អតីតអ្នកយាមផ្ទះសំណាក់ ផ្ទុះខ្លាំង ក្រោយ Cover បទ "ឧបសគ្គស្នេហ៍" កាល ២០២០!
- 2021-01-06 04:39:39
- ចំនួនមតិ 0 | ចំនួនចែករំលែក 0
អតីតអ្នកយាមផ្ទះសំណាក់ ផ្ទុះខ្លាំង ក្រោយ Cover បទ "ឧបសគ្គស្នេហ៍" កាល ២០២០!
ចន្លោះមិនឃើញ
យុវជនម្នាក់ បានធ្វើឲ្យមានការចាប់អារម្មណ៍ខ្លាំងបំផុតនៅចង្កោមអ្នកចូលចិត្តសិល្បៈចម្រៀង កាលពីឆ្នាំ ២០២០ ក្រោយពីរូបគេ បានចេញមកច្រៀង Cover បទ "ឧបសគ្គស្នេហ៍" របស់តារាចម្រៀង ហាក់ រីខត ធ្វើឲ្យរញ្ជួយអ្នកបេះដូងស្ដាប់។
មានរូបរាងស្គម សម្បុរខ្មៅ យុវជនរូបនេះមានឈ្មោះថា សួ វិចិត្រ មានវ័យ ២៧ឆ្នាំ គឺជាអតីតអ្នកយាមផ្ទះសំណាក់ឲ្យគេ បានប្រាក់ខែត្រឹម ៤០ដុល្លារប៉ុណ្ណោះក្នុង១ខែ តែបច្ចុប្បន្ន លោកគឺជាតារាចម្រៀងប្រចាំ Sky Bar នៃមជ្ឈមណ្ឌល "ស្លាមាស" ស្ថិតនៅជាប់ស្ទឹងពោធិ៍សាត់ ខេត្តពោធិ៍សាត់។
មិនមានភាពទាក់ទាញលើរូបសម្រស់ ប៉ុន្តែយុវជនកើតលើទឹកដីអ្នកតាឃ្លាំងមឿង មានទឹកដមសំនៀងល្អ ធ្ងន់ ច្បាស់ ស្រែកតុងខ្ពស់ៗមិនបែក ពោរពេញដោយមនោសញ្ចេតនា បង្កើតបានជាសូរសំនៀងក្រអួនក្រអៅ។ ដូច្នេះហើយរូបគេ បានធ្វើឲ្យរញ្ជួយបេះដូងអ្នកស្ដាប់តាមរយៈបទ "ឧបសគ្គស្នេហ៍" កាលពីពាក់កណ្ដាលឆ្នាំ ២០២០ ដោយប្រិយមិត្តជាច្រើនបានពោលសរសើរលោកថា ច្រៀងចម្រៀងមួយបទនេះ បានពីរោះបំផុត ទឹកដមសំឡេងស៊ីនឹងអត្ថន័យនៃបទចម្រៀង ហើយការប្រើប្រាស់សំឡេងលើកដាក់ គឺរឹតតែល្អឥតខ្ចោះថែមទៀត។
ស្ថានភាពនេះ បានធ្វើឲ្យកេរ្តិ៍ឈ្មោះលោក ក៏បានប្រែប្រួលយ៉ាងលឿន។ សួ វិចិត្រ បានប្រាប់ថា បទ "ឧបសគ្គស្នេហ៍" របស់តារាចម្រៀងផលិតកម្មថោន លោក ហាក់ រីខត បានធ្វើឲ្យប្រិយមិត្តជាច្រើនបានស្គាល់លោក ទាំងនឹកស្មានមិនដល់។ ក្រៅពីបទចម្រៀងខាងលើ តែបណ្ដាញសង្គម មានដូចជា យូធូប និង Tik Tok បានជួយលោកច្រើន។
លោក សួ វិចិត្រ ប្រាប់ដំណើររឿងខ្លះៗថា ដើម្បីរើបម្រះពីភាពទីទ័ល ផង និងចង់កសាងកេរ្តិ៍ឈ្មោះឲ្យគេស្គាល់ផង លោកបានឆ្លៀតពីការងារច្រៀង មកសិក្សាពីយូធូប និងបានធ្វើវីដេអូបង្ហោះលើប្រព័ន្ធនេះ កាលពី១ឆ្នាំជាងមុន ដើម្បីរកកម្រៃបន្ថែម។ ប៉ុន្តែភ្លាមៗមិនមានអ្នកចាប់អារម្មណ៍នោះទេ រហូតដល់លោកចូលលេង Tik Tok ប្រមាណជា កន្លះឆ្នាំក្រោយនេះ ទើបអ្វីៗ ចាប់ផ្ដើមផ្លាស់ប្ដូរខ្លាំង ពិសេសក្រោយពីលោកបាន Cover បទ "ឧបសគ្គស្នេហ៍" របស់ ហាក់ រីខត។
“កាលខ្ញុំធ្វើវីដេអូដាក់យូធូបដំបូងៗ គឺអត់សូវមានអ្នកមើលទេ ហើយក៏មានមិត្តភ័ក្តិឲ្យយោបល់ថា គួរចាប់ផ្ដើមលើ Social Media ណាដែលឆាប់ល្បី ក្រោយមកខ្ញុំក៏ចូលលេង Tik Tok ទៀត ក៏ស្រាប់តែល្បីខ្លាំងចាប់តាំងពីបទ "ឧបសគ្គស្នេហ៍" ហើយក៏មានអ្នកចូលមកស្ដាប់បទខ្ញុំច្រៀងនេះនៅលើយូធូបខ្ញុំច្រើនឡើងៗ គឺប្រមាណ២-៣ខែចុងក្រោយនេះ!”។
មកដល់បច្ចុប្បន្ន វីដេអូលោកច្រៀងបទ "ឧបសគ្គស្នេហ៍" មានចំនួនចូលទស្សនាជាង ៧លានដងហើយ ហើយតារាចម្រៀង ក៏មានមនុស្សស្គាល់លោកច្រើនដែរ ខុសពីពេលមុន លោកដូចជាអ្នកចម្រៀងនៅតំបន់ដាច់ស្រយាលម្នាក់ ដែលមិនសូវមានអ្នកស្គាល់។ វិចិត្រ ប្រាប់ថា ក្រោយទទួលបានការពេញនិយមតាមរយៈបទខាងលើ ក៏មានគេលួងលោមហៅលោកមកធ្វើការជាមួយគេនៅភ្នំពេញច្រើនដែរ តែលោកមិនទាន់សម្រេចចិត្ត។
វិចិត្រ ពោលថា លោកនៅស្រឡាញ់ការងារនៅស្រុកកំណើតនាខេត្តពោធិ៍សាត់ ជាតារាចម្រៀងប្រចាំ Sky Bar កន្លែងដំបូងដែលជួយឲ្យលោកបានដុះដាលជីវិតជាអ្នកចម្រៀង។ មានបទចម្រៀងរបស់តារាចម្រៀងជាច្រើនទៀត ដែលលោក សួ វិចិត្រ យកមកច្រៀងហើយទទួលបានការពេញនិយមខ្លាំង មានដូចជាបទ "នឹកខ្លាំងណាស់" "ស្មោះប៉ុណ្ណឹងមិនល្មម" "បងកាន់ដៃអូន" និងបទ "ដឹងទេថាបងឈឺចាប់ជាដើម៕