្ពុជា ដើម្បីជួយសង្គ្រោះអាយុជីវិត ៤២ឆ្នាំក្រោយយុវជនសាយរត់ដើម្បីសង្គ្រោះ ជីវិតកុមារកម្ពជា"។
ឆ្លើយតបទៅនឹងការកោតសរសើររបស់លោកជំទាវ មិថុនា ភូថង លោក សាយ និយាយថា រូបលោកពិតជារំភើបស្ទើរស្រក់ទឹកភ្នែកពេលឃើញមានការគាំទ្រយ៉ាងខ្លាំងបែបនេះ ជាពិសេសខេត្តកោះកុងផ្ទាល់ក៏បានទទួលយ៉ាងកក់ក្តៅ តាំងពីពួកលោកបានឈានជំហានទី១ ចូលដល់ទឹកដីកោះកុង។
សាយ "ខ្ញុំបាទគ្មានអ្វីក្រៅពីជូនពរលោកជំទាវនិងក្រុមគ្រួសារឱ្យសុខភាពល្អ សម្រេចបានគ្រប់ភារកិច្ច"។
លោកបញ្ជាក់ថា សម្រាប់ទឹកដីកោះកុងលោកចងចាំមិនភ្លេច ហើយរូបលោក និងក្រុមការងាររកពេលត្រលប់ទៅវិញក្នុងពេលណាមួយ។ បើទោះបីជាស្ថានភាពឥឡូវតានតឹងដោយសារ covid-19 តែកម្មវិធីពួកលោកនៅតែដំណើរការទៅមុខជានិច្ច។
ដើម្បីបរិច្ចាគ ប្រិយមិត្តអាចបរិច្ចាគបានតាមគណនីធនាគារ ABA : 000 320 555 (Angkor Hospital for Children Limited) ឬ Wing : 52714 (AHC Patient Contributions)។
សម្រាប់ព័ត៌មានលម្អិតក្នុងការចូលរួម ក៏ដូចជាតាមដានចំនួនទឹកប្រាក់ដែលបានបរិច្ចាគ សូមចូលទៅកាន់គេហទំព័រ saicambodianartist.com/ ។ ក្រៅពីគេហទំព័រនេះ ប្រិយមិត្តអាចតាមដានរាល់សកម្មភាពរបស់សាយអំឡុងពេលរត់ តាមរយៈទំព័រហ្វេសប៊ុករបស់ Sai, Channel YouTube របស់សាយ, ទំព័រហ្វេសប៊ុករបស់ Sabay ក៏ដូចជាគេហទំព័រ Sabay៕