ផលិតកម្ម "រាម" បញ្ចេញ Teaser បទទី១របស់ មាស សុខសោភា ឡើងឡូយ!
- 2021-02-09 04:03:18
- ចំនួនមតិ 0 | ចំនួនចែករំលែក 0
ផលិតកម្ម "រាម" បញ្ចេញ Teaser បទទី១របស់ មាស សុខសោភា ឡើងឡូយ!
ចន្លោះមិនឃើញ
ទីបំផុតផលិតកម្ម "រាម" ដែលជាជម្រកថ្មីរបស់ មាស សុខសោភា បានត្រៀមនឹងបញ្ចេញបទដំបូងឲ្យតារាចម្រៀងស្រីឆាប់ៗនេះហើយ ក្រោយថ្មីៗនេះ ពួកគេបានបញ្ចេញ Video Teaser ខ្លីមួយគួរឲ្យចាប់អារម្មណ៍។
វីដេអូខ្លីនេះ គឺជាផ្នែកមួយនៃបទចម្រៀងទី១របស់ មាស សុខសោភា នៅក្នុងផលិតកម្មថ្មីថ្មោងនេះ មានចំណងជើងថា "Return” ដែលមានន័យថាជាការវិលត្រឡប់ ហើយក៏ដូចនឹងការវិលត្រឡប់របស់ អតីតតារាចម្រៀងថោន ក្រោយពីនាងបានស្ងប់ស្ងាត់ចេញបទចម្រៀងយូរក្រែលដែរហើយ។
មិនទាន់មានអ្វីជាចំណុចវាស់វែងនៃបទចម្រៀងថ្មី ដែលត្រៀមនឹងចេញនេះ ថាពីរោះ ឬក៏ខ្លឹមសារយ៉ាងណានោះទេ។ ប៉ុន្តែដែលគួរឲ្យចាប់អារម្មណ៍ គឺថា "Return” បាននាំមកនូវទស្សនីយភាព ក៏ដូចជាអារម្មណ៍ថ្មី តាមរយៈការសម្ដែង និងការតុបតែងទិដ្ឋភាពនៅក្នុងវីដេអូចម្រៀងនេះ ត្រូវបានរៀបចំតាមរបៀបខ្មែរបុរាណ មើលទៅប្លែក និងគួរជាទីមនោរម្យ។ ក្រុមការងារ "រាម" បានគូសបញ្ជាក់ថា ពួកគេសម្រិតសម្រាំងណាស់សម្រាប់វីដេអូចម្រៀងមួយនេះរបស់ មាស សុខសោភា។
យ៉ាងណា មិនទាន់មានកាលបរិច្ឆេទពិតប្រាកដថា បទទី១របស់តារាស្រីរូបនេះនឹងចេញនៅថ្ងៃណានោះទេ។ មាស សុខសោភា បានក្លាយជាតារាចម្រៀងឯករាជ្យជិតមួយឆ្នាំមកហើយ ចាប់តាំងពីបានសម្រេចចិត្តដើរចេញពីផលិតកម្មថោន ដែលនាងបានជ្រកកោនជិត ១០ឆ្នាំ។
ក្រោយការដើរចេញនោះ នាងត្រូវបានគេចងភ្ជាប់ទៅនឹងចចាមអារ៉ាមថា អាចនឹងចូលទៅហង្សមាស ឬក៏ Galaxy Navatra។ ប៉ុន្តែកាលសប្ដាហ៍មុន សាមីខ្លួនបានស្រាយបំភ្លឺអស់ហើយថា នាងបានសម្រេចចូលរួមជាមួយផលិតកម្ម "រាម" រួចហើយ ហើយកម្មវិធីសម្ពោធផ្លូវការពីការចូលរួមនឹង គ្រោងនឹងធ្វើឡើងនៅចុងខែនេះ។ តោះ...ឥឡូវទស្សនាវីដេអូខ្លីបទថ្មីខាងលើរបស់ សោភា ទាំងអស់គ្នាសិន៖